ಎರಡನೇ ಡೋಸ್​ ಲಸಿಕೆ ಕೊರತೆ: ದೆಹಲಿ ಸರ್ಕಾರಕ್ಕೆ ಹೈಕೋರ್ಟ್​ ತರಾಟೆ!

ನವದೆಹಲಿ : ಕರೊನಾ ಲಸಿಕೆಯ ಕೊರತೆ ತಲೆದೋರಿರುವಾಗ ಹೊಸದಾಗಿ ನೂರಾರು ಲಸಿಕಾ ಕೇಂದ್ರಗಳಿಗೆ ಚಾಲನೆ ನೀಡಿರುವ ದೆಹಲಿ ಸರ್ಕಾರದ ಕಾರ್ಯವೈಖರಿಯ ಬಗ್ಗೆ ದೆಹಲಿ ಹೈಕೋರ್ಟ್​ ಬೇಸರ ವ್ಯಕ್ತಪಡಿಸಿದೆ. ಜನರಿಗೆ ಎರಡೂ ಡೋಸ್​ಗಳನ್ನು ನೀಡಬಹುದು ಎಂಬ ಖಾತ್ರಿ ಇಲ್ಲದೆ ಎಷ್ಟೊಂದು ಲಸಿಕಾ ಕೇಂದ್ರಗಳನ್ನು ಸಂಭ್ರಮಾಡಂಬರಗಳಿಂದ ತೆರೆಯುವ ಅಗತ್ಯವೇನಿತ್ತು ಎಂದು ಕಟುವಾಗಿ ಪ್ರಶ್ನಿಸಿದೆ.

ಕೋವಾಕ್ಸಿನ್​ನ ಮೊದಲನೇ ಡೋಸ್​ ಪಡೆದಿರುವ ಲಕ್ಷಾಂತರ ಜನರಿಗೆ 6 ವಾರಗಳು ಇನ್​ಕ್ಯುಬೇಷನ್ ಪಿರಿಯಡ್​ ಮುಗಿಯುವುದರೊಳಗೆ ಎರಡನೇ ಡೋಸ್ ನೀಡಬೇಕಾಗಿದೆ. ಆದರೆ ದೆಹಲಿಯಲ್ಲಿ ಕೋವಾಕ್ಸಿನ್ ಕೊರತೆಯಿದ್ದು, ಎರಡನೇ ಡೋಸ್​ ಸಕಾಲಿಕವಾಗಿ ಸಿಗುವುದೇ ಎಂಬ ಅನುಮಾನವಿದೆ ಎಂದು ಹೈಕೋರ್ಟ್​ನಲ್ಲಿ ಅರ್ಜಿ ಸಲ್ಲಿಸಲಾಗಿದೆ. ಮತ್ತೊಂದು ಅರ್ಜಿಯಲ್ಲಿ ಕೋವಿಶೀಲ್ಡ್​ ಎರಡನೇ ಡೋಸ್​ಗೂ ಕೊರತೆ ಇದೆ ಎಂದು ದೂರಲಾಗಿದೆ.

ಇದನ್ನೂ ಓದಿ: ಚೋಕ್ಸಿಯನ್ನು ಕರೆತರಲು ಡೊಮಿನಿಕಾದಲ್ಲಿ ಸಿಬಿಐ ತಂಡ ಸನ್ನದ್ಧ

ಇಂದು ಈ ಅರ್ಜಿಗಳ ವಿಚಾರಣೆಯ ವೇಳೆ, "ಎರಡನೇ ಡೋಸ್​ಅನ್ನೂ ಒದಗಿಸಬಲ್ಲೆವೆಂಬ ಭರವಸೆ ಇಲ್ಲದ ಮೇಲೆ ನೀವು ಲಸಿಕಾ ಕೇಂದ್ರಗಳನ್ನು ಯಾಕೆ ಆರಂಭಿಸಿದಿರಿ ? ಆ ಕೆಲಸವನ್ನು ನಿಲ್ಲಿಸಬೇಕಿತ್ತು. ಎರಡನೇ ಡೋಸ್​ ಸಿಗುವುದಿಲ್ಲ ಎಂದಾಗ ಮಹಾರಾಷ್ಟ್ರ (ಲಸಿಕಾ ಕೇಂದ್ರಗಳನ್ನು ತೆರೆಯುವುದನ್ನು) ನಿಲ್ಲಿಸಿತ್ತು" ಎಂದು ಕೋರ್ಟ್​ ಹೇಳಿತು. "ಎಲ್ಲೆಡೆ ಸಂಭ್ರಮ ಮತ್ತು ಆಡಂಬರದಿಂದ ಎಷ್ಟೊಂದು ಲಸಿಕಾ ಕೇಂದ್ರಗಳನ್ನು ನೀವು ತೆರೆದುಬಿಟ್ಟಿದ್ದೀರಿ. ಈಗ ಎರಡನೇ ಡೋಸ್​ಗೆ ಸ್ಟಾಕ್ ಯಾವಾಗ ಲಭ್ಯವಾಗುತ್ತದೆ ಎಂದು ಗೊತ್ತಿಲ್ಲ ಎಂದು ಹೇಳುತ್ತಿದ್ದೀರಿ" ಎಂದು ಅಸಮಾಧಾನ ವ್ಯಕ್ತಪಡಿಸಿತು.

ದೆಹಲಿಯಲ್ಲಿ ಈವರೆಗೆ 54 ಲಕ್ಷ ಜನರಿಗೆ ಕರೊನಾ ಲಸಿಕೆ ನೀಡಲಾಗಿದೆ. ಇವರಲ್ಲಿ 12.24 ಜನರಿಗೆ ಮಾತ್ರ ಎರಡೂ ಡೋಸ್​ಗಳನ್ನು ನೀಡಲಾಗಿದೆ. ಒಂಭತ್ತು ದಿನಗಳಿಂದ ದೆಹಲಿಯಲ್ಲಿ 18-44 ವರ್ಷ ವಯೋಮಾನದವರಿಗೆ ಲಸಿಕಾ ಅಭಿಯಾನವನ್ನು ಸ್ಥಗಿತಗೊಳಿಸಲಾಗಿದೆ. ಹಾಲಿ ದೆಹಲಿಯಲ್ಲಿ 4,43,750 ಡೋಸ್​ ಲಸಿಕೆಗಳು ಲಭ್ಯವಿದ್ದು, ಇದರಲ್ಲಿ 3,96,000 ಕೋವಿಶೀಲ್ಡ್​​ ಡೋಸ್​ಗಳಾಗಿದ್ದು, 47,310 ಕೋವಾಕ್ಸಿನ್ ಡೋಸ್​ಗಳಾಗಿವೆ. ದೆಹಲಿಯ ಲಸಿಕಾಕರಣದ ವೇಗದಲ್ಲಿ ಇನ್ನು 19 ದಿನಗಳಲ್ಲಿ ಈ ಡೋಸ್​ಗಳು ಮುಗಿಯಲಿವೆ ಎನ್ನಲಾಗಿದೆ. (ಏಜೆನ್ಸೀಸ್)

https://www.vijayavani.net/video-shows-doctor-thrashed-over-patients-death-24-arrested/

https://www.vijayavani.net/unfortunate-there-is-no-domestic-violence-law-against-wife-says-madras-hc/