ಡಿಜಿಟಲ್ ಮೀಡಿಯಾಗೆ ಸಂಬಂಧಿಸಿದ ಹೊಸ ಕಾನೂನಿನ ಪ್ರಕಾರ ವಾಟ್ಸ್ಆ್ಯಪ್ ತನ್ನ ಮೂಲಕ ರವಾನೆಯಾದ ಸಂದೇಶದ ಮೂಲವನ್ನು ತಿಳಿಸಬೇಕು. ಅರ್ಥಾತ್, ಯಾವ ಮೇಸೆಜ್ ಯಾರಿಂದ ಯಾರಿಗೆ ಬಂತು ಹಾಗೂ ಅದರಲ್ಲಿ ಏನಿತ್ತು ಎಂಬುದನ್ನು ಸರ್ಕಾರ ಕೇಳಿದರೆ ಅದು ಒದಗಿಸಬೇಕು. ಹೀಗೆ ಮಾಡಿದರೆ ಎಂಡ್ ಟು ಎಂಡ್ ಎನ್ಕ್ರಿಪ್ಷನ್ ಅರ್ಥ ಕಳೆದುಕೊಳ್ಳುತ್ತದೆ. ಮಾತ್ರವಲ್ಲ ಇದು ಬಳಕೆದಾರರ ಖಾಸಗಿತನಕ್ಕೆ ಧಕ್ಕೆ ತಂದ ಹಾಗೆ ಆಗುತ್ತದೆ. ವಾಟ್ಸ್ಆ್ಯಪ್ ಸಂದೇಶದ ಜಾಡನ್ನು ಬಿಟ್ಟುಕೊಡುವುದು ಎಂದರೆ ಅದು ಪ್ರತಿ ಮೆಸೇಜ್ನ ಗುಟ್ಟನ್ನೇ ಬಿಟ್ಟುಕೊಟ್ಟ ಹಾಗೆ. ಮಾತ್ರವಲ್ಲ ದಿನವೊಂದಕ್ಕೆ ಕೋಟ್ಯಂತರ ಮೆಸೇಜ್ಗಳು ರವಾನೆ ಆಗುವಾಗ ಪ್ರತಿ ಮೆಸೇಜ್ ಎಲ್ಲಿಂದ ಬಂತು, ಎಲ್ಲಿಗೆ ಹೋಯಿತು, ಅದರಲ್ಲಿ ಏನಿತ್ತು ಎಂಬುದನ್ನು ಸಂಗ್ರಹಿಸಿಡುವುದು ದೊಡ್ಡ ಹೊರೆಯಾಗಲಿದೆ ಎಂದು ವಾಟ್ಸ್ಆ್ಯಪ್ ಹೇಳಿದೆ. ವಾಟ್ಸ್ಆ್ಯಪ್ ಸದ್ಯ ಭಾರತದಲ್ಲಿ ಸುಮಾರು 40 ಕೋಟಿ ಬಳಕೆದಾರರನ್ನು ಹೊಂದಿದೆ.
