24ರಂದು ಕಾಂಗ್ರೆಸ್ ಟಿವಿ ಕಾರ್ಯಾರಂಭ

ನವದೆಹಲಿ: ಕಾಂಗ್ರೆಸ್ ಪಕ್ಷದ ‘ಐಎನ್​ಸಿ ಟಿವಿ’ ಏಪ್ರಿಲ್ 24ರಂದು ಆರಂಭವಾಗಲಿದೆ. ಡಾ. ಬಿ.ಆರ್. ಅಂಬೇಡ್ಕರ್ ಜನ್ಮ ದಿನವಾದ ಬುಧವಾರ ಇದಕ್ಕೆ ಸಂಬಂಧಿಸಿದ ಮುನ್ನೋಟ ದಾಖಲೆಯನ್ನು ಪಕ್ಷ ಬಿಡುಗಡೆ ಮಾಡಿದೆ. ತನ್ನ ಸಂದೇಶವನ್ನು ಜನರಿಗೆ ನೇರವಾಗಿ ತಲುಪಿಸುವುದು ಟಿವಿ ಉದ್ದೇಶ ಎಂದು ಕಾಂಗ್ರೆಸ್ ಹೇಳಿದೆ.

’ಪಂಚಾಯತ್ ರಾಜ್ ದಿನ’ದಂದು ಡಿಜಿಟಲ್ ವೇದಿಕೆಗೆ ಔಪಚಾರಿಕ ಚಾಲನೆ ನೀಡಲಾಗುತ್ತದೆ ಎಂದು ರಾಜ್ಯಸಭೆಯ ಪ್ರತಿಪಕ್ಷ ನಾಯಕ ಎಂ. ಮಲ್ಲಿಕಾರ್ಜುನ ಖರ್ಗೆ ಮತ್ತು ಕಾಂಗ್ರೆಸ್ ಪ್ರಧಾನ ವಕ್ತಾರ ರಣದೀಪ್ ಸುರ್ಜೆವಾಲಾ ಸುದ್ದಿಗಾರರಿಗೆ ತಿಳಿಸಿದರು. ತುಳಿತಕ್ಕೊಳಗಾದ ಜನರ ಧ್ವನಿ ಕೇಳಿಸುವಂತಾಗಲು ಈ ಮಾಧ್ಯಮ ನೆರವಾಗಲಿದೆ ಎಂದು ಅವರು ಅಭಿಪ್ರಾಯ ಪಟ್ಟರು.

ಡಿಜಿಟಲ್ ವೇದಿಕೆ ಯುಟ್ಯೂಬ್​ನಲ್ಲಿ ಏಪ್ರಿಲ್ 24ರಿಂದ ಎಂಟು ಗಂಟೆ ಕಾರ್ಯಕ್ರಮ ಪ್ರಸಾರ ಮಾಡಲಿದೆ. ಆದರೆ ಉಪಗ್ರಹ ಅಥವಾ ಒಟಿಟಿಯಲ್ಲಿ ಅದು ಇರುವುದಿಲ್ಲ ಎಂದು ಸುರ್ಜೆವಾಲಾ ವಿವರಿಸಿದರು. ಆರಂಭದಲ್ಲಿ ಹಿಂದಿ ಮತ್ತು ಇಂಗ್ಲಿಷ್​ನಲ್ಲಿ ಕಾರ್ಯಕ್ರಮ ಪ್ರಸಾರವಾಗಲಿದೆ. ಕ್ರಮೇಣ ಪ್ರಾದೇಶಿಕ ಭಾಷೆಗಳಿಗೂ ವಿಸ್ತರಿಸಲು ಕಾಂಗ್ರೆಸ್ ನಿರ್ಧರಿಸಿದೆ. ಭಾರತದ ಸಂವಿಧಾನ ಉತ್ತಮವಾಗಿದೆ. ಆದರೆ ಪ್ರಧಾನಿ ನರೇಂದ್ರ ಮೋದಿ ತಮ್ಮದೇ ಸಿದ್ಧಾಂತವನ್ನು ಹರಡುತ್ತಿದ್ದಾರೆ ಎಂದು ಖರ್ಗೆ ಟೀಕಿಸಿದ್ದಾರೆ.

https://www.vijayavani.net/alexandra-hartley-tweeted-e-sala-cup-namde/