ಬಾಗಿಲು, ಬೀಗವಿಲ್ಲದ ಗ್ರಾಮ: ಹಿಂದೂ ದೇವತೆಗಳ ಕೋಟ್ಯಂತರ ಕ್ಷೇತ್ರಗಳು ಜಗತ್ತಿನಾದ್ಯಂತ ಇವೆ. ಅಂಥ ಎಲ್ಲ ಕ್ಷೇತ್ರಗಳೂ ತನ್ನದೇ ಆದ ವಿಶಿಷ್ಟ ಹಿನ್ನೆಲೆಯನ್ನು ಹೊಂದಿದ್ದು, ಇಂದಿಗೆ ಕೇವಲ ದಂತಕತೆ ಆಗಿರುತ್ತವೆ. ಆದರೆ ಶನಿಶಿಂಗಣಾಪುರ ಕ್ಷೇತ್ರದ ಹಿನ್ನೆಲೆಗೆ ಇಂದಿಗೂ ಸಾಕ್ಷಿ ಇದೆ. ಅಂದು ಗ್ರಾಮದ ಹಿರಿಯರ ಕನಸಿನಲ್ಲಿ ಬಂದ ಸ್ವಾಮಿ ತಾನು ಈ ಗ್ರಾಮದಲ್ಲಿ ನೆಲೆ ನಿಂತಿರುವುದಕ್ಕೆ ಸಾಕ್ಷಿಯಾಗಿ-‘ಇಲ್ಲಿರುವ ಪ್ರತಿಯೊಂದು ಮನೆಯ ರಕ್ಷಣೆ ನನ್ನ ಹೊಣೆ. ಇಂದಿನಿಂದ ಈ ಗ್ರಾಮದಲ್ಲಿ ಯಾವುದೇ ಮನೆಗಳಿಗೆ ಬಾಗಿಲುಗಳನ್ನಾಗಲಿ, ಬೀಗಗಳನ್ನಾಗಲಿ ಹಾಕುವ ಅಗತ್ಯವಿಲ್ಲ’ ಎಂದು ಅಭಯ ನೀಡಿದ. ಸ್ವಾಮಿ ನೀಡಿದ ಅಭಯದಂತೆ ಶತಮಾನಗಳಿಂದಲೂ ಯಾವುದೇ ಮನೆಗಳಿಗೂ ಇಲ್ಲಿ ಬಾಗಿಲು-ಬೀಗವಿಲ್ಲ. ಮಾತ್ರವಲ್ಲ ಅಂಗಡಿ ಮುಂಗಟ್ಟುಗಳು, ಆಸ್ಪತ್ರೆ, ಪೊಲೀಸ್ ಠಾಣೆಗೂ ಇಲ್ಲಿ ಬೀಗ ಹಾಕುವುದಿಲ್ಲ. ಸಾಮಾನ್ಯವಾಗಿ ಬಂಗಾರ, ಆಭರಣಗಳನ್ನು ಭದ್ರತೆಗಾಗಿ ಬ್ಯಾಂಕಿನಲ್ಲಿ ಇಡುವುದು ವಾಡಿಕೆ. ಆದರೆ ಜಗತ್ತಿನಲ್ಲೇ ಬೀಗವಿಲ್ಲದ ಏಕೈಕ ರಾಷ್ಟ್ರೀಕೃತ ಬ್ಯಾಂಕ್ ಶನಿಶಿಂಗಣಾಪುರದಲ್ಲಿದೆ. ಹಿಂದೂ ಪರಂಪರೆಯಲ್ಲಿ ಪವಾಡ, ಲೀಲೆ, ಅವತಾರ ಇತ್ಯಾದಿ ಪಾರಿಭಾಷಿಕ ಶಬ್ದಗಳಿವೆ. ಅದನ್ನು ಒಂದು ವರ್ಗ ದವರು ಟೀಕಿಸುತ್ತಾರೆ. ಆದರೆ ಶನಿಶಿಂಗಣಾಪುರದಲ್ಲಿ ನಡೆಯುವ ಈ ಪವಾಡವನ್ನು ಪರೀಕ್ಷೆ ಮಾಡಲು ಹೋದವರು ಅಲ್ಲಿಂದ ಒಂದು ಹುಲ್ಲುಕಡ್ಡಿಯನ್ನು ತೆಗೆದುಕೊಂಡು ಹೋಗಲೂ ಸಾಧ್ಯವಾಗದೆ ಸ್ವಾಮಿಗೆ ಶರಣಾದ ಅದೆಷ್ಟೋ ಉದಾಹರಣೆಗಳಿವೆ. ಒಟ್ಟಿನಲ್ಲಿ ಯಾವುದೇ ವ್ಯಕ್ತಿ, ಎಲ್ಲಿ ಬೇಕಾದರೂ ಏನೇ ಬೆಲೆಬಾಳುವ ವಸ್ತುವನ್ನಿಟ್ಟರೂ ಇಲ್ಲಿ ಕಳ್ಳತನ ಆಗುವುದಿಲ್ಲ. ನಿತ್ಯ ಸಾವಿರಾರು ಭಕ್ತರು ಸ್ವಾಮಿಗೆ ತೈಲಾಭಿಷೇಕ ಮಾಡುತ್ತಾರೆ.
