ಕರಾಚಿ (ಪಾಕಿಸ್ತಾನ): ಇದು 73 ವರ್ಷಗಳ ಹಿಂದಿನ ಕಥೆ. 1947ರ ಆಗಸ್ಟ್ 14ರ ಮಧ್ಯರಾತ್ರಿ. ಭಾರತಕ್ಕೆ ಸ್ವಾತಂತ್ರ್ಯ ಸಿಕ್ಕ ದಿನ. ಆದರೆ ಆಗ ಭಾರತ-ಪಾಕಿಸ್ತಾನ ವಿಭಜನೆಯಾದಾಗ ತಮ್ಮ ಕುಟುಂಬಸ್ಥರನ್ನು ಕಳೆದುಕೊಂಡವರು ಅದೆಷ್ಟೋ ಮಂದಿ. ಇಲ್ಲಿಂದ ಅಲ್ಲಿ, ಅಲ್ಲಿಂದ ಇಲ್ಲಿ... ಹೀಗೆ ಒಂದೇ ಕುಟುಂಬದ ಜನರು ವಿಭಜನೆಗೊಂಡು ವರ್ಷಾನುಗಟ್ಟಲೆ ಕಣ್ಣೀರಲ್ಲೇ ಕೈತೊಳೆದವರು ಲೆಕ್ಕಕ್ಕಿಲ್ಲ.
ಅಂಥವರಲ್ಲಿ ಒಬ್ಬಾಕೆ ದಾಫಿಯಾ ಬಾಯಿ ಅಲಿಯಾಸ್ ಆಯೇಷಾ. ಆಗ ಈಕೆ ಇನ್ನೂ 13 ವರ್ಷದ ಬಾಲೆ. ಸ್ವಾತಂತ್ರ್ಯ ಬಂದ ಸಂದರ್ಭದಲ್ಲಿ ಪಾಕಿಸ್ತಾನದ ಪಾಪಿಗಳಿಂದ ಅಪಹರಣಗೊಂಡವಳ ಪೈಕಿ ಈ ಬಾಲೆಯೂ ಒಬ್ಬಳು. ಈಕೆಗೆ ಪಡಬಾರದ ಕಷ್ಟ ಕೊಟ್ಟು, ಮುಸ್ಲಿಂ ಧರ್ಮಕ್ಕೆ ಮತಾಂತರ ಮಾಡಿದ ಪಾಕಿಗಳು, ನಂತರ 13 ವರ್ಷದ ಬಾಲಕಿಯನ್ನೇ ವಿವಾಹವಾದರು.
ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಮೈಲ್ಸಿ ಎಂಬ ಪಟ್ಟಣದಲ್ಲಿ ಬಾಲಕಿಯ ಸಂಸಾರ ಶುರುವಾಯಿತು. ಮತಾಂತರದ ನಂತರ ದಾಫಿಯಾ ಬಾಯಿ ಆಯೇಷಾ ಆದಳು. ಅಲ್ಲಿಂದ ಏಳು ದಶಕಗಳ ಕಾಲವೂ ಈಕೆಯದ್ದು ಒಂದೇ ಒಂದು ಆಸೆ, ತನ್ನ ತವರೂರು ಭಾರತವನ್ನು ಕಾಣುವುದು, ಅಲ್ಲಿರುವ ತನ್ನ ಕುಟುಂಬವನ್ನು ಸೇರುವುದು.
