ಬಿಬಿಎಲ್​ನಲ್ಲಿ ಸಿಕ್ಸರ್​ ಸುನಾಮಿ ಎಬ್ಬಿಸಿದ ಮ್ಯಾಕ್ಸಿ! ತಂಡದಿಂದ ಕೈಬಿಟ್ಟು ತಪ್ಪು ಮಾಡಿತಾ RCB? Glenn Maxwell

Glenn Maxwell : ಬಿಗ್ ಬ್ಯಾಷ್ ಲೀಗ್‌ ( BBL ) ಭಾಗವಾಗಿ ಜನವರಿ 12ರಂದು ನಡೆದ ಪಂದ್ಯದಲ್ಲಿ ಗ್ಲೇನ್​ ಮ್ಯಾಕ್ಸ್​ವೆಲ್​ ಸ್ಫೋಟಕ ಆಟವಾಡುವ ಮೂಲಕ ಮತ್ತೊಮ್ಮೆ ಕ್ರಿಕೆಟ್​ ಜಗತ್ತಿನ ಗಮನ ಸೆಳೆದಿದ್ದಾರೆ. ಅಲ್ಲದೆ, ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (ಆರ್​ಸಿಬಿ) ತಂಡದ ಅಭಿಮಾನಿಗಳು ಚಿಂತಿಸುವಂತೆ ಮಾಡಿದ್ದಾರೆ.

ಮೆಲ್ಬೋರ್ನ್ ಸ್ಟಾರ್ಸ್ ತಂಡದ ಪರ ಆಡುತ್ತಿರುವ ಮ್ಯಾಕ್ಸ್​ವೆಲ್​, ಮೆಲ್ಬೋರ್ನ್ ರೆನೆಗೇಡ್ಸ್ ವಿರುದ್ಧದ ಪಂದ್ಯದಲ್ಲಿ ಅಬ್ಬರಿಸಿ ಬೊಬ್ಬಿರಿದರು. ತಮ್ಮ ತಂಡವು ಸಂಕಷ್ಟದಲ್ಲಿದ್ದಾಗ (45/4) ಆರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಲು ಬಂದ ಮ್ಯಾಕ್ಸ್‌ವೆಲ್ ಕೇವಲ 52 ಎಸೆತಗಳಲ್ಲಿ 10 ಸಿಕ್ಸರ್‌ಗಳು ಮತ್ತು 4 ಬೌಂಡರಿಗಳ ಸಹಾಯದಿಂದ 90 ರನ್ ಗಳಿಸಿದರು.

ನಿಧಾನವಾಗಿ ಇನ್ನಿಂಗ್ಸ್ ಆರಂಭಿಸಿದ ಮ್ಯಾಕ್ಸಿ, ಇನ್ನಿಂಗ್ಸ್​ನ 16ನೇ ಓವರ್​ನಿಂದ ತಮ್ಮ ಗೇರ್ ಬದಲಾಯಿಸಿದರು. ಆಡಂ ಜಂಪಾ ಎಸೆದ 16ನೇ ಓವರ್​ನಲ್ಲಿ ಒಂದು ಸಿಕ್ಸರ್ ಮತ್ತು ಬೌಂಡರಿ ಬಾರಿಸಿದ ಮ್ಯಾಕ್ಸ್​ವೆಲ್, ಕೇನ್ ರಿಚರ್ಡ್ಸನ್ ಎಸೆದ ಮುಂದಿನ ಓವರ್​ನಲ್ಲಿ ಇನ್ನಷ್ಟು ಉದ್ರಿಕ್ತರಾದರು. ಈ ಓವರ್​ನಲ್ಲಿ ಮ್ಯಾಕ್ಸಿ ಒಂದು ಬೌಂಡರಿ ಮತ್ತು ಎರಡು ಬೃಹತ್ ಸಿಕ್ಸರ್​ಗಳನ್ನು ಸಿಡಿಸಿದರು. ಈ ಓವರ್‌ನ ಮೊದಲ ಸಿಕ್ಸರ್ (ಎರಡನೇ ಎಸೆತ) ಬಿಗ್ ಬ್ಯಾಷ್ ಲೀಗ್ ಇತಿಹಾಸದಲ್ಲಿ ಅತಿ ದೊಡ್ಡ ಸಿಕ್ಸರ್ ಎಂದು ದಾಖಲಾಗಿದೆ. ಈ ಸಿಕ್ಸರ್ 122 ಮೀಟರ್ ಪ್ರಯಾಣಿಸಿತು. ಮ್ಯಾಕ್ಸಿಗೂ ಮೊದಲು ಬಿಬಿಎಲ್‌ನಲ್ಲಿ ಅತಿ ದೊಡ್ಡ ಸಿಕ್ಸರ್‌ನ ದಾಖಲೆಯನ್ನು ತಂಡದ ಸಹ ಆಟಗಾರ ಹಿಲ್ಟನ್ ಕಾರ್ಟ್‌ರೈಟ್ ಹೊಂದಿದ್ದರು.

ಸದರ್ಲ್ಯಾಂಡ್ ಎಸೆದ ಇನ್ನಿಂಗ್ಸ್‌ನ 18ನೇ ಓವರ್‌ನಲ್ಲಿ ಮ್ಯಾಕ್ಸ್‌ವೆಲ್, ಮೂರು ಬೃಹತ್ ಸಿಕ್ಸರ್‌ಗಳು ಮತ್ತು ಒಂದು ಬೌಂಡರಿಯನ್ನು ಬಾರಿಸಿದರು. ಈ ಓವರ್‌ನಲ್ಲಿ, ಮ್ಯಾಕ್ಸಿ ಮೊದಲ ಮೂರು ಎಸೆತಗಳಲ್ಲಿ ಸಿಕ್ಸರ್‌ ಸಿಡಿಸಿದರು. 20ನೇ ಓವರ್‌ನ ಮೊದಲ ಎಸೆತದಲ್ಲೇ ಮ್ಯಾಕ್ಸಿ ಔಟಾದರು. 10 ರನ್‌ಗಳ ಕೊರತೆಯಿಂದ ಶತಕ ವಂಚಿತರಾದರು. ಕೇನ್ ರಿಚರ್ಡ್‌ಸನ್ ಮ್ಯಾಕ್ಸಿಯನ್ನು ಕ್ಲೀನ್ ಬೌಲ್ಡ್ ಮಾಡಿದರು.

ಇದನ್ನೂ ಓದಿ: ಪೋಷಕರೇ ಹುಷಾರ್‌! ಯಾವುದೇ ಕಾರಣಕ್ಕೂ ಮಕ್ಕಳ ಮುಂದೆ ಈ 5 ವಿಚಾರ ಮಾತನಾಡಲೇಬೇಡಿ… Parents Tips

ಮ್ಯಾಕ್ಸಿಯ ಈ ಆರ್ಭಟ ನೋಡಿದ ಆರ್​ಸಿಬಿ ಅಭಿಮಾನಿಗಳು ಭಾರಿ ಚರ್ಚೆಗೆ ಇಳಿದಿದ್ದಾರೆ. ಅದೇನೆಂದರೆ, ಆರ್​ಸಿಬಿ ತಂಡ ಈ ಬಾರಿಯ ಐಪಿಎಲ್​ ಮೆಗಾ ಹರಾಜಿಗೂ ಮುನ್ನ ಮ್ಯಾಕ್ಸ್​ವೆಲ್​ ಅವರನ್ನು ತಂಡದಿಂದ ಕೈಬಿಟ್ಟಿತು. ಅಲ್ಲದೆ, ಹರಾಜಿನಲ್ಲೂ ಕೂಡ ಮ್ಯಾಕ್ಸಿಯನ್ನು ಖರೀದಿ ಮಾಡಲು ಆಸಕ್ತಿ ತೋರಲಿಲ್ಲ. ಏಕೆಂದರೆ, 2024ರ ಐಪಿಎಲ್​ನಲ್ಲಿ ಮ್ಯಾಕ್ಸಿ ತುಂಬಾ ಕಳಪೆ ಪ್ರದರ್ಶನ ತೋರಿದ್ದರು. ಆದರೆ, ಈಗ ಬಿಬಿಎಲ್​ನಲ್ಲಿ ಅಬ್ಬರಿಸಿದ್ದನ್ನು ನೋಡಿ ಅಯ್ಯೋ ಮ್ಯಾಕ್ಸಿಯನ್ನು ಕೈಬಿಟ್ಟು ಆರ್​ಸಿಬಿ ತಂಡ ತಪ್ಪು ಮಾಡಿತಾ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ.

ಪಂದ್ಯದ ವಿಚಾರಕ್ಕೆ ಬರುವುದಾದರೆ, ಅಂತಿಮವಾಗಿ ಮೆಲ್ಬೋರ್ನ್​ ಸ್ಟಾರ್ಸ್​ ತಂಡ 20 ಓವರ್​ಗಳಲ್ಲಿ 10 ವಿಕೆಟ್​ ನಷ್ಟಕ್ಕೆ 165 ರನ್​ ಕಲೆಹಾಕಿತು. ಗುರಿ ಬೆನ್ನತ್ತಿದ ರೆನೆಗೇಡ್ಸ್ ತಂಡ 19.5 ಓವರ್​ಗಳಲ್ಲಿ 123 ರನ್​ಗೆ ಆಲೌಟ್​ ಆಗುವ ಮೂಲಕ ಸೋಲಿಗೆ ಶರಣಾಯಿತು. ರೆನೆಗೇಡ್ಸ್​ ಪರ ಜೇಕ್ ಫ್ರೇಸರ್ ಮೆಕ್‌ಗುರ್ಕ್ (19), ವಿಲ್ ಸದರ್ಲ್ಯಾಂಡ್ (15), ಹ್ಯಾರಿ ಡಿಕ್ಸನ್​ (13) ಮತ್ತು ಟಿಮ್ ಸೀಫರ್ಟ್ (26) ಬಿಟ್ಟರೆ ಉಳಿದು ಯಾರೊಬ್ಬರು ಕೂಡ ಎರಡಂಕಿ ದಾಟಲಿಲ್ಲ. (ಏಜೆನ್ಸೀಸ್​)

https://www.vijayavani.net/estrogen-linked-to-alcohol-addiction-in-women

https://www.vijayavani.net/hand-force-that-celebrates-if-it-loses-for-the-prestige