ಕಿಂಗ್ಸ್ಟನ್: ಒಮ್ಮಿಂದೊಮ್ಮೆಗೆ 710 ಕೋಟಿ ರೂಪಾಯಿಗೂ ಅಧಿಕ ಮೊತ್ತ ಲಾಟರಿ ಬಹುಮಾನ ನಿಮ್ಮದಾದರೆ ನೀವೇನು ಮಾಡ್ತಿದ್ರಿ? – ಸಂತೋಷ, ಸಂಭ್ರಮಗಳಿಂದ ಕಿರುಚಿ, ಕೂಗಾಡಿ ಸುತ್ತಮುತ್ತ ಇದ್ದವರಿಗೆಲ್ಲ ಹೇಳಿ ಕುಣಿದು ಕುಪ್ಪಳಿಸ್ತಿದ್ರಿ ಅಲ್ವಾ? ಆದರೆ, ನಿಜವಾಗಿಯೂ 95 ದಶಲಕ್ಷ ಡಾಲರ್ (ಅಂದಾಜು 710 ಕೋಟಿ ರೂಪಾಯಿಗೂ ಹೆಚ್ಚು) ಗೆದ್ದ ವ್ಯಕ್ತಿ ನಡೆದುಕೊಂಡ ರೀತಿ ಜಗತ್ತಿನ ಗಮನಸೆಳೆದಿದೆ.
ಲೊಟ್ಟೊ ಲಾಟರಿ ಗೆದ್ದು 710 ಕೋಟಿ ರೂಪಾಯಿಗೂ ಅಧಿಕ ಹಣವನ್ನು ಗೆದ್ದ ವ್ಯಕ್ತಿಯೊಬ್ಬ ಗುರುತು ಮರೆಮಾಚಿ ಬಹುಮಾನದ ಚೆಕ್ ಸ್ವೀಕರಿಸಿ ಗಮನಸೆಳೆದಿದ್ದಾರೆ! ಜಮೈಕಾದ ಸುಪ್ರೀಂ ವೆಂಚರ್ಸ್ ಗ್ರೂಪ್ ತನ್ನ ಫೇಸ್ಬುಕ್ ಪೇಜ್ನಲ್ಲಿ ಈ ಬಹುಮಾನ ವಿತರಣೆ ಕಾರ್ಯಕ್ರಮದ ಫೋಟೊಗಳನ್ನೂ ಅಪ್ಲೋಡ್ ಮಾಡಿದೆ.
ಇದನ್ನೂ ಓದಿ: ಮೊದಲ ಬ್ಯಾಚ್ನ 5 ರಫೆಲ್ ಜೆಟ್ಗಳು ಜುಲೈ ಅಂತ್ಯಕ್ಕೆ ಸೇನೆ ಸೇರ್ಪಡೆ
ಆ ವ್ಯಕ್ತಿಯ ಹೆಸರು ಡಬ್ಲ್ಯು ಬ್ರೌನ್. ಜಮೈಕಾದ ಪ್ರಜೆಯೇ. ಬ್ರೌನ್ ಈ ತಿಂಗಳ ಆರಂಭದಲ್ಲಿ ಮೇ ಪೆನ್ನಲ್ಲಿರುವ ಡಿ ಎಂಡ್ಸ್ ಸ್ಪೋರ್ಟ್ ಬಾರ್ನಿಂದ ಲೊಟ್ಟೊ ಟಿಕೆಟ್ ಖರೀದಿಸಿದ್ದರು. ಆ ಟಿಕೆಟ್ಗಳ ನಂಬರ್ 08,09,10, 19,27 ಮತ್ತು 30 ಆಗಿತ್ತು. ಇದರಲ್ಲೊಂದು ಟಿಕೆಟ್ಗೆ ಬಹುಮಾನ ಬಂದಿತ್ತು.
ಇದನ್ನೂ ಓದಿ: ಅಮ್ಮಾ…. ಒಮ್ಮೆ ನಿನ್ನ ಕಣ್ತುಂಬಿಕೊಂಡು ಬಿಡುವೆ: ಐಸಿಯು ಕಿಟಕಿ ಬಳಿ ಕುಳಿತ ಪ್ಯಾಲೆಸ್ತೈನ್ ಯುವಕನ ಕಣ್ಣೀರ ಕಥೆ
ಬಹುಮಾನದ ಹಣ ಸಾರ್ವಜನಿಕವಾಗಿ ತೆಗೆದುಕೊಳ್ಳುವಾಗ ಗುರುತು ಬಹಿರಂಗವಾದರೆ ತೊಂದರೆಯಾದೀತು ಎಂದು ಆತ ಡಾರ್ತ್ ವಡೆರ್ ಉಡುಪು ಧರಿಸಿ ವೇದಿಕೆಗೆ ಬಂದ. ಸಾಮಾನ್ಯನೊಬ್ಬ ದಿಢೀರ್ ಶ್ರೀಮಂತನಾದಾಗ ಉಂಟಾಗಬಹುದಾದ ತೊಂದರೆಗಳನ್ನು ಮೊದಲೇ ಊಹಿಸಿಕೊಂಡ ಕಾರಣ ಈ ರೀತಿ ನಡೆದುಕೊಂಡೆ ಎಂದು ಬ್ರೌನ್ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)