2018ರಲ್ಲಿ ಇಸ್ರೋ ಅಧ್ಯಕ್ಷರು ಬದಲಾದಾಗ, ಕೆ. ಶಿವನ್ ಅವರ ಜತೆಗೆ ನನ್ನ ಹೆಸರು ಕೂಡ ಪಟ್ಟಿಯಲ್ಲಿತ್ತು. ಶಿವನ್ ಅವರಿಗೆ 60 ವರ್ಷ ತುಂಬಿದ್ದರಿಂದ ಹೊಸ ಇಸ್ರೋ ಮುಖ್ಯಸ್ಥರಾಗಲು ಇದು ನನ್ನ ಸರದಿ ಎಂದು ನಾನು ಭಾವಿಸಿದೆ. ಆದರೆ ಎಲ್ಲ ವಿರೋಧಾಭಾಸಗಳನ್ನು ಮುರಿದು ಶಿವನ್ ಇಸ್ರೋ ಮುಖ್ಯಸ್ಥರಾಗಿ ಆಯ್ಕೆಯಾದರು. ಹೀಗಿದ್ದರೂ ಕೂಡ ಕೆ. ಶಿವನ್ ಅವರು ವಿಎಸ್ಎಸ್ಸಿಯ ನಿರ್ದೇಶಕರಾಗಿಯೂ ಮುಂದುವರಿದರು. ಮೆರಿಟ್ ಅನುಸರಿಸಿದ್ದರೆ ನಿರ್ದೇಶಕ ಹುದ್ದೆ ನನಗೇ ಬರಬೇಕಿತ್ತು ಅಂತ ನೇರವಾಗಿ ಶಿವನ್ ಬಳಿ ವಿಚಾರಿಸಿದೆ. ಆದರೆ, ಅವರು ಉತ್ತರಿಸಲು ಹಿಂಜರಿಯುತ್ತಿದ್ದರು ಮತ್ತು ಪ್ರತಿ ಬಾರಿ ನುಣುಚಿಕೊಳ್ಳುತ್ತಿದ್ದರು. ನಂತರ ವಿಎಸ್ಎಸ್ಸಿ ಮಾಜಿ ನಿರ್ದೇಶಕ ಬಿ.ಎನ್.ಸುರೇಶ್ ಅವರ ನಿರ್ಣಾಯಕ ಮಧ್ಯಸ್ಥಿಕೆಯಿಂದ ನನಗೆ ನಿರ್ದೇಶಕ ಸ್ಥಾನ ಸಿಕ್ಕಿತು ಎಂದು ಸೋಮನಾಥ್ ಅವರು ಆತ್ಮಚರಿತ್ರೆಯಲ್ಲಿ ಬಹಿರಂಗಪಡಿಸಿದ್ದಾರೆ.
