60 ಸೆಕೆಂಡ್​ನಲ್ಲಿ UPSC ಪರೀಕ್ಷೆ ಫೇಲ್​ ಆಗೋದು ಹೇಗೆ? ಐಎಎಸ್​ ಅಧಿಕಾರಿ ಹಂಚಿಕೊಂಡ ವಿಡಿಯೋ ವೈರಲ್!

ನವದೆಹಲಿ: ಕೇಂದ್ರ ಲೋಕಸೇವಾ ಆಯೋಗ (ಯುಪಿಎಸ್​ಸಿ) ನಡೆಸುವ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಬೇಕೆಂಬುದು ಹಲವರ ಕನಸು. ಅದಕ್ಕಾಗಿ ಹಗಲಿರುಳು ಓದಿ ಯುಪಿಎಸ್​ಸಿ ಸಾಧನೆ ಮಾಡಿದವರು ಬಹುತೇಕರಿದ್ದಾರೆ. ಸಾಧಕರ ಕತೆಗಳನ್ನು ನಾವು-ನೀವೆಲ್ಲ ಓದಿದ್ದೇವೆ. ಯುಪಿಎಸ್​ಸಿ ಪರೀಕ್ಷೆ ಪಾಸ್​ ಮಾಡೋದು ಹೇಗೆ ಅಂತಾ ಅನೇಕರು ಸಲಹೆ ನೀಡುವುದನ್ನು ನೋಡಿದ್ದೇವೆ. ಆದರೆ, ಕೇವಲ 60 ಸೆಕೆಂಡ್​ಗಳಲ್ಲಿ ಯುಪಿಎಸ್​ಸಿ ಅನುತ್ತೀರ್ಣ ಆಗೋದು ಹೇಗೆ ಅಂತಾ ಐಎಎಸ್​ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಐಎಎಸ್​ ಅಧಿಕಾರಿ ಅವನೀಶ್​ ಶರಣ್​ ಅವರು ಯುಪಿಎಸ್​ಸಿ ಫೇಲ್​ ಆಗೋದು ಹೇಗೆ ಅಂತಾ ವಿಡಿಯೋವೊಂದನ್ನು ತಮ್ಮ ಟ್ವಿಟರ್​ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. 1 ನಿಮಿಷ 4 ಸೆಕೆಂಡ್​ ವಿಡಿಯೋದಲ್ಲಿ ಫೇಲ್​ ಆಗೋದು ಹೇಗೆ ಎಂಬುದನ್ನು ವಿವರಿಸಿದ್ದಾರೆ. ಇದೀಗ ವಿಡಿಯೋ ವೈರಲ್​ ಆಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಮೀಮ್ಸ್​ಗಳ ಭರಾಟೆ ಜೋರಾಗಿದೆ.

ಸರಿಯಾದ ತಂತ್ರಗಾರಿಕೆ ಇಲ್ಲದೆ ಅಧ್ಯಯನ ಆರಂಭಿಸಿ. ಆಗಾಗ ನಿಮ್ಮ ತಂತ್ರಗಾರಿಕೆಯನ್ನು ಬದಲಾಯಿಸುತ್ತಿರಿ. ಯೂಟ್ಯೂಬ್​ನಲ್ಲಿರುವ ಪ್ರತಿಯೊಂದು ತಂತ್ರಗಾರಿಕೆಯನ್ನು ನೋಡುತ್ತಿರಿ. ನಿಮ್ಮದೇ ಆದ ಯಾವುದೇ ಯೋಜನೆ ಹಾಕಿಕೊಳ್ಳಬೇಡಿ. ಕೇವಲ ಪ್ರಿಲಿಮ್ಸ್​ ಪರೀಕ್ಷೆ ಮೇಲೆ ಮಾತ್ರ ಗಮನವಿಡಿ. ಪ್ರತಿದಿನ ನ್ಯೂಸ್​ ಪೇಪರ್​ ಓದಬೇಡಿ ಮತ್ತು ನ್ಯೂಸ್​ ಪೇಪರ್​ಗೆ ಸಬ್​ಸ್ಕ್ರೈಬ್​ ಆಗಿ ಆದರೆ ಸಂಪಾದಕೀಯ ವಿಭಾಗವನ್ನು ಓದಬೇಡಿ...ಹೀಗೆ ಅನೇಕ ಅಂಶಗಳನ್ನು ಅವನೀಶ್​ ಶರಣ್​ ಅವರು ಹಂಚಿಕೊಳ್ಳುವ ಮೂಲಕ ಯುಪಿಎಸ್​ಸಿ ಆಕಾಂಕ್ಷಿಗಳನ್ನು ಎಚ್ಚರಿಸುವ ಕೆಲಸ ಮಾಡಿದ್ದಾರೆ.

ಸರಿಯಾದ ರೀತಿಯಲ್ಲಿ ಅಧ್ಯಯನ ಮಾಡಬೇಕೆಂಬುದನ್ನು ಈ ರೀತಿ ವಿಡಿಯೋ ಮೂಲಕ ವಿಭಿನ್ನವಾಗಿ ಅವನೀಶ್​ ಶರಣ್​ ತಿಳಿಸಿದ್ದಾರೆ. ಅಂದಹಾಗೆ ಅವನೀಶ್​ ಶರಣ್​ ಅವರು 2009 ಬ್ಯಾಚ್​ನ ಐಎಎಸ್​ ಅಧಿಕಾರಿ. ಇವರು ಛತ್ತೀಸ್​ಗಢ ಕೇಡರ್​ನವರು. ಆಲ್​ ಇಂಡಿಯಾ ರ್ಯಾಂಕ್​ 77 ಗಳಿಸುವ ಮೂಲಕ ಯುಪಿಎಸ್​ಸಿ ಪರೀಕ್ಷೆಯಲ್ಲಿ ಉತ್ತೀರ್ಣರಾದರು. ಅವನೀಶ್​ ಶರಣ್​ ಅವರ ವಿಡಿಯೋ ಈಗಾಗಲೇ 60 ಸಾವಿರಕ್ಕೂ ಅಧಿಕ ವೀಕ್ಷಣೆಯನ್ನು ಪಡೆದುಕೊಂಡಿದೆ. 5 ಸಾವಿರಕ್ಕೂ ಅಧಿಕ ಮಂದಿ ಲೈಕ್ಸ್​ ಮಾಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/r-bigg-boss-15-bigg-boss-contestant-attempts-to-ends-her-life-in-bigg-boss-house/

https://www.vijayavani.net/r-youtube-to-get-rid-of-dislike-counts-to-prevent-online-harassment/

https://www.vijayavani.net/r-meet-23-year-old-lady-don-loves-to-have-weapons-using-sword-knife/