ಬೆಂಗಳೂರು: ಲೋಕಸಭೆ ಚುನಾವಣೆ ಅಭ್ಯರ್ಥಿಗಳನ್ನು ಅಂತಿಮಗೊಳಿಸಲು ಸರ್ಕಸ್ ನಡೆಸುತ್ತಿರುವ ರಾಜ್ಯ ಕಾಂಗ್ರೆಸ್ ಹಾಗೂ ಬಿಜೆಪಿಗೆ ವಿಭಿನ್ನ ಸಮಸ್ಯೆ, ಸವಾಲುಗಳು ಬೆನ್ನೇರಲಾರಂಭಿಸಿದೆ. ಕೈಪಡೆಗೆ ರಾಜಧಾನಿ ಬೆಂಗಳೂರು ಸೇರಿದಂತೆ ಐದಾರು ಕ್ಷೇತ್ರಗಳಲ್ಲಿ ಅಭ್ಯರ್ಥಿಗಳ ಕೊರತೆ ಕಾಡುತ್ತಿದ್ದರೆ, ಟಿಕೆಟ್ ಕೈತಪು್ಪವವರ ಮುನಿಸು ಬಿಜೆಪಿಯಲ್ಲಿ ಜ್ವಾಲಾಗ್ನಿ ಸ್ಪೋಟಗೊಳ್ಳುವ ಸುಳಿವು ಬಹಿರಂಗಪಡಿಸಿದೆ. ಮೈಸೂರು, ಚಿಕ್ಕಮಗಳೂರು- ಉಡುಪಿ, ದಕ್ಷಿಣ ಕನ್ನಡ, ಹಾವೇರಿ, ಬೀದರ್ ಕ್ಷೇತ್ರ ಬಿಜೆಪಿಗೆ ಕಗ್ಗಂಟಾಗಿದೆ. ಮೈಸೂರು ಟಿಕೆಟ್ ಯಾರಿಗೆಂಬ ವಿಚಾರ ಸಾರ್ವತ್ರಿಕ ಚರ್ಚೆಗೊಳಪಟ್ಟಿರುವ ನಡುವೆಯೇ ಬಹಿರಂಗ ಅಸಮಾಧಾನದ ಕೆಂಡ ಕಮಲದಲ್ಲಿ ಕಂಪನ ಎಬ್ಬಿಸಿದೆ. ಹೀಗಾಗಿಯೇ ಸಂಸದ ಪ್ರತಾಪ್ ಸಿಂಹ ಅವರನ್ನು ಕರೆಸಿಕೊಂಡ ಚುನಾವಣಾ ಉಸ್ತುವಾರಿ ಖಡಕ್ ಸೂಚನೆ ನೀಡಿ ಕಳಿಸಿದ್ದಾರೆ. ಮತ್ತೊಂದೆಡೆ ಮಾಜಿ ಸಚಿವ ಸಿ.ಟಿ ರವಿ ಅವರನ್ನು ದೆಹಲಿಗೆ ಕರೆಸಿ ಕೊಂಡಿರುವ ನಾಯಕರು ತಿಳಿಹೇಳಿದ್ದಾಗಿ ತಿಳಿದು ಬಂದಿದೆ. ಇನ್ನು ಕಾಂಗ್ರೆಸ್ನದ್ದೇ ಮತ್ತೊಂದು ವಿಚಿತ್ರ ಸಮಸ್ಯೆ. ಯುದ್ಧಕಾಲೇ ಶಸ್ತ್ರಾಭ್ಯಾಸ ಎಂಬಂತೆ ಚುನಾವಣೆ ದಿನಾಂಕ ಘೋಷಣೆ ಆಗುವ ಹೊತ್ತಲ್ಲಿ ಸಮರ್ಥ ಅಭ್ಯರ್ಥಿಗಾಗಿ ಪರದಾಟ ನಡೆಸಿದೆ. ‘ನೀವು ಸ್ಪರ್ಧಿಸಿ... ನೀವು ಸ್ಪರ್ಧಿಸಿ’ ಅಂತ ನಾಯಕರ ಎಡತಾಕುತ್ತಿರುವ ಬೆಳವಣಿಗೆಗಳು ನಡೆದಿವೆ.
