ಅವಳೂ ಯುವತಿ- ಇವಳೂ ಯುವತಿ... ಕೋರ್ಟ್​ಗೆ ಹೋಯ್ತು ಪ್ರೇಮಪ್ರಸಂಗ... ಗೊಂದಲದಲ್ಲಿ ನ್ಯಾಯಮೂರ್ತಿ...

ಚೆನ್ನೈ: ಇಬ್ಬರು ಯುವತಿಯರ ನಡುವೆ ಪ್ರೇಮ ಪ್ರಕರಣ ಇದೀಗ ಮದ್ರಾಸ್​ ಹೈಕೋರ್ಟ್​ ಮೆಟ್ಟಿಲೇರಿದ್ದು, ಈ ಪ್ರಕರಣದಲ್ಲಿ ನ್ಯಾಯಮೂರ್ತಿಗಳೇ ಸ್ವಲ್ಪ ಗೊಂದಲಕ್ಕೀಡಾದ ಘಟನೆ ನಡೆದಿದೆ.

ಬಿ.ಎಸ್ಸಿ ಮುಗಿಸಿ, ಪ್ರಸ್ತುತ ಎಂಬಿಎ ವ್ಯಾಸಂಗ ಮಾಡುತ್ತಿರುವ 22 ವರ್ಷದ ಯುವತಿ ಹಾಗೂ ಇನ್ನೊಬ್ಬಳು 20 ವರ್ಷದಾಕೆ. ಇಬ್ಬರ ನಡುವೆ ಪ್ರೇಮಾಂಕುರವಾಗಿದೆ. ಈ ಸಲಿಂಗಿಗಳ ಪ್ರೇಮ ವಿವಾಹಕ್ಕೆ ಮನೆಯವರ ವಿರೋಧವಿದೆ. ಅದಕ್ಕಾಗಿ ಪಾಲಕರಿಂದ ರಕ್ಷಣೆ ಕೋರಿ ಇಬ್ಬರೂ ಕೋರ್ಟ್​ ಮೊರೆ ಹೋಗಿದ್ದಾರೆ.

ಒಂದೆಡೆ ಜಪ್ಪಯ್ಯ ಎಂದರೂ ಒಬ್ಬರನ್ನೊಬ್ಬರು ಬಿಟ್ಟುಕೊಡದ ಈ ಸಲಿಂಗಿ ಪ್ರೇಮಿಗಳು, ಇನ್ನೊಂದೆಡೆ ತಮ್ಮ ಮಕ್ಕಳ ಇಂಥ ಸ್ಥಿತಿ ಕಂಡು ರೋಧಿಸುತ್ತಿರುವ ಪಾಲಕರು... ಇವರ ನಡುವೆ ನ್ಯಾಯಮೂರ್ತಿಗಳಿಗೆ ಸ್ವಲ್ಪ ಗೊಂದಲವಾಗಿದ್ದು, ಸದ್ಯ ವಿಚಾರಣೆಯನ್ನು ಮುಂದೂಡಿದ್ದಾರೆ.

ಈ ಪ್ರಕರಣದಲ್ಲಿ ದಿಢೀರ್​ ನಿರ್ಧಾರಕ್ಕೆ ಬರುವುದು ಸರಿಯಲ್ಲ. ಈ ಇಬ್ಬರು ಯುವತಿಯರ ಜತೆಗೆ ಪಾಲಕರಿಗೂ ಕೌನ್ಸೆಲಿಂಗ್​ ಅಗತ್ಯವಿದೆ. ಆದ್ದರಿಂದ ಕೌನ್ಸೆಲಿಂಗ್​ ನೀಡಲಾಗುವುದು. ಯುವತಿಯರು ಹಾಗೂ ಅವರ ಹೆತ್ತವರ ಭಾವನೆಗಳನ್ನು ಅರ್ಥಮಾಡಿಕೊಳ್ಳಲು ಪ್ರಯತ್ನಿಸಲಾಗುವುದು. ಅದರ ಬಳಿಕವೇ ಪ್ರಕರಣದ ಬಗ್ಗೆ ತೀರ್ಪು ನೀಡಲಾಗುವುದು ಎಂದು ನ್ಯಾಯಮೂರ್ತಿಗಳು ತಿಳಿಸಿದ್ದಾರೆ.

ಈ ಇಬ್ಬರು ಯುವತಿಯರು ಕಳೆದ 2 ವರ್ಷಗಳಿಂದ ಒಬ್ಬರಿಗೊಬ್ಬರು ಪರಿಚಯವಿದ್ದು, ಇಬ್ಬರ ನಡುವಿನ ಸ್ನೇಹವು ಕ್ರಮೇಣ ಪ್ರೀತಿಗೆ ತಿರುಗಿದೆ. ಇಬ್ಬರೂ ಒಟ್ಟಿಗೆ ಜೀವನ ನಡೆಸುತ್ತಿರುವುದಾಗಿ ಕೋರ್ಟ್​ಗೆ ಹೇಳಿದ್ದಾರೆ. ಆದರೆ ಇದನ್ನು ಪಾಲಕರು ಒಪ್ಪದೇ ವಾಪಸ್​ ಮನೆಗೆ ಕರೆದುಕೊಂಡು ಹೋಗುವ ಪ್ರಯತ್ನ ಮಾಡುತ್ತಿದ್ದಾರೆ. ಈ ಇಬ್ಬರು ಯುವತಿಯರು ಎಲ್ಲಿ ನೆಲೆಸಿದ್ದರೂ ಅಲ್ಲಿಗೆ ಬಂದು ತಮ್ಮ ಮಕ್ಕಳನ್ನು ಕರೆದುಕೊಂಡು ಹೋಗುತ್ತಿರುವ ಕಾರಣ, ರಕ್ಷಣೆ ಕೋರಿ ಇಬ್ಬರೂ ಕೋರ್ಟ್​ ಮೊರೆ ಹೋಗಿದ್ದಾರೆ.

ಪ್ರಸಿದ್ಧ ಕೌನ್ಸೆಲರ್​ ಹಾಗೂ ಮನೋಶಾಸ್ತ್ರಜ್ಱರಾಗಿರುವ ಡಾ.ವಿದ್ಯಾ ದಿನಕರನ್​ ಅವರ ಬಳಿಗೆ ಯುವತಿಯರು ಹಾಗೂ ಪಾಲಕರನ್ನು ಕಳುಹಿಸಿರುವ ನ್ಯಾಯಮೂರ್ತಿಗಳು ಕೌನ್ಸೆಲಿಂಗ್​ ನೆರವೇರಿಸಿ ಆ ಬಗ್ಗೆ ಕೋರ್ಟ್​ಗೆ ವರದಿ ನೀಡುವಂತೆ ಹೇಳಿದ್ದಾರೆ. (ಏಜೆನ್ಸೀಸ್​)

https://www.vijayavani.net/s-maski-byelection-compalint-by-congress/

https://www.vijayavani.net/s-udyogamitra-mnarega/

https://www.vijayavani.net/s-nashik-people-to-pay-%E2%82%B95-for-market-visit-to-be-fined-%E2%82%B9500-for-staying-over-1-hour/

https://www.vijayavani.net/s-teen-injured-in-crash-still-fighting/