ಅಡುಗೆ ಮನೆಯಲ್ಲಿ ಅನ್ನ ಬೇಯಬೇಕೆಂದರೆ, ಅದಕ್ಕೆ ಸಾಕಷ್ಟು ಬೆಂಕಿ ಬೇಕು. ಒಂದೊಂದು ಅಡುಗೆಗೆ ಒಂದೊಂದು ರೀತಿಯ ಉಷ್ಣಾಂಶ ಬೇಕು, ಕಡಿಮೆಯಾದರೆ ಅಡುಗೆ ಬೇಯುವುದಿಲ್ಲ, ಅದನ್ನು ನಾವು ತಿನ್ನಲಾಗುವುದಿಲ್ಲ. ಅದೇ ರೀತಿ, ಎಲೆ ಹೀರಿಕೊಂಡ ಕಾರ್ಬನ್ ಡೈಆಕ್ಸೈಡ್ ನೀರಿನ ಜತೆ ಬೆರೆತು ಕಾರ್ಬೋಹೈಡ್ರೇಟ್ (ಗ್ಲೂಕೋಸ್) ಆಗಬೇಕೆಂದರೆ ಬಿಸಿಲಿನ ಶಾಖ ಬೇಕೇ ಬೇಕು. ಮರಗಿಡಗಳಲ್ಲಿ ದ್ಯುತಿಸಂಶ್ಲೇಷಣೆ ಚನ್ನಾಗಿ ಆಗಬೇಕೆಂದರೆ ವಾತಾವರಣದ ಉಷ್ಣಾಂಶವು ಆಯಾಯ ಸಸ್ಯಜಾತಿಗನುಗುಣವಾಗಿ ಸುಮಾರು 15ಡಿಗ್ರಿ ಸೆ.ನಿಂದ 35ಡಿಗ್ರಿ ಸೆ.ವರೆಗೆ ಇರಬೇಕು. ಉಷ್ಣಾಂಶತೆ ಕಡಿಮೆಯಾದರೆ ಕೆಲವು ಸಸ್ಯಜಾತಿಗಳಲ್ಲಿ ದ್ಯುತಿಸಂಶ್ಲೇಷಣೆ ಕಡಿಮೆಯಾಗುತ್ತದೆ. ಆದ್ದರಿಂದ ಚಳಿಗಾಲ ಮತ್ತು ಮಳೆಗಾಲದಲ್ಲಿ ದ್ಯುತಿಸಂಶ್ಲೇಷಣೆ ಕಡಿಮೆಯಾಗಿ ಮರಗಳಿಗೆ ಬೇಕಾದಂತಹ ಆಹಾರ ಉತ್ಪಾದನೆ ಕಡಿಮೆಯಾಗುತ್ತದೆ. ಆಗ ಮರಗಳು ಎಲೆಗಳಲ್ಲಿರುವ ಕಾರ್ಬೋಹೈಡ್ರೇಟ್ನ್ನು ತೆಗೆದುಕೊಂಡು ಎಲೆಗಳು ಉದುರಲು ಕಾರಣವಾಗುತ್ತದೆ.
