ಅಕ್ರಮ ನುಸುಳುವಿಕೆಯಲ್ಲಿ ಪಾಕಿಸ್ತಾನವನ್ನು ಮೀರಿಸುತ್ತಿರುವ ಚೀನಾ? ಗಡಿಯಲ್ಲಿ ಸೇನೆ ಜಮಾವಣೆ

ನವದೆಹಲಿ: ಗಡಿ ವಿಚಾರಕ್ಕೆ ಬಂದಾಗ ಭಾರತಕ್ಕೆ ಪಾಕಿಸ್ತಾನದ ತಂಟೆ ತಕರಾರುಗಳೇ ಜಾಸ್ತಿ. ಗಡಿಯೊಳಕ್ಕೆ ನುಗ್ಗಿ ಅಧಿಪತ್ಯ ಸಾಧಿಸುವುದಕ್ಕಿಂತಲೂ ಭಯೋತ್ಪಾದನಾ ಚಟುವಟಿಕೆಗಳಿಗೆ ಕುಮ್ಮಕ್ಕು ನೀಡುವುದೇ ಪಾಕ್​ನ ಉದ್ದೇಶ.

ಇನ್ನೊಂದೆಡೆ, ಪಾಕಿಸ್ತಾನವನ್ನು ಮೀರಿಸುವಂತೆ ಭಾರತದ ಗಡಿಯಲ್ಲಿ ಹಸ್ತಕ್ಷೇಪ ನಡೆಸುತ್ತಿದೆ ಚೀನಾ. ಕೆಲ ದಿನಗಳಿಂದ ಲಡಾಖ್​ನ ಮೂರು ಪ್ರದೇಶಗಳಿಗೆ ನುಗ್ಗಿ ಸೇನಾ ಜಮಾವಣೆ ಮಾಡಿದೆ.

ಕಳೆದ ಕೆಲ ದಿನಗಳಿಂದ ಭಾಗಶಃ ಭಾರತದ ನಿಯಂತ್ರಣದಲ್ಲಿರುವ ಪೆನ್​ಗಾಂಗ್​ ತ್ಸೊ ಸರೋವರ, ಗಾಲ್ವನ್​ ಪ್ರದೇಶಗಳಲ್ಲಿ 2-3 ಕಿ.ಮೀ. ಅಂತರದಲ್ಲಿ ಚೀನಾ ಪಡೆಗಳು ಭಾರತದೊಳಕ್ಕೆ ನುಗ್ಗಿವೆ. ಮೂರು ಸ್ಥಳಗಳಲ್ಲಿ 800-1000 ಚೀನಿ ಸೈನಿಕರು ಜಮಾವಣೆಗೊಂಡಿದ್ದಾರೆ

ಇದನ್ನೂ ಓದಿ; ಪರಮಾಣು ಪರೀಕ್ಷೆಗೆ ಸಜ್ಜಾಗುತ್ತಿದೆಯೇ ಅಮೆರಿಕ? 

ಟೆಂಟ್​ಗಳನ್ನು ಹೂಡಿರುವ ಚೀನಿಯರು, ಭಾರಿ ವಾಹನಗಳೊಂದಿಗೆ ಬೀಡುಬಿಟ್ಟಿದ್ದಾರೆ. ಮಾತ್ರವಲ್ಲದೇ, ಕಣ್ಗಾವಲು ಸಾಧನಗಳನ್ನು ಹೊಂದಿದ್ದಾರೆ. ಈ ಹಿನ್ನೆಲೆಯಲ್ಲಿ ಭೂಸೇನಾ ಮುಖ್ಯಸ್ಥ ಎಂ.ಎಂ. ನರವಾಣೆ ಉತ್ತರ ಲಡಾಖ್​ನಲ್ಲಿರುವ ಸೇನಾ ಕಚೇರಿಗೆ ಭೇಟಿ ನೀಡಿ ಪರಿಸ್ಥಿತಿಯ ಅವಲೋಕನ ನಡೆಸಿದ್ದಾರೆ.

ಚೀನಿ ಸೇನಾಪಡೆಗೆ ಎದುರಾಗಿ ಭಾರತೀಯ ಯೋಧರು ಕೂಡ ಕೊಂಚ ದೂರದಲ್ಲಿ ಬೀಡುಬಿಟ್ಟಿದ್ದಾರೆ. ಆದರೆ, ಮುಖಾಮುಖಿಯಾಗಿಲ್ಲ ಮೇ 5 ಹಾಗೂ 6ರಂದು ನಡೆದಿದ್ದ ಮುಖಾಮುಖಿಯಲ್ಲಿ ಎರಡೂ ಕಡೆಯ ಕೆಲ ಯೋಧರು ಗಾಯಗೊಂಡಿದ್ದ ಕಾರಣ, ಅನಗತ್ಯ ಯುದ್ದೋನ್ಮಾದವನ್ನು ತಡೆಗಟ್ಟುವ ಉದ್ದೇಶದಿಂದ ಮುಖಾಮುಖಿಯಾಗಿಲ್ಲ ಎಂದು ಹೇಳಲಾಗಿದೆ. ಆದರೆ, ಯಾವುದೇ ಪರಿಸ್ಥಿತಿಯನ್ನಾದರೂ ಎದುರಿಸಲು ಭಾರತೀಯ ಸೇನೆಯೂ ಸಜ್ಜಾಗಿದೆ. ಕಳೆದ ಕೆಲ ದಿನಗಳಲ್ಲಿ ಎರಡು ಕಡೆಯ ಕಮಾಂಡರ್​ಗಳು ಐದು ಸುತ್ತಿನ ಮಾತುಕತೆ ನಡೆಸಿದ್ದರು. 80 ಕಿ.ಮೀ. ಗಡಿಯುದ್ದಕ್ಕೂ ಪರಿಸ್ಥಿತಿ ಸಹಜವಾಗಿಲ್ಲ ಎಂದು ಹೇಳಲಾಗಿದೆ.

ಇದನ್ನೂ ಓದಿ; ಮತ್ತೊಂದು ಸುತ್ತಿನ ಸೀಲ್​ ​ಡೌನ್​ ಬರುತ್ತಾ? ವಿಶ್ವ ಆರೋಗ್ಯ ಸಂಸ್ಥೆ ಸೂಚನೆ ಪಾಲಿಸಿದರೆ ಏಳು ರಾಜ್ಯಗಳು ಸಂಪೂರ್ಣ ಬಂದ್​?

ಕಳೆದ ನಾಲ್ಕು ತಿಂಗಳಲ್ಲಿ ವಾಸ್ತವ ಗಡಿ ನಿಯಂತ್ರಣ ರೇಖೆಯಲ್ಲಿ ಚೀನಾ ಕನಿಷ್ಠ 170 ಬಾರಿ ಭಾರತದ ಗಡಿಯೊಳಗೆ ಅಕ್ರಮ ಪ್ರವೇಶ ಮಾಡಿದೆ. ಅದರಲ್ಲೂ ಲಡಾಖ್​ನಲ್ಲಿಯೇ 130 ಬಾರಿ ಈ ಕೃತ್ಯ ನಡೆಸಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 110 ಬಾರಿ ಇಂಥ ದುಸ್ಸಾಹಸ ನಡೆಸಿತ್ತು.

ಕಳೆದ ವರ್ಷ ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಚೀನಾ ಅಧ್ಯಕ್ಷ ಕ್ಸಿ ಜಿನ್​ಪಿಂಗ್​ ಬಿಷ್ಟೇಕ್​ ಹಾಗೂ ಮಹಾಬಲಿಪುರಂನಲ್ಲಿ ಮುಖಾಮುಖಿಯಾಗಿದ್ದರು. ಹೀಗಿದ್ದರೂ ಚೀನಾ 2019ರಲ್ಲಿ 663 ಬಾರಿ ಅತಿಕ್ರಮಣ ನಡೆಸಿತ್ತು. 2018ಕ್ಕೆ ಹೋಲಿಸಿದಲ್ಲಿ ಭಾರಿ ಹೆಚ್ಚಾಗಿತ್ತು. ಆ ವರ್ಷ 404 ಬಾರಿ ಗಡಿಯೊಳಕ್ಕೆ ನುಸುಳಿತ್ತು. 2015ರಿಂದ ಈಚೆಗೆ ಗಮನಿಸಿದರೆ, ಲಡಾಖ್​ ಪ್ರದೇಶದಲ್ಲಿ ಚೀನಿಯರು ಹೆಚ್ಚು ದುಷ್ಕೃತ್ಯಕ್ಕೆ ಇಳಿದಿರುವುದು ಗೊತ್ತಾಗುತ್ತದೆ.

ಭಾರತೀಯ ಗಡಿಯಲ್ಲಿ ರಸ್ತೆ ಹಾಗೂ ಇತರ ಮೂಲಸೌಕರ್ಯಗಳನ್ನು ಹೆಚ್ಚು ಮಾಡಿರುವುದು ಚೀನಾದ ಕೆಂಗಣ್ಣಿಗೆ ಕಾರಣವಾಗಿದೆ. ಜತೆಗೆ, ವಿವಾದಗಳಿಲ್ಲದ ಪ್ರದೇಶಗಳಲ್ಲಿ ನುಗ್ಗಿ ತನ್ನದೇ ಜಾಗವೆಂದು ಹೇಳಿಕೊಳ್ಳುವ ಬುದ್ಧಿಯೂ ಚೀನಾದ್ದಾಗಿದೆ ಎಂದು ವಿಶ್ಲೇಷಿಸಲಾಗಿದೆ.

https://www.vijayavani.net/indian-company-could-be-worlds-door-to-a-covid19-vaccine/