ಬೀಜಿಂಗ್: ಲಿಪ್ಸ್ಟಿಕ್ ಅಂದರೆ ಸಾಕು ಬಹುತೇಕ ಹೆಣ್ಮಕ್ಕಳ ಕಿವಿ ನೆಟ್ಟಗಾಗಿ, ಕಂಗಳು ಚುರುಕಾಗಿ, ಅದರಗಳೂ ಕಾತರದಿಂದ ಕನ್ನಡಿ ಕಡೆಗೆ ನೋಡಲಾರಂಭಿಸುತ್ತವೆ! ಅಂಥದ್ರಲ್ಲಿ ಚಾಕೊಲೇಟ್ ಬಾಯ್ ಅಂತಹ ಯುವಕನೊಬ್ಬ ಹೆಣ್ಮಕ್ಕಳ ಮನಸ್ಸಿಗೆ ಹಿಡಿಸುವಂತೆ ಲಿಪ್ಸ್ಟಿಕ್ ಮಾರಾಟಕ್ಕೆ ಇಳಿದ್ರೆ ಕೇಳಬೇಕಾ ಮತ್ತೆ! ಈತ ದಿನವೊಂದರಲ್ಲಿ ಲಿಪ್ಸ್ಟಿಕ್ ವಹಿವಾಟು ಬರೋಬ್ಬರಿ 1,100 ಕೋಟಿ ರೂಪಾಯಿಗೂ ಅಧಿಕ!
ಚೀನಾದಲ್ಲಿ ಈತ ಲಿಪ್ಸ್ಟಿಕ್ ಕಿಂಗ್ ಎಂದೇ ಜನಪ್ರಿಯ. ಹೆಸರು ಲಿ ಜಿಯಾಕಿ. ವಯಸ್ಸು 27 ವರ್ಷ. ಚೀನಾದ ಅತ್ಯುತ್ತಮ ಲಿಪ್ಸ್ಟಿಕ್ ಸೇಲ್ಸ್ಮ್ಯಾನ್. ಚೀನಾದ ಟಿಕ್ಟಾಕ್ನಲ್ಲಿ ಈತನ ಬೆಂಬಲಿಗರ ಸಂಖ್ಯೆ 4 ಕೋಟಿ!. ಚೀನಾದಲ್ಲಿ ಜನಪ್ರಿಯವಾಗಿರುವ 11.11 ಅಥವಾ ಸಿಂಗಲ್ಸ್ ಡೇ ಎಂಬ ವಾರ್ಷಿಕ ಷಾಪಿಂಗ್ ಫೆಸ್ಟಿವಲ್ನಲ್ಲಿ ಒಂದೇ ದಿನ 1,102 ಕೋಟಿ ರೂಪಾಯಿ ಮೌಲ್ಯದ ಲಿಪ್ಸ್ಟಿಕ್ ಮಾರಾಟ ಮಾಡಿದ ದಾಖಲೆ ಈತನದ್ದು. ಟೋಬೋ ಎಂಬ ಸಾಮಾಜಿಕ ಜಾಲತಾಣದಲ್ಲಿ ಲಿಪ್ಸ್ಟಿಕ್ ಮಾರಾಟದ ನೇರ ಪ್ರಸಾರದಲ್ಲಿ ಈತನೇ ಮಾಡೆಲ್. ಈತ ಷೋ ನೋಡುವುದಕ್ಕೆ 3.6 ಕೋಟಿ ವೀಕ್ಷಕರು ಲಾಗಿನ್ ಆಗ್ತಾರೆ.
ಇದನ್ನೂ ಓದಿ: ಪಾಕ್ ವಿಮಾನ ಅಪಘಾತದಲ್ಲಿ ಬದುಕುಳಿದವನಿಗೆ ಇದೆ ಭಾರತದ ಕನೆಕ್ಷನ್!
2019ರಲ್ಲಿ ಲಿ ಜಿಯಾಕಿ ಗಿನ್ನೆಸ್ ದಾಖಲೆ ನಿರ್ಮಿಸಿದ್ದು ಕೂಡ ಲಿಪ್ಸ್ಟಿಕ್ ಮೂಲಕವೇ. ಕೇವಲ 30 ಸೆಕೆಂಡ್ನಲ್ಲಿ ನಾಲ್ವರು ಮಾಡೆಲ್ಗಳ ಲಿಪ್ಸ್ಟಿಕ್ ಹಚ್ಚುವ ಮೂಲಕ ಈ ದಾಖಲೆ ನಿರ್ಮಿಸಿದ್ದ. ಇದೇ ರೀತಿ ಏಳು ಗಂಟೆಯ ನೇರ ಪ್ರಸಾರ ಕಾರ್ಯಕ್ರಮದಲ್ಲಿ ಈತ 380 ವಿವಿಧ ಲಿಪ್ಸ್ಟಿಕ್ ಸ್ವತಃ ಬಳಸಿ ತೋರಿಸಿ ದಾಖಲೆ ನಿರ್ಮಿಸಿದ್ದ. ಅಷ್ಟೊಂದು ಲಿಪ್ಸ್ಟಿಕ್ ಅನ್ನು ತನ್ನ ತುಟಿಗೆ ಮೆತ್ತಿಕೊಂಡು ಪ್ರದರ್ಶನ ನೀಡುವುದು ತ್ರಾಸದ ಕೆಲಸ. ತುಟಿಯ ಆರೋಗ್ಯ ಹಾಳಾಗಬಹುದು. ಆದರೆ ತನಗೆ ಹಾಗಾಗಿಲ್ಲ. ತನ್ನದು ಉಕ್ಕಿನ ತುಟಿ ಎಂದೂ ಆತ ಹೇಳಿಕೊಳ್ಳುತ್ತಾನೆ!
ಇದನ್ನೂ ಓದಿ: ಹಾವು ಕಚ್ಚಿ ಮೃತಪಟ್ಟ ಮಹಿಳೆಯ ಸಾವಿನ ಸುತ್ತ ಅನುಮಾನದ ಹುತ್ತ: ಚಿನ್ನಾಭರಣವೂ ನಾಪತ್ತೆ!
2018ರಲ್ಲಿ ನಡೆದ ಸಿಂಗಲ್ಸ್ ಶಾಪಿಂಗ್ ಫೆಸ್ಟಿವಲ್ನಲ್ಲಿ ಅಲಿಬಾಬಾ ಗ್ರೂಪ್ನ ಸಹ ಸಂಸ್ಥಾಪಕ ಜಾಕ್ ಮಾ ಕೂಡ ಲಿ ಜಿಯಾಕಿ ಜತೆಗೆ ಲಿಪ್ಸ್ಟಿಕ್ ಮಾರಾಟಕ್ಕೆ ಕುಳಿತಿದ್ದರು. ಆ ಎರಡು ಗಂಟೆ ಹೊತ್ತಿನ ಷೋ ನಲ್ಲಿ ಲಿ ಜಿಯಾಕಿ 1,000 ಲಿಪ್ಸ್ಟಿಕ್ ಮಾರಾಟ ಮಾಡಿದರೆ ಜಾಕ್ ಮಾ ಮಾರಾಟ ಮಾಡಿದ್ದು ಕೇವಲ 10!. ಅಂದ ಹಾಗೆ, ಲಿ ಜಿಯಾಕಿ ತನ್ನ ಷೋದಲ್ಲಿ ಪದೇ ಪದೇ ಹೇಳುವ ಮಾತು ಹೆಣ್ಮಕ್ಕಳಿಗೂ ಪ್ರಿಯವಾದುದೇ – oh my god~ BUY! BUY! BUY!.. (ಏಜೆನ್ಸೀಸ್)
