ಮನೆಗೆ ಹೋದ್ರೂ ಬಾಸ್​ ಕಾಟ ತಪ್ತಿಲ್ವಾ? ಇಲ್ಲಿನ ಉದ್ಯೋಗಿಗಳಿಗೆ ಸೂಪರ್​​ ಪವರ್​ ಕೊಟ್ಟಿದೆ ಈ ದೇಶ!

ನವದೆಹಲಿ: ಪ್ರತಿನಿತ್ಯ 8 ಅಥವಾ 9 ತಾಸು ಉದ್ಯೋಗ ಮಾಡುವ ಉದ್ಯೋಗಿಗಳಿಗೆ ಕೆಲಸ ಮುಗಿಸಿ, ಮನೆಗೆ ವಾಪಾಸ್ ಬರುವುದರೊಳಗೆ ಜೀವನವೇ ಸಾಕು ಸಾಕಾಗಿ ಹೋಗಿರುತ್ತದೆ. ಬೆಳಗ್ಗೆ ಎದ್ದ ಕೂಡಲೇ ಇಡೀ ಜಗತ್ತಿನಲ್ಲಿ ಏನೇನಾಗಿದೆ ಎಂದು ಕಿರುಬೆರಳಿಗೆ ತಕ್ಷಣವೇ ಸಿಗುವ ಆನ್​ಲೈನ್​ ಸುದ್ದಿಗಳತ್ತ ಕಣ್ಣಾಯಿಸುತ, ಜಳಕ ಮಾಡಿ, ಮಾಡಿಟ್ಟ ತಿಂಡಿ ತಿಂದು, ಬಸ್​, ಕ್ಯಾಬ್ ಅಥವಾ ಖಾಸಗಿ ವಾಹನದಲ್ಲಿ ಆಫೀಸ್​ಗೆ ಬರುವಷ್ಟರಲ್ಲಿ ಮೈಯೆಲ್ಲಾ ಬೆವರು! ಇರಪ್ಪಾ ಸ್ವಲ್ಪ ಬೆವರೊರಿಸಿಕೊಂಡು ಕೆಲಸ ಶುರು ಮಾಡೋಣ ಎಂದು ಕಂಪ್ಯೂಟರ್​ ಮುಂದೆ ಕೂತದ್ದೇ ತಡ ಆಫೀಸ್​ನ ಕ್ಯಾಬಿನ್​ನಿಂದ ಬಾಸ್​ ಕೂಗು ಜೋರು. ಇವತ್ತು ಇಷ್ಟು ಕೆಲಸ ಮುಗಿಯಬೇಕು, ಎಲ್ಲವೂ ಆಗಬೇಕು. ಮನೆಗೆ ಹೋಗುವುದರೊಳಗೆ ಪೂರ್ಣಗೊಳಿಸಿ ನನಗೆ ಅಪ್ಡೇಟ್ ಮಾಡಬೇಕು ಎಂಬ ಗಡುವು ಮರೆಯಲು ಸಾಧ್ಯವೇ ಇಲ್ಲ.

ಇದನ್ನೂ ಓದಿ: ಮೊದಲ ನೋಟದಲ್ಲಿ ನಿಮಗೆ ಕಂಡಿದ್ದೇನು? ಈ ಫೋಟೋ ನೋಡಿ ನಿಮ್ಮ ಬಲ-ದೌರ್ಬಲ್ಯ ತಿಳಿದುಕೊಳ್ಳಿ!

ಬಾಸ್​ ಎಂದಾಕ್ಷಣ ಉದ್ಯೋಗಿಗಳಲ್ಲಿ ಭಯ, ಆತಂಕ ಮೂಡುವುದು ತೀರ ಸಹಜ. ಯಾಕಂದ್ರೆ, ನಿರ್ದಿಷ್ಟ 8-9 ಗಂಟೆಗಳ ಅವಧಿಯೊಳಗೆ ಕೊಟ್ಟ ಟಾರ್ಗೆಟ್​ ಮುಗಿಸಿಯೇ ಮನೆಯ ದಾರಿ ನೋಡಬೇಕು. ಇಲ್ಲವಾದರೆ, ಮನೆಗೆ ಹೋದರೂ ಬಾಸ್​ನ ಒತ್ತಡಗಳು ತಪ್ಪೋದಿಲ್ಲ. ಹೀಗಿದ್ದಾಗ ಅವರು ಗದರುವುದು ಸಾಮಾನ್ಯ. ಒಂದಷ್ಟು ಸಂಸ್ಥೆಗಳ ಬಾಸ್​ ಮಾತ್ರ ಬಹಳ ಸೌಜನ್ಯದಿಂದ, ಗದರದೆ, ಕೂಗದೆ ಮೃದು ಸ್ವಭಾವದಿಂದ ಉದ್ಯೋಗಿಗಳನ್ನು ಮಾತನಾಡಿಸಿ, ಕೆಲಸ ಮಾಡಿಸಿಕೊಳ್ಳುತ್ತಾರೆ. ಆದ್ರೆ, ಇನ್ನೂ ಕೆಲವರು ತಮ್ಮ ಮೇಲಿರುವವರ ಒತ್ತಡದಿಂದ ಏಕಾಏಕಿ ಕೆಲಸ ಮಾಡುವವರ ಮೇಲೆ ಕೋಪ ವ್ಯಕ್ತಪಡಿಸಿ, ಚೀರಾಡ್ತಾರೆ. ಇದು ಆಯಾ ಸಂಸ್ಥೆಗಳ ಬಾಸ್​ ಮತ್ತು ಉದ್ಯೋಗಿಗಳ ನಡುವಿನ ಬಾಂಧವ್ಯ ಅಥವಾ ಹೊಂದಾಣಿಕೆ ಎಂದು ಕರೆಯಬಹುದು.

ಕೆಲಸದ ಅವಧಿ ಮುಗಿದು ಮನೆಗೆ ಹೋದ ಮೇಲೆ ನಮಗೂ ಉದ್ಯೋಗಕ್ಕೂ ಸಂಬಂಧವಿಲ್ಲ. ಕಾರಣ, ಆಫೀಸ್​ನಲ್ಲಿ ಉದ್ಯೋಗ ನಿಮಿತ್ತ ಕೊಟ್ಟ ಸಮಯ ಮನೆಗೆ ಕೊಂಡೊಯ್ಯಲು ಅನೇಕರು ಬಯಸುವುದಿಲ್ಲ. ಆದ್ರೆ, ವಿಪರ್ಯಾಸ ಕೆಲವರಿಗೆ ಈ ಪದ್ಧತಿ ಇಷ್ಟವಿಲ್ಲ ಅಂದ್ರೂ ಸಹ ಜತೆಯಲ್ಲೇ ಬಂದಿರುತ್ತದೆ. ಆಫೀಸ್​ಗೆ ಬಂದು ಉದ್ಯೋಗ ಮಾಡಿ ಹೋದರೂ ಸಹ ಮನೆಗೆ ಹೋದ ಬಳಿಕವೂ ಬಾಸ್​ ಫೋನ್​ ಕಾಲ್​ನಲ್ಲಿ ಹೇಳಿದ್ದನ್ನು ಮಾಡುತ್ತಿರುತ್ತಾರೆ. ಈ ರೀತಿ ಹಲವೆಡೆ ಇಂದಿಗೂ ಕೂಡ ನಡೆಯುತ್ತಿದೆ. ಕೆಲಸದ ಸಮಯವನ್ನು ಹೊರತುಪಡಿಸಿಯೂ ಕಂಪೆನಿಯ ಬಾಸ್​ಗಳು ತಮ್ಮ ಉದ್ಯೋಗಿಗಳಿಗೆ ಕರೆ ಮಾಡಿ, ಈ ಕೆಲಸವನ್ನು ಇಂದೇ ಮುಗಿಸಿಕೊಡಿ, ಪೂರ್ಣಗೊಳಿಸಿ ಅರ್ಜೆಂಟ್​ ಇದೆ ಎಂದು ಆದೇಶಿಸುತ್ತಾರೆ. ಇದನ್ನು ಗಂಭೀರ ಸಮಸ್ಯೆ ಎಂದು ಪರಿಗಣಿಸಿರುವ ಆಸ್ಟ್ರೇಲಿಯಾ, ತಮ್ಮ ದೇಶದ ಉದ್ಯೋಗಿಗಳಿಗಾಗಿ ಹೊಸ ಕಾನೂನನ್ನು ಜಾರಿಗೊಳಿಸಿದೆ.

ಇದನ್ನೂ ಓದಿ: ನಾನು ಆ ಸಿನಿಮಾದಲ್ಲಿ ಸರಿಯಾಗಿ ನಟಿಸಲಿಲ್ಲ! ಸೂಪರ್​ ಸ್ಟಾರ್​ ರಜಿನಿಕಾಂತ್​ ಅಚ್ಚರಿ ಹೇಳಿಕೆ

ಕೆಲಸ ಸಂಬಂಧಿತ ಮಾನಸಿಕ ಆರೋಗ್ಯ ಸಮಸ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು ತರಲಾದ ಹೊಸ ಕಾನೂನಿನ ಪ್ರಕಾರ, ಆಸ್ಟ್ರೇಲಿಯಾದ ಉದ್ಯೋಗಿಗಳು ಕೆಲಸದ ಸಮಯದ ನಂತರ ತಮ್ಮ ಬಾಸ್​ಗಳ ಕರೆ ಅಥವಾ ಆದೇಶಗಳನ್ನು ಸುತರಾಮ್​ ನಿರ್ಲಕ್ಷಿಸಬಹುದು. 2009ರ ಫೇರ್ ವರ್ಕ್ ಕಾಯ್ದೆ ತಿದ್ದುಪಡಿ ಮಾಡುವ ಫೇರ್ ವರ್ಕ್ ತಿದ್ದುಪಡಿ (ಸಂಪರ್ಕ ಕಡಿತಗೊಳಿಸುವ ಹಕ್ಕು) ಕಾಯಿದೆಯು ಈ ವರ್ಷದ ಆರಂಭದಲ್ಲಿ ಸಂಸತ್ತಿನಲ್ಲಿ ಪಾಸ್​ ಆಗಿತ್ತು. ಅದರ ಅನ್ವಯ ಇದೇ ಆಗಸ್ಟ್ 26ರಿಂದ ಈ ನಿಯಮ ಜಾರಿಗೆ ಬರಲಿದೆ.

'ರೈಟ್​ ಟು ಡಿಸಕನೆಕ್ಟ್'​ ಕಾಯ್ದೆಯ ಅಡಿ ಅಂದ್ರೆ 'ಸಂಪರ್ಕ ಕಡಿತಗೊಳಿಸುವ ಹಕ್ಕು' ಮೂಲಕ ಉದ್ಯೋಗಿಗಳು ಕೆಲಸದ ಸಮಯವಲ್ಲದ ವೇಳೆ ಬಾಸ್​ನ ಕರೆ ಅಥವಾ ಸಂದೇಶವನ್ನು ತಿರಸ್ಕರಿಸಬಹುದಾಗಿದೆ. ಆದಾಗ್ಯೂ, ಇತರ ಅಂಶಗಳ ನಡುವೆ ಅವರ ಪಾತ್ರ, ಸಂಪರ್ಕದ ಕಾರಣ ಮತ್ತು ಅದನ್ನು ಹೇಗೆ ಮಾಡಲಾಗಿದೆ ಎಂಬುದರ ಆಧಾರದ ಮೇಲೆ ಉದ್ಯೋಗಿ ಬಾಸ್​ ಆದೇಶಗಳನ್ನು ನಿರಾಕರಿಸುವ ಹಕ್ಕನ್ನು ಈ ಕಾಯ್ದೆಯಡಿ ಅನುಮತಿಸಲಾಗುತ್ತದೆ.

ಇದನ್ನೂ ಓದಿ: ರಾತ್ರಿ ಹೊತ್ತು ನಿಮಗೆ ಸರಿಯಾಗಿ ನಿದ್ರೆ ಬರುತ್ತಿಲ್ಲವೇ? ಇಲ್ಲಿವೆ ನೋಡಿ 3 ಪ್ರಮುಖ ಕಾರಣ…

ಕಾನೂನಿನ ಪ್ರಕಾರ, ನೌಕರನ ನಿರಾಕರಣೆ ಅಸಮಂಜಸವಾಗಿದೆಯೇ ಎಂದು ನಿರ್ಧರಿಸುವಾಗ ಕೆಲವು ಅಂಶಗಳನ್ನು ಪರಿಗಣಿಸಲಾಗುತ್ತದೆ. ಇದಕ್ಕೆ ಕಾರಣವೂ ಇದೆ. ಈ ನಿಯಮವನ್ನು ಬಳಸಿಕೊಂಡು ಕೆಲವು ಉದ್ಯೋಗಿಗಳು ತಮ್ಮ ಬಾಸ್​ಗಳ ವಿರುದ್ಧ ಸುಖಾಸುಮ್ಮನೆ ಆರೋಪಗಳನ್ನು ಮಾಡಬಹುದು. ಹೀಗಿರುವಾಗ ಇಂತಹ ಪ್ರಕರಣಗಳನ್ನು ಗಮನದಲ್ಲಿಟ್ಟುಕೊಂಡು ಈ ಕಾಯ್ದೆಯನ್ನು ಜಾರಿಗೊಳಿಸಲಾಗಿದೆ.

ಕೆಲಸದ ಅವಧಿ ಮುಗಿದ ಬಳಿಕ ಉದ್ಯೋಗಿಗಳು ತಮ್ಮ ಮೊಬೈಲ್​ ಫೋನ್​ಗಳನ್ನು ಸ್ವಿಚ್ ಆಫ್ ಮಾಡುವ ಹಕ್ಕನ್ನು ಫ್ರಾನ್ಸ್, ಬೆಲ್ಜಿಯಂ, ಇಟಲಿ, ಅರ್ಜೆಂಟೀನಾ, ಚಿಲಿ, ಲಕ್ಸೆಂಬರ್ಗ್, ಮೆಕ್ಸಿಕೋ, ಫಿಲಿಪೈನ್ಸ್, ರಷ್ಯಾ, ಸ್ಲೋವಾಕಿಯಾ, ಸ್ಪೇನ್, ಒಂಟಾರಿಯೊ ಮತ್ತು ಐರ್ಲೆಂಡ್‌ ದೇಶಗಳು ಈಗಾಗಲೇ ಜಾರಿಗೊಳಿಸಿವೆ. ಈ ಕಾನೂನುಗಳು ಪ್ರಸ್ತುತ ಚಾಲ್ತಿಯಲ್ಲಿವೆ,(ಏಜೆನ್ಸೀಸ್).

https://www.vijayavani.net/this-three-indian-cricketers-who-strictly-avoid-alcohol

https://www.vijayavani.net/this-is-shocking-actress-trolled-for-look