ಹೀಗೆ ಮಾಡಿದ್ದಕ್ಕೇನಾ ಕರೊನಾವನ್ನು ಕಟ್ಟಿ ಹಾಕಿದ್ದು ಚೀನಾ?

ನವದೆಹಲಿ: ದೇಶಾದ್ಯಂತ ಲಾಕ್​ಡೌನ್​ ನಿರ್ಬಂಧಗಳು ಕಡಿಮೆಯಾಗುತ್ತಿದ್ದರೂ ಕರೊನಾ ಭೀತಿ ನೀಗುತ್ತಿಲ್ಲ. ದಿನ ಕಳೆದಂತೆ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಲೇ ಇದೆ. ಜೂನ್​ ವೇಳೆಗೆ ಅಂದಾಜು ಎರಡು ಲಕ್ಷ ಜನರು ಸೋಂಕಿಗೆ ಒಳಗಾಗುವ ಅಂದಾಜಿದೆ. ಸಾವಿನ ಸಂಖ್ಯೆಯು ಏರಲಿದೆ.

ಬೇರೆ ದೇಶಗಳಿಂದ ಚೀನಾ ಅದೆಷ್ಟೇ ಟೀಕೆಗಳಿಗೆ ಗುರಿಯಾದರೂ ಕರೊನಾ ನಿಯಂತ್ರಣ ವಿಚಾರದಲ್ಲಿ ಅವರನ್ನು ಸರಿಗಟ್ಟಲು ಸಾಧ್ಯವೇ ಇಲ್ಲವೇನೋ ಎಂಬಂತೆ ಅಲ್ಲಿ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ.

ಇದನ್ನೂ ಓದಿ; ಕರೊನಾ ವೈರಸ್​ ಕೃತಕ ಸೃಷ್ಟಿ, ಅಮೆರಿಕ ವಾದಕ್ಕೆ ಸಿಕ್ತಾ ಭಾರತದ ಬೆಂಬಲ? 

ಚೀನಾದ ಪ್ರಮುಖ ವಾಣಿಜ್ಯ ಪ್ರದೇಶವೂ ಆಗಿರುವ ವುಹಾನ್​ನಲ್ಲಿ ಕರೊನಾ ಕಾಣಿಸಿಕೊಂಡಾಗ ವಿಧಿಸಿದ ಲಾಕ್​ಡೌನ್​ಅನ್ನು ಅಷ್ಟೊಂದು ಕಟ್ಟುನಿಟ್ಟಾಗಿ ಬೇರಾರೂ ಪಾಲಿಸಿಯೇ ಇಲ್ಲವೇನೋ? ಇಡೀ ನಗರದ ರಸ್ತೆಗಳು ಎರಡೂವರೆ ತಿಂಗಳುಗಳ ಕಾಲ ನಿರ್ಜನವಾಗಿದ್ದವು. ಪ್ರತಿಯೊಬ್ಬರ ಮೇಲೂ ಕಣ್ಣಿಡಲಾಗಿತ್ತು. ಶಂಕಿತರು ಕ್ವಾರಂಟೈನ್​ನಿಂದ ತಪ್ಪಿಸಿಕೊಳ್ಳದಂತೆ ನಿಗಾ ಇಟ್ಟಿದ್ದರು. ಸೋಂಕಿತರಿಗೆ ಐಸೋಲೇಷನ್​, ಚಿಕಿತ್ಸೆಯಲ್ಲಿ ಯಾವುದೇ ವ್ಯತ್ಯಯವಾಗದಂತೆ ನೋಡಿಕೊಳ್ಳಲಾಯಿತು.

ಕರೊನಾ ನಂತರದ ಪರಿಸ್ಥಿತಿ ಮೇಲೂ ಚೀನಾ ಎಷ್ಟೊಂದು ಕಣ್ಣಿಟ್ಟಿದೆ ಎಂಬುದಕ್ಕೆ ಇಲ್ಲಿದೆ ಸಾಕ್ಷಿ. ವುಹಾನ್​ನಲ್ಲಿ ಕಳೆದ ವಾರಾಂತ್ಯದಲ್ಲಿ ಮತ್ತೆ ಆರು ಜನರಲ್ಲಿ ಸೋಂಕು ಕಾಣಿಸಿಕೊಂಡಿದೆ. ಇದನ್ನು ಕ್ಲಸ್ಟರ್​ ಪ್ರಕರಣವೆಂದು ಪರಿಗಣಿಸಿದ ಸರ್ಕಾರ ಇಡೀ ನಗರದಲ್ಲಿನ ಪ್ರತಿಯೊಬ್ಬರಿಗೂ ಕರೊನಾ ಪರೀಕ್ಷೆ ನಡೆಸುವಂತೆ ಆದೇಶಿಸಿದೆ.

ಗುರುವಾರ ( ಮೇ 14) ಸೋಂಕಿತರು ಕಂಡುಬಂದ ವಸತಿ ಸಮುಚ್ಚಯದಲ್ಲಿರುವ ಜನರ ಪರೀಕ್ಷೆ ಆರಂಭಿಸಲಾಗಿದೆ. ವುಹಾನ್​ನಲ್ಲಿ 110 ಲಕ್ಷ ಜನರಿದ್ದಾರೆ. ಹತ್ತು ದಿನಗಳ ಒಳಗಾಗಿ ಎಲ್ಲರ ಪರೀಕ್ಷೆ ನಡೆಸುವ ಅಸಾಧ್ಯವೆನಿಸುವ ಕೆಲಸಕ್ಕೆ ಕೈ ಹಾಕಿದೆ ಚೀನಾ ಸರ್ಕಾರ.

ಇದನ್ನೂ ಓದಿ; ತಿಳಿದಿರಿ.. ಆಧಾರನಷ್ಟೇ ಮುಖ್ಯವಾಗುತ್ತಿದೆ ಆರೋಗ್ಯ ಸೇತು ಆ್ಯಪ್​, ಪ್ರಯಾಣಕ್ಕಂತೂ ಬೇಕೆಬೇಕು..!

ಕರೊನಾ ಕಾಣಿಸಿಕೊಂಡ ಮೂರು ತಿಂಗಳ ಬಳಿಕ ಭಾರತಕ್ಕೆ ಪ್ರತಿದಿನ ಒಂದು ಲಕ್ಷ ಜನರಿಗೆ ಕರೊನಾ ಪರೀಕ್ಷೆ ಮಾಡುವ ಸಾಮರ್ಥ್ಯ ಬಂದಿದೆ. ಅಂಥದ್ದರಲ್ಲಿ ವುಹಾನ್​ ಒಂದರಲ್ಲಿಯೇ ಪ್ರತಿದಿನ 10 ಲಕ್ಷಕ್ಕೂ ಅಧಿಕ ಜನರ ಪರೀಕ್ಷೆ ಸಾಧ್ಯವೇ ಎಂಬ ಪ್ರಶ್ನೆ ಎದುರಾಗಿದೆ. ಪ್ರತಿಯೊಬ್ಬರನ್ನು ಪರೀಕ್ಷೆಗೆ ಒಳಪಡಿಸಬೇಕೆಂದು ಸರ್ಕಾರ ಆದೇಶ ಹೊರಡಿಸಿರುವುದನ್ನು ಸ್ಥಳೀಯಾಡಳಿತ ಖಚಿತ ಪಡಿಸಿದೆ.

ಚೀನಾದಲ್ಲಿ ವರದಿಯಾದ ಕರೊನಾ ಪ್ರಕರಣಗಳ ಪೈಕಿ ಶೇ.90ಕ್ಕೂ ಅಧಿಕ ಪ್ರಕರಣಗಳು ವುಹಾನ್​ನಿಂದಲೇ ವರದಿಯಾಗಿದ್ದವು. 4,500ಕ್ಕೂ ಅಧಿಕ ಸಾವುಗಳಲ್ಲಿ ವುಹಾನ್​ನಲ್ಲಿ 3800ಕ್ಕೂ ಅಧಿಕ ಜನರು ಕೋವಿಡ್​ಗೆ ಬಲಿಯಾಗಿದ್ದರು.

https://www.vijayavani.net/school-may-work-in-shifts-looks-at-odd-even-model/