ನವದೆಹಲಿ: ಬೇರೆಯವರ ಪಾಸ್ವರ್ಡ್ ಬಗ್ಗೆ ಇತರರಿಗೆ ಕುತೂಹಲ ಇರುವುದು ಸಹಜ. ಪಾಸ್ವರ್ಡ್ ಎಷ್ಟೇ ಗುಟ್ಟಾಗಿಟ್ಟರೂ ಕೆಲವೊಮ್ಮೆ ಅದು ಬಹಿರಂಗವಾಗಿ ಬಿಡುತ್ತದೆ, ಇಲ್ಲವೇ ಹ್ಯಾಕ್ ಮಾಡಿಕೊಂಡು ತಿಳಿದುಕೊಳ್ಳಲಾಗುತ್ತದೆ. ಹೀಗಾಗಿ ಪಾಸ್ವರ್ಡ್ ಆದಷ್ಟೂ ಸುರಕ್ಷಿತವಾಗಿರಬೇಕು, ಸುಲಭದಲ್ಲಿ ಗೊತ್ತಾಗುವಂತೆ ಅಥವಾ ಅಂದಾಜಿಸುವಂತೆ ಇರಬಾರದು.
ಅದಾಗ್ಯೂ 2023ರಲ್ಲಿ ಇದುವರೆಗೆ ಯಾವುದನ್ನು ಪಾಸ್ವರ್ಡ್ ಆಗಿ ಹೆಚ್ಚು ಬಳಸಲಾಗಿದೆ, ಹೆಚ್ಚು ಬಳಕೆಯಾಗುವ ದುರ್ಬಲ ಪಾಸ್ವರ್ಡ್ಗಳು ಯಾವುವು ಎಂಬ ಮಾಹಿತಿಯೊಂದು ಹೊರಬಿದ್ದಿದೆ. ಪಾಸ್ವರ್ಡ್ ಮ್ಯಾನೇಜ್ಮೆಂಟ್ ಸಲ್ಯೂಷನ್ ಕಂಪನಿ ನಾರ್ಡ್ಪಾಸ್ ಇಂಥ ಒಂದು ಮಾಹಿತಿಯನ್ನು ಬಹಿರಂಗಪಡಿಸಿದೆ.
ನಾರ್ಡ್ಪಾಸ್ ವರದಿ ಪ್ರಕಾರ ಜಗತ್ತಿನಾದ್ಯಂತ ಅದರಲ್ಲೂ ಭಾರತೀಯರು 2023ರಲ್ಲಿ ಅತಿಹೆಚ್ಚು ಬಳಸಿದ ಪಾಸ್ವರ್ಡ್ ‘123456’ ಎಂಬುದು ಬಹಿರಂಗಗೊಂಡಿದೆ. ಇದರ ಜತೆಗೆ ದುರ್ಬಲ ಪಾಸ್ವರ್ಡ್ ಅಂದರೆ ಸಾಮಾನ್ಯವಾಗಿ ಹಲವರು ಬಳಸುವಂಥ ಪಾಸ್ವರ್ಡ್ ಯಾವುದು ಎಂಬುದನ್ನೂ ಈ ವರದಿ ತಿಳಿಸಿದೆ.
ಇದನ್ನೂ ಓದಿ: ಬಿಜೆಪಿಯಲ್ಲಿ ಉದ್ಭವಿಸಿತಾ ಭಿನ್ನಮತ?: ಕುತೂಹಲ ಕೆರಳಿಸಿದೆ ವಿಪಕ್ಷ ನಾಯಕನ ಆಯ್ಕೆ ವಿಚಾರ
ದುರ್ಬಲ ಪಾಸ್ವರ್ಡ್ಗಳ ಪೈಕಿ ‘India@123’ ಟಾಪ್ ಒನ್ನಲ್ಲಿದೆ. ಅಲ್ಲದೆ ‘admin’ ಎನ್ನುವುದು ಕೂಡ ಭಾರತ ಹಾಗೂ ಜಗತ್ತಿನೆಲ್ಲೆಡೆ ಅತಿಹೆಚ್ಚು ಬಳಕೆಯಾದ ಪಾಸ್ವರ್ಡ್ ಎಂದು ಇದು ಹೇಳಿದೆ. ಉಳಿದಂತೆ ಭಾರತದಲ್ಲಿ ‘password’, ‘Pass@123’, ‘Password@123’ ಪಾಸ್ವರ್ಡ್ ಆಗಿ ಈ ವರ್ಷ ಹೆಚ್ಚು ಬಳಕೆಯಾಗಿದೆ ಎಂದು ನಾರ್ಡ್ಪಾಸ್ ತಿಳಿಸಿದೆ.
ಇದನ್ನೂ ಓದಿ: ಎಂ. ಚಿನ್ನಸ್ವಾಮಿ ಸ್ಟೇಡಿಯಂ ಎಲ್ಲರಿಗೂ ಗೊತ್ತು: ಆದರೆ ಈ ಕ್ರೀಡಾಂಗಣಕ್ಕೆ ಯಾಕೆ ಆ ಹೆಸರು ಬಂತು?
ಇಂಟರ್ನೆಟ್ ಬಳಕೆದಾರರು ವಿವಿಧ ಪ್ಲಾಟ್‌ಫಾರ್ಮ್‌ಗಳಿಗಾಗಿ ಬಳಸುವ ಪಾಸ್ವರ್ಡ್ಗಳ ಬಗ್ಗೆ ಕಂಡುಹಿಡಿಯಲು ಈ ಸಂಶೋಧಕರು 6.6 ಟಿಬಿ ಪಾಸ್ವರ್ಡ್ ಡೇಟಾಬೇಸ್ ವಿಶ್ಲೇಷಿಸಿದ್ದಾರೆ. ಕಳವಿನ ವಿವಿಧ ಮಾಲ್‌ವೇರ್‌ಗಳಿಂದ ಬಹಿರಂಗಪಡಿಸಲಾದ ಡೇಟಾಬೇಸ್ಗಳಿಂದ ಈ ಅಧ್ಯಯನ ನಡೆಸಲಾಗಿದ್ದು, ಇಂಥ ಮಾಲ್ವೇರ್ಗಳು ಸೈಬರ್‌ ಸುರಕ್ಷತೆಗೆ ದೊಡ್ಡ ಅಪಾಯವೆಂದು ತಜ್ಞರು ಪರಿಗಣಿಸಿದ್ದಾರೆ.
ಜಗತ್ತಿನ ಶೇ. 31ರಷ್ಟು ಜನಪ್ರಿಯ ಪಾಸ್ವರ್ಡ್ಗಳು ಸಾಮಾನ್ಯವಾಗಿ ಅಂಕಿಗಳನ್ನಷ್ಟೇ ಹೊಂದಿರುತ್ತವೆ. ಅಂಥವುಗಳಲ್ಲಿ ‘123456789’, ‘12345’, ‘000000’ ಮುಂತಾದವು ಪ್ರಮುಖವಾದವು ಎನ್ನಲಾಗಿದೆ. ಮತ್ತೊಂದೆಡೆ ಈ ವರ್ಷ ಜಾಗತಿಕವಾಗಿ ಶೇ. 70 ಪಾಸ್ವರ್ಡ್ಗಳು ಸುಲಭದಲ್ಲಿ ಕಂಡುಹಿಡಿಯುಂಥದ್ದಾಗಿವೆ ಎಂದೂ ಈ ವರದಿ ತಿಳಿಸಿದೆ.
ವಿಶ್ವಕಪ್ ಕ್ರಿಕೆಟ್ ಫೈನಲ್ನ ಲಾಭ ಪಡೆಯಲು ಮುಂದಾದ ಪಾಲಿಕೆ; ಕೈಗೊಂಡ ಕ್ರಮ ಏನು?
ಶಮಿಗೆ ಏಳು ವಿಕೆಟ್: ಏನಿದು ಅಚ್ಚರಿ.. ಆತನೊಬ್ಬ ನಿನ್ನೆ ಕಂಡ ಕನಸು ಇಂದು ನಿಜವಾಯ್ತು!