ವಯನಾಡಿಗೆ ಆಗಮಿಸಿದ ಪ್ರಿಯಾಂಕಾ ಅವರಿಗೆ ಕಾರ್ಯಕರ್ತರು ಭರ್ಜರಿ ಸ್ವಾಗತ ನೀಡಿದರು. ರೋಡ್ ಷೋ ನಂತರ ಅವರು ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿ ನಾಮಪತ್ರ ಸಲ್ಲಿಸಿದರು. ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ಸೋದರ ರಾಹುಲ್ ಗಾಂಧಿ ಮುಂತಾದವರು ಜೊತೆಗಿದ್ದರು. ತಾಯಿ ಸೋನಿಯಾ ಗಾಂಧಿ ಸ್ಥಳದಲ್ಲಿದ್ದರು. ಪತಿ ರಾಬರ್ಟ್ ವಾದ್ರಾ ಮತ್ತು ಪುತ್ರ ರೆಹಾನ್ ಡಿಸಿ ಕಚೇರಿ ಹೊರಗಿದ್ದರು. ‘ನನ್ನ ತಂದೆ ರಾಜೀವ್ ಗಾಂಧಿ ಪರವಾಗಿ ಪ್ರಚಾರ ಮಾಡಿದಾಗ ನನಗೆ 17 ವರ್ಷ. ನಂತರ ನನ್ನ ತಾಯಿ, ಸಹೋದರ ಹಾಗೂ ಇತರ ಅನೇಕ ನಾಯಕರ ಪರವಾಗಿಯೂ ಪ್ರಚಾರ ಮಾಡಿದೆ. ಕಳೆದ 35 ವರ್ಷಗಳಿಂದ ಭಿನ್ನ ಭಿನ್ನ ಚುನಾವಣೆಗಳಲ್ಲಿ ಪ್ರಚಾರ ಮಾಡಿದ್ದೇನೆ. ಆದರೆ ಈಗ ಮೊದಲ ಬಾರಿಗೆ ಚುನಾವಣೆಗೆ ಸ್ಪರ್ಧಿಸುತ್ತಿದ್ದೇನೆ ಮತ್ತು ನನಗಾಗಿ ನಿಮ್ಮ ಬೆಂಬಲ ಕೋರುತ್ತಿದ್ದೇನೆ’ಎಂದು ಪ್ರಿಯಾಂಕಾ ಹೇಳಿದರು. ‘ನೀವು ಎದುರಿಸುತ್ತಿರುವ ಸಮಸ್ಯೆಗಳ ಬಗ್ಗೆ ರಾಹುಲ್ ನನಗೆ ವಿವರವಾಗಿ ತಿಳಿಸಿದ್ದಾರೆ. ನೇರವಾಗಿ ನೀವಿದ್ದಲ್ಲಿಗೇ ಬಂದು ನಿಮ್ಮ ಸಮಸ್ಯೆ, ಕಷ್ಟಗಳನ್ನು ಆಲಿಸಿ ಪರಿಹಾರ ಹುಡುಕಲು ಯತ್ನಿಸುವೆ’ ಎಂದು ಅವರು ಹೇಳಿದರು.
