ಮಂಚದಲ್ಲಿ ಮಗಳ ಶವ ಹೊತ್ತುಕೊಂಡೇ 35 ಕಿ.ಮೀ. ಸಾಗಿದ; ಪೋಸ್ಟ್​ ಮಾರ್ಟಮ್​ಗಾಗಿ ಏಳು ಗಂಟೆಗಳ ಕಾಲ ನಡೆದರು!

ನವದೆಹಲಿ: ಸರ್ಕಾರಿ ವ್ಯವಸ್ಥೆಯ ದುರವಸ್ಥೆ ಹಾಗೂ ಬಡತನದ ಕಾರಣದಿಂದಾಗಿ ವ್ಯಕ್ತಿಯೊಬ್ಬ ತನ್ನ ಮಗಳ ಶವವನ್ನು ಮಂಚದ ಮೇಲೆ ಇರಿಸಿ ಹೊತ್ತುಕೊಂಡು ಮರಣೋತ್ತರ ಪರೀಕ್ಷೆಗಾಗಿ 35 ಕಿಲೋಮೀಟರ್ ದೂರ ನಡೆದೇ ಸಾಗಿದ ದಯನೀಯ ಪ್ರಸಂಗವೊಂದು ನಡೆದಿದೆ.

ಈ ವ್ಯಕ್ತಿಯ 16 ವರ್ಷದ ಮಗಳು ಮೇ 5ರಂದು ಆತ್ಮಹತ್ಯೆ ಮಾಡಿಕೊಂಡಿದ್ದಳು. ಈ ಸಂದರ್ಭದಲ್ಲಿ ಮನೆಗೆ ಬಂದಿದ್ದ ಸ್ಥಳೀಯ ಪೊಲೀಸರು ಮರಣೋತ್ತರ ಪರೀಕ್ಷೆಗಾಗಿ ಆಕೆಯ ಶವವನ್ನು ತರುವಂತೆ ಕುಟುಂಬಸ್ಥರಿಗೆ ಆದೇಶಿಸಿದ್ದರು. ವಾಹನ ಮಾಡಿಕೊಂಡು ಹೋಗುವಷ್ಟು ಆರ್ಥಿಕ ಚೈತನ್ಯವಿರದ ಈ ಕುಟುಂಬಕ್ಕೆ ಬೇರೆ ಯಾರೂ ವಾಹನದ ವ್ಯವಸ್ಥೆ ಮಾಡಿಕೊಡಲೂ ಇಲ್ಲ. ಕೊನೆಗೆ ಬೇರೆ ದಾರಿ ಕಾಣದ ತಂದೆ ಗ್ರಾಮದ ಕೆಲವರ ಸಹಾಯದಿಂದ ಮಗಳ ಶವವನ್ನು ಮಂಚದ ಮೇಲೆ ಇರಿಸಿ ಹೊತ್ತುಕೊಂಡೇ 35 ಕಿ.ಮೀ. ದೂರದಲ್ಲಿರುವ ಮರಣೋತ್ತರ ಪರೀಕ್ಷಾ ಕೇಂದ್ರಕ್ಕೆ ತೆರಳಿದ್ದಾರೆ.

ಇದನ್ನೂ ಓದಿ: ಕೆಎಎಸ್ ಅಧಿಕಾರಿ ಚೇಂಬರ್‌ನ ವಾಷ್ ರೂಮ್​ನಲ್ಲಿ ದಂಪತಿಯ ಶವ ಪತ್ತೆ; ಭೀಕರವಾಗಿ ಕೊಲೆ ಮಾಡಿದ ಹಂತಕರು…

ಹೀಗೆ ಸಂಕಷ್ಟವನ್ನು ಎದುರಿಸಿದ ಆ ತಂದೆಯ ಹೆಸರು ಧೀರಾಪತಿ ಸಿಂಗ್ ಗೊಂಡ್. ಮಧ್ಯಪ್ರದೇಶದ ಗಡಾಯಿ ಎಂಬ ಗ್ರಾಮದ ಇವರು ಮಗಳ ಶವ ಹೊತ್ತುಕೊಂಡು ಸಿಂಗ್ರಾಲಿ ಆಸ್ಪತ್ರೆಗೆ ತೆರಳಿದ್ದಾರೆ. ನಾವು ಬೆಳಗ್ಗೆ 9 ಗಂಟೆಗೆ ಹೊರಟು ಸಂಜೆ 4ಕ್ಕೆ ಆಸ್ಪತ್ರೆಗೆ ತಲುಪಿದ್ದೇವೆ. ಅಷ್ಟು ದೂರ ಮಂಚವನ್ನು ಹೊತ್ತುಕೊಂಡು ಬಂದ ನಮಗೇ ಈಗ ಅಸೌಖ್ಯ ಅನಿಸುತ್ತಿದೆ. ಅಷ್ಟು ಸಮಸ್ಯೆಯಾದರೂ ನಮಗೆ ಯಾರೂ ಪರಿಹಾರ ಸೂಚಿಸಲಿಲ್ಲ ಎಂದು ಗೊಂಡ್ ಹೇಳಿದ್ದಾರೆ.

ಈ ವ್ಯಕ್ತಿಯ ಮನೆಯಿಂದ ಒಂದು ಕಿ.ಮೀ. ದೂರದಲ್ಲಿ ರಸ್ತೆ ವ್ಯವಸ್ಥೆ ಇದ್ದು, ಯಾರಾದರೂ ವಾಹನ ವ್ಯವಸ್ಥೆ ಮಾಡಿಕೊಟ್ಟಿದ್ದರೆ ಈ ಸಮಸ್ಯೆ ಬಂದಿರುತ್ತಿರಲಿಲ್ಲ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಪೊಲೀಸ್ ಅಧಿಕಾರಿ ಅರುಣ್ ಸಿಂಗ್, ಶವಗಳ ಸಾಗಣಿಕೆಗಾಗಿ ಇಲಾಖೆಗೆ ಸರ್ಕಾರದಿಂದ ಹಣ ಮಂಜೂರಾಗಿಲ್ಲ. ಹೀಗಾಗಿ ಮರಣೋತ್ತರ ಪರೀಕ್ಷಾ ಕೇಂದ್ರಕ್ಕೆ ಶವ ಸಾಗಿಸಲು ವಾಹನದ ವ್ಯವಸ್ಥೆ ಮಾಡಲು ಆಗಿಲ್ಲ ಎಂದು ಹೇಳಿದ್ದಾರೆ.

https://www.vijayavani.net/both-sons-died-2-days-after-the-death-of-mother-all-three-lost-life-due-to-corona/

https://www.vijayavani.net/corona-creating-tragedy-in-family/

https://www.vijayavani.net/father-missing-please-help-to-find-a-request-by-son/