ಬೆಂಗಳೂರು: ಕನ್ನಡದ ಅತೀ ದೊಡ್ಡ ರಿಯಾಲಿಟಿ ಶೋ ಎಂದೇ ಖ್ಯಾತಿ ಗಳಿಸಿರುವ ಬಿಗ್ ಬಾಸ್ ಸೀಸನ್ 11ಕ್ಕೆ (BBKS11) ಈಗಾಗಲೇ ಅದ್ಧೂರಿ ಚಾಲನೆ ದೊರಕಿದ್ದು, ಎಂದಿನಂತೆ ಅಭಿನಯ ಚಕ್ರವರ್ತಿ, ನಟ ಕಿಚ್ಚ ಸುದೀಪ್ ಅವರೇ ಈ ಬಾರಿಯೂ ನಿರೂಪಣೆ ಜವಾಬ್ದಾರಿಯನ್ನು ಹೊತ್ತಿರುವುದು ವೀಕ್ಷಕರಲ್ಲಿ ಭಾರೀ ಸಂತಸ ಮೂಡಿಸಿದೆ. ಗ್ರ್ಯಾಂಡ್ ಓಪನಿಂಗ್ (BiggBoss Kannada) ಆಗಿದ್ದೇ ತಡ ಸ್ವರ್ಗ-ನರಕಕ್ಕೆ 17 ಘಟಾನುಘಟಿ ಸ್ಪರ್ಧಿಗಳು ಇದೀಗ ಮನೆಯೊಳಗೆ ಪ್ರವೇಶಿಸಿ, ತಮ್ಮ ಅಸಲಿ ಆಟವನ್ನು ಶುರು ಮಾಡಿದ್ದಾರೆ. ಮೊದಲ ದಿನವೇ ಮನೆಯಲ್ಲಿ ಮನಸ್ತಾಪಗಳಿಗಿಂತಲೂ ಮಾತಿನ ಭರಾಟೆಯೇ ಜೋರಾಗಿದ್ದು, ಪರಸ್ಪರ ವಾಗ್ವಾದಗಳು ನೋಡುಗರ ತಲೆಕೆಡಿಸಿತು. ಸಣ್ಣ ಕಿಡಿ ಮೊದಲನೇ ವಾರಾಂತ್ಯದವರೆಗೂ ನಡೆದಿದ್ದು ಮತ್ತೊಂದು ಇತಿಹಾಸ. ಈ ಜಟಾಪಟಿಯ ರೂವಾರಿಗಳು ಲಾಯರ್ ಜಗದೀಶ್ ಮತ್ತು ಚೈತ್ರಾ ಕುಂದಾಪುರ ಎಂದು ಹೇಳಿದ್ರೆ ಖಂಡಿತ ತಪ್ಪಾಗಲಾರದು.
