ಕಾಂಗ್ರೆಸ್​ನಿಂದ ಚುನಾವಣೆಗೆ ಸ್ಪರ್ಧಿಸಲಿದ್ದಾನೆ 'ರಾಮಾಯಣದ ಹನುಮಂತ'; ಎಲ್ಲಿ, ಯಾರ ವಿರುದ್ಧ?

ನವದೆಹಲಿ: ದೇಶ ಪಂಚರಾಜ್ಯಗಳ ಚುನಾವಣೆಗೆ ಸಜ್ಜಾಗುತ್ತಿದ್ದು, ಆ ಪೈಕಿ ಕಾಂಗ್ರೆಸ್​ನಿಂದ 'ರಾಮಾಯಣದ ಹನುಮಾನ್' ಚುನಾವಣಾ ಕಣಕ್ಕಿಳಿಯುವುದು ಖಚಿತವಾಗಿದೆ. ರಾಜ್ಯವೊಂದರ ವಿಧಾನಸಭಾ ಚುನಾವಣಾ ಅಭ್ಯರ್ಥಿಗಳ ಪಟ್ಟಿಯನ್ನು ಕಾಂಗ್ರೆಸ್ ಬಿಡುಗಡೆ ಮಾಡಿದ್ದು, ಅದರಲ್ಲಿ ಈ ಅಂಶ ಕಂಡುಬಂದಿದೆ.

ಮಿಜೋರಾಂ, ಛತ್ತೀಸ್‌ಗಢ, ಮಧ್ಯಪ್ರದೇಶ, ರಾಜಸ್ಥಾನ ಮತ್ತು ತೆಲಂಗಾಣ ರಾಜ್ಯಗಳಲ್ಲಿ ವಿಧಾನಸಭಾ ಚುನಾವಣೆ ನಡೆಯಲಿದ್ದು, ಆ ಪೈಕಿ ಮಧ್ಯಪ್ರದೇಶದ ಚುನಾವಣೆಗೆ ಸಂಬಂಧಿಸಿದಂತೆ ಕಾಂಗ್ರೆಸ್ ಇಂದು ತಮ್ಮ ಪಕ್ಷದ 144 ಅಭ್ಯರ್ಥಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ.

ಕಾಂಗ್ರೆಸ್ ಬಿಡುಗಡೆ ಮಾಡಿದ ಅಭ್ಯರ್ಥಿಗಳ ಪಟ್ಟಿಯಲ್ಲಿ ಮಾಜಿ ಮುಖ್ಯಮಂತ್ರಿ ಕಮಲ್​ನಾಥ್ ಹೆಸರಿದ್ದು, ಅವರು ಛಿಂದ್ವಾರ ಕ್ಷೇತ್ರದಿಂದ ಸ್ಪರ್ಧೆ ಮಾಡಲಿದ್ದಾರೆ. ಹಾಗೇ ನಟ ವಿಕ್ರಮ್ ಮಸ್ತಲ್ ಹೆಸರಿದ್ದು, ಅವರು ಬುಧ್ನಿ ಕ್ಷೇತ್ರದಿಂದ ಸ್ಪರ್ಧೆ ಮಾಡಲಿದ್ದಾರೆ. ಈ ಕ್ಷೇತ್ರದಲ್ಲಿ ಇವರ ಪ್ರತಿಸ್ಪರ್ಧಿ ಆಗಿ ಈಗಿನ ಸಿಎಂ ಶಿವರಾಜ್ ಸಿಂಗ್ ಚೌಹಾಣ್ ಸ್ಪರ್ಧೆ ಮಾಡಲಿದ್ದಾರೆ.

ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಈ ಕ್ಷೇತ್ರದಲ್ಲಿ ಕಾಂಗ್ರೆಸ್​ನ ಹಿರಿಯ ನಾಯಕ ಅರುಣ್ ಯಾದವ್ ವಿರುದ್ಧ ಸ್ಪರ್ಧೆ ಮಾಡಿದ್ದ ಶಿವರಾಜ್ ಸಿಂಗ್ ಚೌಹಾಣ್ 58 ಸಾವಿರ ಮತಗಳ ಅಂತರದಿಂದ ಭರ್ಜರಿ ಜಯ ಗಳಿಸಿದ್ದರು.

ಇದನ್ನೂ ಓದಿ: ನನ್ನ ಜೀವನದ ಮೊದಲ ಬಿಜಿನೆಸ್​ ಕೋಳಿ ವ್ಯಾಪಾರ; ಈಗ ಮೊಟ್ಟೆ-ಕೋಳಿ ತಿನ್ನಲ್ಲ: ಡಿಸಿಎಂ ಡಿ.ಕೆ.ಶಿವಕುಮಾರ್

ಯಾರು ಈ ವಿಕ್ರಮ್ ಮಸ್ತಲ್?

ಹಿಂದಿ ಕಿರುತೆರೆಯಲ್ಲಿ ಪ್ರಸಾರವಾಗುತ್ತಿದ್ದ ಆನಂದ್ ಸಾಗರ್ ಅವರ 'ರಾಮಾಯಣ್​'ನಲ್ಲಿ ಹನುಮಾನ್ ಪಾತ್ರ ಮಾಡಿದ್ದವರು ವಿಕ್ರಮ್ ಮಸ್ತಲ್. ಈ ಧಾರಾವಾಹಿಯಲ್ಲಿ ಗುರ್ಮೀತ್ ಚೌಧರಿ ರಾಮ ಹಾಗೂ ದೆಬಿನಾ ಬೊನರ್ಜಿ ಸೀತೆ ಪಾತ್ರ ಮಾಡಿದ್ದರು. ಹನುಮಾನ್ ಪಾತ್ರ ಮಾಡಿ ಜನಪ್ರಿಯತೆ ಗಳಿಸಿದ್ದ ವಿಕ್ರಮ್ ಮಸ್ತಲ್ ಈ ವರ್ಷದ ಜೂನ್​ನಲ್ಲಿ ಕಾಂಗ್ರೆಸ್​ಗೆ ಸೇರ್ಪಡೆ ಆಗಿದ್ದರು.

ವಿಕ್ರಮ್ ಮಸ್ತಲ್​ ಇತ್ತೀಚೆಗೆ ಬಿಡುಗಡೆ ಆಗಿದ್ದ 'ಆದಿಪುರುಷ್' ಸಿನಿಮಾದ ಹನುಮಾನ್ ಪಾತ್ರದ ಕೆಲವು ಸಂಭಾಷಣೆ ಕುರಿತು ಆಕ್ಷೇಪ ವ್ಯಕ್ತಪಡಿಸಿದ್ದರು. ವಿಕ್ರಮ್​ ರಾಮಾಯಣ್ ಧಾರಾವಾಹಿ ಮಾತ್ರವಲ್ಲದೆ ಟಾಪ್​ ಗೇರ್​ ಸಿನಿಮಾ ಹಾಗೂ ಎರಡು ವೆಬ್​ಸೀರಿಸ್​ನಲ್ಲೂ ನಟಿಸಿದ್ದರು.

ಕಾಂಗ್ರೆಸ್​ ಬಿಡುಗಡೆ ಮಾಡಿರುವ 144 ಅಭ್ಯರ್ಥಿಗಳ ಪಟ್ಟಿಯಲ್ಲಿ ಸಾಮಾನ್ಯ ವರ್ಗದ 47, ಒಬಿಸಿ-39, ಎಸ್​ಟಿ-30, ಎಸ್​ಸಿ-22, ಮುಸ್ಲಿಂ-1 ಹಾಗೂ 50 ಮಹಿಳಾ ಅಭ್ಯರ್ಥಿಗಳಿದ್ದಾರೆ. ಮತ್ತೊಂದೆಡೆ ಬಿಜೆಪಿ ಈಗಾಗಲೆ 136 ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ ಮಾಡಿದೆ. ಮಧ್ಯಪ್ರದೇಶದಲ್ಲಿ ನ. 17ರಂದು ಒಂದೇ ಹಂತದ ಚುನಾವಣೆ ನಡೆಯಲಿದ್ದು, ಡಿ. 3ರಂದು ಫಲಿತಾಂಶ ಪ್ರಕಟವಾಗಲಿದೆ.

https://www.vijayavani.net/woman-wakes-up-with-200-bug-bites-at-hotel

https://www.vijayavani.net/begging-foreigner-woman-life-changed-by-indian-youth-english-with-merlin