ನಷ್ಟದ ಹಾದಿಯಲ್ಲಿ ಬಾಲಿವುಡ್! ಬಾಕ್ಸ್ ಆಫೀಸ್​ ಕಮಾಲ್​ಗೆ ಪರದಾಡುತ್ತಿರುವ ಉದ್ಯಮಕ್ಕೆ ವರವಾಗುತ್ತಾ ಈ 2 ಚಿತ್ರ? | Bollywood

Bollywood: ಕಳೆದ ವರ್ಷ ಪ್ರೇಕ್ಷಕರಿಗೆ ಭರಪೂರ ಮನರಂಜನೆ ನೀಡುವಲ್ಲಿ ಬಹುತೇಕ ಭಾರತೀಯ ಸಿನಿಮಾಗಳು ಯಶಸ್ವಿಯಾಗಿ, ಬಾಕ್ಸ್​ ಆಫೀಸ್​ನಲ್ಲಿ ನಿರೀಕ್ಷೆಗಳನ್ನು ಮೀರಿ ಲಾಭ ಗಳಿಸಿತು. ಸ್ಯಾಂಡಲ್​ವುಡ್​, ಟಾಲಿವುಡ್​, ಕಾಲಿವುಡ್ ಚಿತ್ರಗಳು ಸೋಲಿನ​ ಲೆಕ್ಕಾಚಾರಗಳನ್ನೆಲ್ಲಾ ಹಿಂದಿಕ್ಕಿ ಉತ್ತಮ ಲಾಭವನ್ನು ನೋಡಿದರೆ, ಬಾಲಿವುಡ್​ ಮತ್ತು ಮಾಲಿವುಡ್​ ಸಿನಿಮಾಗಳು ಪ್ರೇಕ್ಷಕರನ್ನು ಮೋಡಿ ಮಾಡುವಲ್ಲಿ ಎಡವಿ, ಒಳ್ಳೆಯ ಆದಾಯ ಗಳಿಸುವುದರಿಂದ ದೂರ ಉಳಿಯಿತು.

ಇದನ್ನೂ ಓದಿ: ಮನುಷ್ಯರಂತೆ ಎರಡು ಕಾಲುಗಳ ಮೇಲೆ ನಿಂತ ಕರಡಿ; ಚೀನಾದ Viral Video ನೋಡಿ ಇದು ನಕಲಿ ಅಲ್ಲವೇ ಎಂದ ನೆಟ್ಟಿಗರು

ಒಂದೇ ದಿನ ರಿಲೀಸ್​

ಇದೀಗ ಹೊಸ ವರ್ಷಕ್ಕೆ ಕಾಲಿಟ್ಟಿರುವ ಬಾಲಿವುಡ್​, ಸ್ಟಾರ್​ ನಟರ ಸಿನಿಮಾಗಳ ಮೇಲೆ ಭಾರೀ ನಿರೀಕ್ಷೆ ಇಟ್ಟುಕೊಂಡಿದೆ. ವರ್ಷದ ಮೊದಲ ತಿಂಗಳಲ್ಲೇ ತಮ್ಮ ಉದ್ಯಮಕ್ಕೆ ಯಾರ ಹಾಗೂ ಯಾವ ಚಿತ್ರ ಕೈಹಿಡಿಯಲಿದೆ ಎಂಬ ಲೆಕ್ಕಾಚಾರಗಳು ಜೋರಾಗಿವೆ. ಈ ಸಾಲಿನಲ್ಲಿ ಇಬ್ಬರು ಸ್ಟಾರ್​ಗಳ ಸಿನಿಮಾಗಳೇ ಮುಂಚೂಣಿಯಲ್ಲಿದ್ದು, ಒಂದೇ ದಿನದಂದು ತೆರೆ ಕಾಣುತ್ತಿದೆ. ಹಿರಿಯ ನಟ ಅಜಯ್​ ದೇವಗನ್​ ಅಭಿನಯದ 'ಆಜಾದ್'​ ಮತ್ತು ನಟಿ ಕಂಗನಾ ರಣಾವತ್ ನಟನೆಯ 'ಎಮರ್ಜೆನ್ಸಿ' ಚಿತ್ರಗಳು ಅಖಾಡಕ್ಕಿಳಿಯಲು ಸಜ್ಜಾಗಿವೆ.

ಎಮರ್ಜೆನ್ಸಿ-ಆಜಾದ್​

ಈ ಎರಡು ಸಿನಿಮಾ ಬಹುನಿರೀಕ್ಷಿತ ಚಿತ್ರಗಳ ಪಟ್ಟಿಗೆ ಸೇರಿದ್ದೇ ಆದರೂ ಕೆಲವೊಂದು ವಿಚಾರಗಳಿಂದ ಬಾಲಿವುಡ್​ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ವಿಫಲವಾಗುವುದು ಖಚಿತ ಎನ್ನಲಾಗಿದೆ. ಹಲವು ಬಾರಿ ಚಿತ್ರೀಕರಣ ಹಾಗೂ ಮುಂದೂಡಿಕೆ ಸಮಸ್ಯೆಗಳನ್ನು ಎದುರಿಸಿರುವ ಕಂಗನಾ ಚಿತ್ರ, ಸಾಕಷ್ಟು ವಿವಾದಗಳ ಜತೆ ನಿಗದಿತ ಸಮಯಕ್ಕೆ ಸಿನಿಮಾವನ್ನು ತೆರೆಗೆ ತರಲು ಪರದಾಡಿತು. ಇದರಿಂದ ಚಿತ್ರಪ್ರೇಮಿಗಳು ಕೂಡ ಬೇಸರಕ್ಕೆ ಒಳಗಾಗಿದ್ದಾರೆ. ಇನ್ನೂ 'ಆಜಾದ್'​ ಚಿತ್ರಕ್ಕೆ ಸರಿಯಾದ ಪ್ರಚಾರ ಕಾರ್ಯ ಸಿಗದೆ ಇರುವುದು ಸದ್ಯ ಚಿತ್ರತಂಡಕ್ಕೆ ಸೋಲು ನೀಡುವ ಸಾಧ್ಯತೆಗಳನ್ನು ಸೂಚಿಸಿವೆ.

ಸಿನಿಮಾ ಲವರ್ಸ್ ಡೇ

ಇದೆಲ್ಲವನ್ನೂ ಮೀರಿ ಜನವರಿ 17ರಂದು ರಿಲೀಸ್ ಆಗಲಿರುವ ಈ ಎರಡು ಸಿನಿಮಾಗಳು ಭಾರತೀಯ ಬಾಕ್ಸ್ ಆಫೀಸ್​ನಲ್ಲಿ ಹೇಗೆ ಕಮಾಲ್ ಮಾಡಲಿದೆ? ಸಿನಿಪ್ರಿಯರು ಹೇಗೆ ಸ್ಟಾರ್​ ನಟರ ಚಿತ್ರವನ್ನು ಸ್ವೀಕರಿಸುತ್ತಾರೆ ಎಂಬ ಕುತೂಹಲ ಹೆಚ್ಚಿದೆ. ಒಂದೇ ದಿನದಂದು ತೆರೆ ಕಾಣುತ್ತಿರುವ ಕಂಗನಾ ಹಾಗೂ ಅಜಯ್ ದೇವಗನ್ ಚಿತ್ರಗಳಿಗೆ ಮೊದಲ ದಿನ ಪ್ಲಸ್​ ಆಗಲಿದೆ. ಕಾರಣ, 17ರಂದು ಸಿನಿಮಾ ಲವರ್ಸ್ ಡೇ ಅಂಗವಾಗಿ ಥಿಯೇಟರ್ ಮತ್ತು ಮಲ್ಟಿಪ್ಲೆಕ್ಸ್​ಗಳಲ್ಲಿ ಟಿಕೆಟ್ ದರ ಕೇವಲ 99 ರೂ. ಇರಲಿದೆ. ಇದರಿಂದ ಚಿತ್ರಮಂದಿರಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರೇಕ್ಷಕರು ಹಾಜರಾಗುವ ಸಾಧ್ಯತೆಗಳಿವೆ. ಅಸಲಿಗೆ ಈ ಎರಡು ಸಿನಿಮಾಗಳು ಹೇಗೆ ಮೋಡಿ ಮಾಡಲಿದೆ ಎಂಬುದನ್ನು ಕಾದುನೋಡಬೇಕಿದೆ,(ಏಜೆನ್ಸೀಸ್).

https://www.vijayavani.net/pavala-syamala-cries-for-help-from-tollywood-actors