ತಿನ್ನುವುದಕ್ಕಾಗಿ ಬಸವನಹುಳು ಖರೀದಿಸಿದಳು: ಮುತ್ತಿನಿಂದ ರಾತ್ರೋ ರಾತ್ರಿ ಲಕ್ಷಾಧೀಶ್ವರೆ ಆದಳು!

ಸಾತುನ್​ (ಥಾಯ್ಲೆಂಡ್​): ಅದೃಷ್ಟ ಎನ್ನುವುದು ಯಾವಾಗ ಹೇಗೆ ಬರುತ್ತದೆ ಎಂದು ಹೇಳುವುದೇ ಕಷ್ಟ. ತುತ್ತು ಅನ್ನಕ್ಕಾಗಿ ಪರದಾಡುವವರೂ ಅದೃಷ್ಟ ಒಂದಿದ್ದರೆ ರಾತ್ರೋರಾತ್ರಿ ಕೋಟ್ಯಧಿಪತಿಗಳಾಗಿಬಿಡುತ್ತಾರೆ.

ಅಂಥದ್ದೇ ಒಂದು ಅದೃಷ್ಟ ಥಾಯ್ಲೆಂಡ್​ನ ಮಹಿಳೆಗೆ ಒದಗಿಬಂದಿದೆ. ಕೊಡ್ಚಕಾರ್ನ್ ತಂತಿವಿವಾಟ್ಕುಲ್ ಎಂಬ ಕಡು ಬಡವ ಮಹಿಳೆ ರಾತ್ರೋರಾತ್ರಿ ಶ್ರೀಮಂತ ಆಗಿರುವ ಘಟನೆ ಇದು.

ಅಷ್ಟಕ್ಕೂ ಆಗಿರುವುದು ಏನೆಂದರೆ ಕೊಡ್ಚಕಾರ್ನ್ ತಿನ್ನುವುದಕ್ಕಾಗಿ ಬಸವನಹುಳುಗಳನ್ನು ಖರೀದಿಸಿದ್ದಳು. ಈ ಭಾಗದಲ್ಲಿ ಬಸವನಹುಳುಗಳ ಸಾಂಬಾರ್​ ಮಾಡಿ ತಿನ್ನುವುದು ಮಾಮೂಲು. ಅದರಂತೆ ಆಕೆ 70 ಬಹತ್​ (ಸುಮಾರು 163 ರೂಪಾಯಿ) ಕೊಟ್ಟು ಬಸವನಹುಳುಗಳನ್ನು ಖರೀದಿಸಿದ್ದಳು.

ಅದನ್ನು ಆಕೆ ರಾತ್ರಿ ಸಾಂಬಾರ್​ ಮಾಡಲು ರೆಡಿ ಮಾಡುತ್ತಿದ್ದಳು. ಬಸವನಹುಳುಗಳನ್ನು ಕತ್ತರಿಸಿದಾಗ ಆಕೆಗೆ ಒಂದು ಬಸವನಚಿಪ್ಪಿನಲ್ಲಿ ಕಿತ್ತಳೆ ಬಣ್ಣದ ವಸ್ತು ಕಂಡಿತು. ಅದನ್ನು ನೋಡಿದಾಗ ಅವಳು ಅದನ್ನು ಹುಳುವಿನ ಮೇಲ್ಭಾಗದ ಶಂಕು ಎಂದುಕೊಂಡಿದ್ದಾಳೆ. ಆದರೆ ಅದು ಸ್ವಲ್ಪ ಭಿನ್ನವಾಗಿತ್ತು. ಸುಮಾರು 1.5 ಸೆಂಟಿಮೀಟರ್​ನಷ್ಟು ಇತ್ತು.

ನಂತರ ಅದನ್ನು ಅಕೆ ಪರಿಶೀಲಿಸಿದಾಗ ಇದು ಚಿಪ್ಪಲ್ಲ, ಬದಲಿಗೆ ಏನೋ ವಿಶೇಷ ವಸ್ತು ಎನ್ನುವುದು ತಿಳಿದಿದೆ. ನಂತರ ಅದನ್ನು ಆಕೆ ಪರಿಚಯದವರ ಬಳಿ ಪರೀಕ್ಷಿಸಿದಾಗ ಅದು ಮುತ್ತು ಎಂದು ತಿಳಿದಿದೆ. ನಂತರ ಅದರ ಬೆಲೆ ಒಂದು ಮಿಲಿಯನ್​ ಬಹತ್​ (ಅಂದರೆ ಸುಮಾರು 24 ಲಕ್ಷ ರೂಪಾಯಿ) ಎಂದು ತಿಳಿದದ್ದೇ ಆಕೆಗೆ ತಲೆತಿರುಗಿದಂತಾಗಿದೆ.

ಅದನ್ನು ಮಾರಿರುವ ಕೊಡ್ಚಕಾರ್ನ್, ತನ್ನ ತಂದೆಯ ಕ್ಯಾನ್ಸರ್​ ಚಿಕಿತ್ಸೆಗೆ ವಿನಿಯೋಗ ಮಾಡಿದ್ದಾಳೆ. ದುಡ್ಡು ಇಲ್ಲದೇ ತನ್ನ ತಂದೆಯನ್ನು ಕಳೆದುಕೊಳ್ಳುವ ಭೀತಿಯಲ್ಲಿದ್ದ ಈ ಯುವತಿಗೆ ಈ ಮುತ್ತು ವರದಾನವಾಗಿ ಪರಿಣಮಿಸಿದೆ. ನಾನು ತಂದೆಯ ಚಿಕಿತ್ಸೆಗಾಗಿ ಇಷ್ಟು ಹಣ ಹೇಗೆ ಹೊಂದಿಸುವುದು ಎಂಬ ಚಿಂತೆಯಲ್ಲಿ ಇದ್ದೆ. ನಾವು ತೀರಾ ಕಡುಬಡವರು. ಆದರೆ ದೇವರ ದಯೆಯಿಂದ ಇಷ್ಟು ಸುಲಭದಲ್ಲಿ ನಮಗೆ ಹಣ ಸಿಕ್ಕಿದೆ ಎಂದು ಕಣ್ಣೀರಿಡುತ್ತಾರೆ ಕೊಡ್ಚಕಾರ್ನ್.

https://www.vijayavani.net/s-nandondukathe-yaranno-bayasiddavaru/

https://www.vijayavani.net/s-accident-near-nelluru-8-death/

https://www.vijayavani.net/s-cd-case-dkshi-and-cdlady/