ಹೊಸ ಯುಗಕ್ಕೆ ನಾಂದಿ: ಸುಪ್ರೀಂ ಕೋರ್ಟ್ನ ಈ ನಿರ್ದೇಶನ ಭಾರತದಲ್ಲಿ ಆನ್ಲೈನ್/ವರ್ಚುವಲ್ ಕೋರ್ಟ್ ವಿಚಾರಣೆಗಳ ಯುಗಕ್ಕೆ ನಾಂದಿ ಹಾಡಿದೆ. ಸಾಂಕ್ರಾಮಿಕತೆಗಿಂತ ಮುಂಚಿನ ಖುದ್ದು/ದೈಹಿಕ ಹಾಜರಿಯ (ಫಿಸಿಕಲ್) ಕೋರ್ಟ್ ವಿಚಾರಣೆ ಒಂದು ದುರಂತದಂತಿದ್ದವು. ಸಾಮಾನ್ಯ ದಿನದಂದೇ ಸಣ್ಣ ಕೋರ್ಟ್ ಹಾಲ್ನಲ್ಲಿ ಹತ್ತಾರು ವಕೀಲರು, ನ್ಯಾಯಾಂಗ ಅಧಿಕಾರಿ-ಸಿಬ್ಬಂದಿ, ನ್ಯಾಯಾಧೀಶರು, ಕಕ್ಷಿದಾರರು ಆದಿಯಾಗಿ ಬಹಳಷ್ಟು ಜನರು ಕಿಕ್ಕಿರಿದು ಸೇರಿ ನ್ಯಾಯದ ನಿರೀಕ್ಷೆಯಲ್ಲಿ ಇರುತ್ತಿದ್ದರು. ಒಂದೇ ದಿನ ಹಲವು ಪ್ರಕರಣಗಳನ್ನು ಪಟ್ಟಿ ಮಾಡಲಾಗುತ್ತಿತ್ತು. ಆದರೆ ಸಮಯ ನಿಗದಿಪಡಿಸದಿರುವುದರಿಂದ ಎಲ್ಲರೂ ಬೆಳಗ್ಗೆಯೇ ಕೋರ್ಟ್ ಹಾಲ್ಗೆ ಹಾಜರಾಗಿ ತಮ್ಮ ಸರದಿಗಾಗಿ ಚಾತಕಪಕ್ಷಿಯಂತೆ ಕಾಯುತ್ತಿದ್ದರು. ಸಾಮಾಜಿಕ ಅಂತರ ನಿಯಮ ಕಾಯ್ದುಕೊಳ್ಳಲು ಬೇಕಾದಷ್ಟು ಜಾಗ ಬಿಡಿ, ಜನರು ನಿಂತು ಕೊಳ್ಳಲೂ ಸ್ಥಳಾವಕಾಶ ಇರದೆ ಪರದಾಡುವುದು ಸಾಮಾನ್ಯ ದೃಶ್ಯ.
