ಲಖನೌ: ವಿಚಿತ್ರವಾದ ಘಟನೆಯೊಂದರಲ್ಲಿ ಎಮ್ಮೆಯೊಂದು ಪೊಲೀಸರ ಕೈಯಲ್ಲಿ ಸಾಧ್ಯವಾಗದೆ ಇರುವ ಕೆಲಸವನ್ನು ಮಾಡಿ ತೋರಿಸುವ ಮೂಲಕ ಎಲ್ಲರ ಹುಬ್ಬೇರುವಂತೆ ಮಾಡಿರುವ ಘಟನೆ ಉತ್ತರಪ್ರದೇಶದ ಪ್ರತಾಪ್ಗಢದಲ್ಲಿ ನಡೆದಿದೆ. ಅಷ್ಟಕ್ಕೂ ಪೊಲೀಸರ ಕೈಯಲ್ಲಿ ಸಾಧ್ಯವಾಗದೆ ಇರುವ ಕೆಲಸವನ್ನು ಮಾಡಿದ್ದಾದರು ಹೇಗೆ ಎಂಬುದನ್ನು ನೋಡೋಣ ಬನ್ನಿ.
ಪ್ರತಾಪ್ಗಢದ ಮಹೇಶ್ಗಂಜ್ ಪೊಲೀಸ್ ಠಾಣಾ ವ್ಯಾಪ್ತಿಯ ರಾಯ್ ಅಸ್ಕರನ್‌ಪುರ ಗ್ರಾಮದ ನಿವಾಸಿ ನಂದಲಾಲ್ ಸರೋಜ್ ಎಂಬುವವರಿಗೆ ಸೇರಿದ ಎಮ್ಮೆ ಕೆಲ ದಿನಗಳಿಂದ ಕಾಣೆಯಾಗಿತ್ತು. ಆಹಾರ ಅರಸುತ್ತ ಪುರೆ ಹರಿಕೇಶ್ ಗ್ರಾಮಕ್ಕೆ ದಾರಿ ತಪ್ಪಿ ಹೋಗಿದ್ದು, ಅಲ್ಲಿ ಅದನ್ನು ಹನುಮಾನ್ ಸರೋಜ್ ಎಂಬಾತ ತನ್ನ ಮನೆಯಲ್ಲಿ ಕಟ್ಟಿಹಾಕಿಕೊಂಡಿದ್ದಾನೆ.
ಸತತವಾಗಿ ಹುಡುಕಾಡಿದ ಬಳಿಕ ಎಮ್ಮೆ ಪತ್ತೆಯಾಗಿದ್ದು, ಈ ಬಗ್ಗೆ ವಿಚಾರಿಸಿದಾಗ ಹನುಮಾನ್ ನಂದಲಾಲ್ ಬಳಿ ಗಲಾಟೆ ಮಾಡಿದ್ದಾನೆ. ಎಮ್ಮೆ ತನಗೆ ಸೇರಿದ್ದು, ಯಾವುದೇ ಕಾರಣಕ್ಕೂ ಹಿಂತಿರುಗಿಸಲು ಸಾಧ್ಯವಿಲ್ಲ ಎಂದು ಹೇಳಿದ್ದಾನೆ. ಇದರಿಂದ ಬೇಸರಗೊಂಡ ನಂದಲಾಲ್ ಪಂಚಾಯತ್ಗೆ ದೂರು ನೀಡಿದ್ದಾನೆ. ವಿಚಾರಣೆ ನಡೆಸಿದ ಪಂಚಾಯತ್ ಅಧಿಕಾರಿಗಳು ಪ್ರಕರಣವನ್ನು ಮಹೇಶ್ಗಂಜ್ ಪೊಲೀಸ್ ಠಾಣೆಗೆ ವರ್ಗಾಯಿಸಿ ಕೈ ತೊಳೆದುಕೊಂಡಿದ್ದಾರೆ.
ಇದನ್ನೂ ಓದಿ: ಹಣ ಮಾಡಲೆಂದೇ ವಿರಾಟ್ ಒತ್ತಡದ ಪರಿಸ್ಥಿತಿಯಲ್ಲಿ ಆಡುತ್ತಾನೆ; ಶಾಕಿಂಗ್ ಹೇಳಿಕೆ ಕೊಟ್ಟ ಪಾಕ್ ಮಾಜಿ ವೇಗಿ
ಪ್ರಕರಣದ ವಿಚಾರಣೆ ನಡೆಸಿದ ಮಹೇಶ್ಗಂಜ್ ಪೊಲೀಸ್ ಠಾಣಾಧಿಕಾರಿ ಶ್ರವಣ್ ಕುಮಾರ್ ಸಿಂಗ್ ವಾದ-ಪ್ರತಿವಾದವನ್ನು ಆಲಿಸಿದ ಬಳಿಕ ಇದು ಇತ್ಯರ್ರಥವಾಗುವುದಿಲ್ಲ ಎಂದು ತಿಳಿದು ಎಮ್ಮೆಗೆ ತೀರ್ಪು ನೀಡುವಂತೆ ಸೂಚಿಸಿದರು. ಅದು ಹೇಗೆ ಅಂದರೆ ನಂದಲಾಲ್ ಹಾಗೂ ಹನುಮಾನ್ ಸರೋಜ್ನನ್ನು ತಮ್ಮ ತಮ್ಮ ಗ್ರಾಮಗಳ ರಸ್ತೆಯ ಮುಂಭಾಗ ನಿಲ್ಲುವಂತೆ ಸೂಚಿಸಿದರು. ಬಳಿಕ ಎಮ್ಮೆ ಯಾರನ್ನು ಹಿಂಬಾಲಿಸುತ್ತದೆ ಅವರೇ ಅದರ ನಿಜವಾದ ಮಾಲೀಕರು ಎಂದು ತಿಳಿಯುತ್ತದೆ ಎಂದು ಹೇಳಿದರು.
ಅದರಂತೆ ಎಮ್ಮೆ ನಂದಲಾಲ್ನನ್ನು ಹಿಂಬಾಲಿಸಲು ಶುರು ಮಾಡಿದ್ದು, ಬಳಿಕ ಎಮ್ಮೆಯನ್ನು ಪೊಲೀಸರು ಅದರ ಮಾಲೀಕನಿಗೆ ಒಪ್ಪಿಸಿದ್ದಾರೆ. ಬೇರೆಯವರ ಎಮ್ಮೆಯನ್ನು ತನದು ಎಂದು ಗಲಾಟೆ ಮಾಡಿದ ಹನುಮಾನ್ ಸರೋಜ್ಗೆ ಪೊಲೀಸರು ಹಾಗೂ ಗ್ರಾಮಸ್ಥರು ಛೀಮಾರಿ ಹಾಕಿದ್ದು, ಮುಂದೆ ಈ ರೀತಿ ಮಾಡದಂತೆ ಎಚ್ಚರಿಕೆ ನೀಡಿ ಮುಚ್ಚಳಿಕೆ ಬರೆಸಿಕೊಂಡು ಕಳಿಸಿದ್ದಾರೆ. ಪೊಲೀಸರ ಕೈಯಲ್ಲಿ ಸಾಧ್ಯವಾಗದ ಕೆಲಸವನ್ನು ಎಮ್ಮೆಯೊಂದು ಅಚ್ಚುಕಟ್ಟಾಗಿ ಮಾಡಿ ಮುಗಿಸಿದ್ದು, ಎಲ್ಲರೂ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.
