ಫೈನಾನ್ಸ್ ಪಂಗನಾಮ!

ಕೀರ್ತಿನಾರಾಯಣ ಸಿ. ಬೆಂಗಳೂರು: ಸಾಲದ ಕಂತು ಪಾವತಿಸಲಾಗದೆ ಜಪ್ತಿಯಾಗುವ ಖಾಸಗಿ ಬಸ್​ಗಳಿಗೆ ಬೇರೊಂದು ನಂಬರ್ ಪ್ಲೇಟ್ ಹಾಗೂ ಚಾಸ್ಸಿ ನಂಬರ್ ಅಳವಡಿಸಿ, ಸಂಚರಿಸುತ್ತಿರುವ ಅಪಾಯಕಾರಿ ವಿಚಾರ ಬೆಳಕಿಗೆ ಬಂದಿದೆ. ಕೆಲ ಬ್ಯಾಂಕ್ ಹಾಗೂ ಫೈನಾನ್ಸ್ ಕಂಪನಿಗಳ ಕಳ್ಳಾಟದಿಂದಾಗಿ ಸರ್ಕಾರದ ಖಜಾನೆಗೆ ಸೇರಬೇಕಾದ ಕೋಟ್ಯಂತರ ರೂಪಾಯಿ ತೆರಿಗೆ ವಂಚನೆಯಾಗುವುದರ ಜತೆಗೆ ಜನರ ಜೀವಕ್ಕೂ ಕುತ್ತು ತಂದಿದೆ.

ಸೀಜ್ ಮಾಡಿದ ಬಸ್​ಗಳನ್ನು ಫೈನಾನ್ಸ್ ಕಂಪನಿಗಳು ಮಧ್ಯವರ್ತಿಗಳ ಮುಖಾಂತರ ಕಾನೂನು ಬಾಹಿರವಾಗಿ ಬೇರೊಬ್ಬರಿಗೆ ಮಾರಾಟ ಮಾಡುತ್ತವೆ. ಹೀಗೆ ಖರೀದಿಸಿದವರು ತಮ್ಮ ಹಳೇ ವಾಹನದ ನಂಬರ್ ಅಥವಾ ನಕಲಿ ನಂಬರ್ ಪ್ಲೇಟ್ ಹಾಕಿಕೊಂಡು ಓಡಿಸುತ್ತಾರೆ. ಬಸ್​ಗಳ ಅಕ್ರಮ ಓಡಾಟದಿಂದಾಗಿ ಸರ್ಕಾರಕ್ಕೆ ತೆರಿಗೆ ಬರುವುದಿಲ್ಲ. ಒಂದು ವೇಳೆ ಬಸ್ ಅಪಘಾತಕ್ಕೀಡಾದರೆ ಅದರಲ್ಲಿರುವ ಪ್ರಯಾಣಿಕರಿಗೆ ವಿಮೆ ಪರಿಹಾರ ಸೌಲಭ್ಯವೂ ಸಿಗುವುದಿಲ್ಲ. ಆರ್​ಟಿಒ ಅಧಿಕಾರಿಗಳ ಪ್ರಕಾರ ರಾಜ್ಯದಲ್ಲಿರುವ ಒಟ್ಟು ಬಸ್​ಗಳಲ್ಲಿ ಶೇ.10ರಿಂದ ಶೇ.15 ಬಸ್​ಗಳು ತೆರಿಗೆ ವಂಚಿಸಿ, ಸಂಚರಿಸುತ್ತಿವೆ.

ಇದನ್ನೂ ಓದಿ: #TTDForSale ಟ್ವಿಟರ್​ನಲ್ಲಿ ಟ್ರೆಂಡಿಂಗ್​: ಅನುಪಯುಕ್ತ ಆಸ್ತಿ ಮಾರಾಟಕ್ಕೆ ಟಿಟಿಡಿ ತೀರ್ಮಾನ

ಬೆಂಗಳೂರಿನ ಕುಂಬಳಗೋಡು ಸಮೀಪದ ಗೋಣಿಪುರ ಮತ್ತು ಚುಂಚನಕುಪ್ಪೆ-ತಾವರೆಕೆರೆ ಬಳಿಯ ಪೆದ್ದನಪಾಳ್ಯದ ಯಾರ್ಡ್​ಗಳಲ್ಲಿ ನಿಲ್ಲಿಸಿದ್ದ 20 ಬಸ್​ಗಳನ್ನು ಗುರುವಾರ (ಮೇ 21) ಆರ್​ಟಿಒ ಅಧಿಕಾರಿಗಳು ವಿಶೇಷ ಕಾರ್ಯಾಚರಣೆ ನಡೆಸಿ ಜಪ್ತಿ ಮಾಡಿರುವುದು ಫೈನಾನ್ಸ್ ಸಂಸ್ಥೆಗಳ ಕಳ್ಳಾಟಕ್ಕೆ ಸಿಕ್ಕಿರುವ ಸಾಕ್ಷ್ಯವಾಗಿದೆ. ಇವು ಸಾಲದ ಕಂತು ಪಾವತಿಸದ ಹಿನ್ನೆಲೆಯಲ್ಲಿ ಫೈನಾನ್ಸ್ ಸಂಸ್ಥೆಗಳು ಜಫ್ತಿ ಮಾಡಿರುವ ಬಸ್​ಗಳಾಗಿದ್ದು, ಸಾರಿಗೆ ಇಲಾಖೆಗೆ 1.70 ಕೋಟಿ ರೂ. ತೆರಿಗೆ ಪಾವತಿ ಬಾಕಿ ಇದೆ.

ಸೀಜ್ ಆಗಲೆಂದೇ ಕಂತು ಕಟ್ಟಲ್ಲ!: 30 ಸೀಟಿನ ಬಸ್​ಗೆ 3 ತಿಂಗಳಿಗೆ 1 ಲಕ್ಷ ರೂ. ತೆರಿಗೆ ಪಾವತಿಸಬೇಕು. ವರ್ಷಕ್ಕೆ 4 ಲಕ್ಷ ರೂ. ಪಾವತಿಸಬೇಕು. 5 ವರ್ಷ ತೆರಿಗೆ ಪಾವತಿಸದಿದ್ದರೆ 20 ಲಕ್ಷ ರೂ. ಬಾಕಿಯಾಗುತ್ತದೆ. ಆಗ ವಾಹನ ಮುಟ್ಟುಗೋಲು ಹಾಕಿಕೊಳ್ಳಲಿ ಎಂದು ಕೆಲ ಪ್ರಕರಣಗಳಲ್ಲಿ ಮಾಲೀಕರೇ ಉದ್ದೇಶ ಪೂರ್ವಕವಾಗಿ ಸಾಲದ ಕಂತು ಪಾವತಿಸುವುದಿಲ್ಲ. ಫೈನಾನ್ಸ್ ಸಂಸ್ಥೆ ಜಪ್ತಿ ಮಾಡಿ ತೆಗೆದುಕೊಂಡು ಹೋದ ಬಳಿಕ ಮಾರಾಟ ಮಾಡಿದರೆ ತಾನು ಕೊಟ್ಟಿರುವ ಸಾಲದ ಮೊತ್ತವೂ ವಾಪಸ್ ಬರುವುದಿಲ್ಲ. ಇದೇ ಕಾರಣಕ್ಕೆ ಅಕ್ರಮವಾಗಿ ಮಾರಾಟ ಮಾಡುತ್ತಾರೆ ಎಂದು ಅಧಿಕಾರಿಗಳು ಹೇಳುತ್ತಾರೆ.

ಇದನ್ನೂ ಓದಿ: ಕ್ವಾರಂಟೈನ್​ನಲ್ಲಿದ್ದ ಗೆಳೆಯನಿಗೆ ಹಲ್ವಾ ತಗೊಂಡು ಹೋದವನನ್ನು ಹುಡುಕುತ್ತಿದ್ದಾರೆ ಪೊಲೀಸರು!

ಮಾರುವೇಷದಲ್ಲಿ ಖೆಡ್ಡಾ?: ಬಸ್ ಖರೀದಿದಾರನಂತೆ ಮಾರುವೇಷದಲ್ಲಿ ಬ್ಯಾಂಕ್ ಏಜೆನ್ಸಿಯವರನ್ನು ಸಂರ್ಪಸಿದ ಯಶವಂತಪುರ ಆರ್​ಟಿಒ ವಿಭಾಗದ ಬ್ರೇಕ್ ಇನ್​ಸ್ಪೆಕ್ಟರ್ ಡೀಲ್ ಕುದುರಿಸುವಂತೆ ಮಾತನಾಡಿದ್ದರು. ಇದನ್ನು ನಂಬಿ ಏಜೆನ್ಸಿ ಸಿಬ್ಬಂದಿ ಕುಂಬಳಗೋಡು ಸಮೀಪದ ಗೋಣಿಪುರ ಮತ್ತು ತಾವರೆಕೆರೆ ಬಳಿಯ ಪೆದ್ದನಪಾಳ್ಯದ ಯಾರ್ಡ್​ಗಳಲ್ಲಿ ನಿಲ್ಲಿಸಿರುವ ಜಪ್ತಿ ಬಸ್​ಗಳ ವಿಷಯ ಬಾಯಿ ಬಿಟ್ಟಿದ್ದರು. ಈ ವಿಚಾರವನ್ನು ಮೇಲಧಿಕಾರಿಗಳ ಗಮನಕ್ಕೆ ತಂದು ಪ್ರತ್ಯೇಕ ತಂಡಗಳನ್ನು ರಚಿಸಿಕೊಂಡ ಬಳಿಕ ಗುರುವಾರ ಬೆಳಗ್ಗೆ ದಾಳಿ ನಡೆಸಿದ್ದಾರೆ. 2 ಬಸ್​ಗಳ ಮಾರಾಟ ಪ್ರಕ್ರಿಯೆ ಆರಂಭವಾಗಿತ್ತು. ಈಗ 20 ಬಸ್​ಗಳನ್ನು ಸುಪರ್ದಿಗೆ ಪಡೆದುಕೊಂಡಿದ್ದಾರೆ. ಯಾರಿಗೂ ಮಾರಾಟ ಮಾಡದೆ ಯಥಾಸ್ಥಿತಿ ಕಾಪಾಡುವಂತೆ ಸಂಬಂಧಪಟ್ಟ ಬ್ಯಾಂಕ್​ಗಳಿಗೆ ಆರ್​ಟಿಒ ಇ ಮೇಲ್ ಮುಖಾಂತರ ನೋಟಿಸ್ ಜಾರಿ ಮಾಡಿದೆ.

ಇದನ್ನೂ ಓದಿ: ಹಾವು ಕಚ್ಚಿ ಮೃತಪಟ್ಟ ಮಹಿಳೆಯ ಸಾವಿನ ಸುತ್ತ ಅನುಮಾನದ ಹುತ್ತ: ಚಿನ್ನಾಭರಣವೂ ನಾಪತ್ತೆ!

ಬೆಂಗಳೂರಲ್ಲಿ ಚೇಸ್, ಬೆಳಗಾವಿಯಲ್ಲಿ ಸೀಜ್!: ಬ್ಯಾಂಕ್ ಜಪ್ತಿ ಮಾಡಿದ್ದ ಬಸ್ಸನ್ನು ಖರೀದಿಸಿ ಮರುವಿನ್ಯಾಸಗೊಳಿಸಿದ್ದಲ್ಲದೆ ನಕಲಿ ನಂಬರ್ ಪ್ಲೇಟ್ ಅಳವಡಿಸಿ, ಚಾಸ್ಸಿ ನಂಬರ್ ತಿದ್ದಿದ್ದ ಕೇಸನ್ನು 2020 ಜನವರಿಯಲ್ಲೇ ಆರ್​ಟಿಒ ಅಧಿಕಾರಿಗಳು ಬಯಲಿಗೆಳೆದಿದ್ದಾರೆ. ಬೆಳಗಾವಿಯಲ್ಲಿ ಜಪ್ತಿ ಮಾಡಿ ಅಲ್ಲಿನ ಕ್ಯಾಂಪ್ ಪೊಲೀಸ್ ಠಾಣೆಯಲ್ಲಿ ಕ್ರಿಮಿನಲ್ ಕೇಸ್ ಕೂಡ ದಾಖಲಾಗಿದೆ. ರಾಜ್ಯದಲ್ಲಿ ಜಾರಿಯಲ್ಲೇ ಇರದ ಯುಸಿ ಸೀರೀಸ್​ನಲ್ಲಿ ನೋಂದಣಿ ಸಂಖ್ಯೆ ಅಳವಡಿಸಿಕೊಂಡು ಓಡಿಸಲಾಗುತ್ತಿತ್ತು. ಹಲವು ದಿನಗಳ ಕಾಲ ಬೆಂಗಳೂರಿನ ಆರ್​ಟಿಒ ಅಧಿಕಾರಿಗಳು ನಕಲಿ ನಂಬರ್​ನ ಬಸ್ ಓಡಾಟದ ಬಗ್ಗೆ ಮಾಹಿತಿ ಸಂಗ್ರಹಿಸಿದ್ದರು. ಕೊನೆಗೆ ಬೆಳಗಾವಿ ಅಧಿಕಾರಿಗಳಿಗೆ ಮಾಹಿತಿ ರವಾನಿಸಿ ಅಲ್ಲಿ ಬಸ್ ಜಪ್ತಿ ಮಾಡಿದ್ದರು. ಕೆಎ51/ಎಎ-6489 ವಾಹನದ ಮೂಲ ನಂಬರ್ ಪತ್ತೆಯಾಗಿದೆ. ಆದರೆ, ಎಆರ್-06ಎ-1883 ನೋಂದಣಿ ದಾಖಲೆಗಳನ್ನು ಹಾಜರುಪಡಿಸಿದ್ದು, ತನಿಖೆ ಮುಂದುವರಿದಿದೆ.

ಇದನ್ನೂ ಓದಿ: ನಾಳೆ ಬೆಳಗ್ಗೆ 7ರವರೆಗೆ ಕರ್ಫ್ಯೂ: ಅಗತ್ಯ ಸೇವೆ ಹೊರತುಪಡಿಸಿ ಅನಗತ್ಯವಾಗಿ ಹೊರಬಂದರೆ ಕ್ರಮ

ಹೇಗಿರುತ್ತೆ ಸೇಲ್ ಡೀಲ್!: ಜಪ್ತಿ ಮಾಡಿದ ಬಸ್​ಗಳನ್ನು ಅನಧಿಕೃತವಾಗಿ ಯಾರ್ಡ್​ನಲ್ಲಿ ತಂದು ನಿಲ್ಲಿಸಿಕೊಳ್ಳುವ ಬ್ಯಾಂಕ್/ಫೈನಾನ್ಸ್ ಸಂಸ್ಥೆಗಳು, ತಮ್ಮ ಹೆಸರಿಗೆ ನೋಂದಣಿ ವರ್ಗಾವಣೆ ಮಾಡಿಸಿಕೊಂಡರೆ ತೆರಿಗೆ ಪಾವತಿಸಬೇಕಾಗುತ್ತದೆ ಎಂಬ ಕಾರಣಕ್ಕಾಗಿ ಆರ್​ಟಿಒ ಗಮನಕ್ಕೆ ತರುವುದೇ ಇಲ್ಲ. ಮಧ್ಯವರ್ತಿಗಳ ಮುಖಾಂತರ ವಾಮಮಾರ್ಗದಲ್ಲಿ ಬೇರೊಬ್ಬರಿಗೆ ಬಸ್​ಗಳನ್ನು ಮಾರಾಟ ಮಾಡಿ ಬಂದಷ್ಟು ಹಣ ಉಳಿಸಿಕೊಳ್ಳುತ್ತಾರೆ. 50 ಲಕ್ಷ ರೂ. ಮೌಲ್ಯದ ಬಸ್ಸನ್ನು 5-10 ಲಕ್ಷ ರೂ.ಗೆ ಮಾರಾಟ ಮಾಡಲಾಗುತ್ತದೆ. ಕಾನೂನು ಪ್ರಕಾರ ಇದು ಅಪರಾಧ ಎಂಬ ವಿಚಾರ ಗೊತ್ತಿದ್ದರೂ ಹಣಕಾಸು ಸಂಸ್ಥೆಗಳು ಈ ಕೃತ್ಯ ಎಸಗುತ್ತಿವೆ ಎಂದು ಅಧಿಕಾರಿಗಳು ಮಾಹಿತಿ ನೀಡುತ್ತಾರೆ.

ಇದನ್ನೂ ಓದಿ:  ಕಾಶ್ಮೀರದಲ್ಲೇ ಉಗ್ರ ನೆಲೆ ಸ್ಥಾಪಿಸಲು ಹವಣಿಸುತ್ತಿದೆ ಪಾಕ್​- ಟಿಆರ್​ಎಫ್​, ಟಿಎಂಐ, ಜಿಇಎಚ್​ಗಳು ಎಲ್​ಇಟಿ, ಜೆಇಎಂಗಳ ಹೊಸ ರೂಪ!!!

ನಿಯಮ ಏನು ಹೇಳುತ್ತೆ?: ಸಾಲ ಮರುಪಾವತಿ ಮಾಡದಿದ್ದರೆ ಮಾಲೀಕನಿಗೆ ಫೈನಾನ್ಸ್ ಸಂಸ್ಥೆ ನೋಟಿಸ್ ಕೊಟ್ಟು ಬಸ್ ಜಪ್ತಿ ಮಾಡಬೇಕು. ಹೀಗೆ ಜಪ್ತಿ ಮಾಡಿದ ವಾಹನವನ್ನು ಮೂಲ ಮಾಲೀಕನ ಹೆಸರಿನಿಂದ ತಮ್ಮ ಸಂಸ್ಥೆ ಹೆಸರಿಗೆ ವರ್ಗಾವಣೆ ಮಾಡಿಸಿಕೊಳ್ಳಬೇಕು. ಆರ್​ಟಿಒ, ಮೂಲ ಮಾಲೀಕನಿಗೆ ನೋಟಿಸ್ ಕೊಡುತ್ತದೆ. ಒಂದು ವೇಳೆ ಆಕ್ಷೇಪಣೆ ಸಲ್ಲಿಕೆಯಾಗದಿದ್ದರೆ ಆರ್​ಟಿಒ ನೋಂದಣಿ ಟ್ರಾನ್ಸ್​ಫರ್ ಮಾಡುತ್ತದೆ. ಅದಕ್ಕೂ ಮುನ್ನ ವಾಹನದ ಮೇಲೆ ಬಾಕಿ ಉಳಿದಿರುವ ಸಂಪೂರ್ಣ ತೆರಿಗೆಯನ್ನು ಫೈನಾನ್ಸ್ ಸಂಸ್ಥೆಯೇ ಪಾವತಿಸಬೇಕಾಗುತ್ತದೆ.

https://www.vijayavani.net/photos-video-king-of-lipstick-the-male-model-who-made-a-lipstick-brand-uber-famous-in-china/