ಇದಕ್ಕೆ ಇನ್ನೂ ಒಂದು ಮುಖವಿದೆ. ಅದೆಂದರೆ, ರಾಜಕೀಯ ಪಕ್ಷಗಳು ಕಾರ್ಯಕರ್ತರು-ನಾಯಕರನ್ನು ತಯಾರು ಮಾಡುವ ವಿಧಾನ ಹಾಗೂ ವಿವಿಧ ಚುನಾವಣೆಗಳಲ್ಲಿ ಟಿಕೆಟ್ ನೀಡುವ ಪದ್ಧತಿಯೂ ಮುಖ್ಯವಾಗುತ್ತದೆ. ಹಣ ಹಾಗೂ ತೋಳ್ಬಲ ಇರುವವರು ಮಾತ್ರ ಚುನಾವಣೆಗೆ ಸ್ಪರ್ಧಿಸಬಹುದು ಎಂಬ ವಾತಾವರಣ ನಿರ್ವಣವಾಗಿದೆ. ಹೀಗಾಗಿ ಆಸಕ್ತಿ ಮತ್ತು ಪ್ರತಿಭೆ ಇದ್ದರೂ ಎಷ್ಟೋ ಮಂದಿ ಅವಕಾಶವಂಚಿತರಾಗಿ, ಕೊನೆಗೆ ವ್ಯವಸ್ಥೆಯ ಬಗ್ಗೆ ಭ್ರಮನಿರಸನ ಹೊಂದುವುದನ್ನು ಕಾಣುತ್ತಿದ್ದೇವೆ. ಇದರಿಂದಾಗಿ, ರಾಜಕೀಯಾಸಕ್ತಿ ಇದ್ದರು ಸಹ ಇತರ ಕ್ಷೇತ್ರಗಳವರು ಇತ್ತ ಮುಖಹಾಕಲು ಹಿಂಜರಿಯುವ ಸನ್ನಿವೇಶ ಇದೆ. ಹೀಗಾಗಿ, ರಾಜಕೀಯ ಪಕ್ಷಗಳ ಚಿಂತನೆ ಹಾಗೂ ಕಾರ್ಯವಿಧಾನದಲ್ಲಿ ಸಹ ಕೆಲ ಮೂಲಭೂತ ಬದಲಾವಣೆಗಳು ಆಗಬೇಕಾದ ಅಗತ್ಯವಿದೆ. ಗುಣಕ್ಕೆ ಮಣೆ ಹಾಕುವ ಸಂಪ್ರದಾಯ ಚಾಲ್ತಿಗೆ ಬಂದರೆ; ಚುನಾವಣೆಗಳಲ್ಲಿ ಟಿಕೆಟ್ ನೀಡುವಾಗ ಅರ್ಹತೆಗೆ ಆದ್ಯತೆ ನೀಡಿದರೆ ಆಡಳಿತ ಹಾಗೂ ಸಾರ್ವಜನಿಕ ರಂಗದಲ್ಲಿ ಒಂದಷ್ಟು ಭಿನ್ನ ವಾತಾವರಣ ನಿರೀಕ್ಷಿಸಬಹುದಾಗಿದೆ.
