ಈ ಮನುಷ್ಯ ಕುಡಿಯದೇ ಟೈಟ್ ಆಗುತ್ತಾನೆ!; ಒಂಚೂರೂ ಮದ್ಯಪಾನ ಮಾಡದಿದ್ದರೂ ಇದ್ದಕ್ಕಿದ್ದಂತೆ ಕಿಕ್ಕೇರುತ್ತದೆ!

ಬೆಂಗಳೂರು: ಅವನು ಆಲ್ಕೋಹಾಲ್​ನ ವಾಸನೆಗೇ ಟೈಟಾಗಿ ಬಿಡುತ್ತಾನೆ ಎಂದು ಗೆಳೆಯರ ವಲಯದಲ್ಲಿ ಕುಡಿಯದೇ ಇದ್ದರೂ ಕುಡಿದವರಂತಾಡುವವರಿಗೆ ಮದ್ಯಪ್ರಿಯರು ತಮಾಷೆ ಮಾಡುವುದನ್ನು ಕೆಲವರಾದರೂ ಕೇಳಿರಬಹುದು. ಹಾಗೆ ಆಲ್ಕೋಹಾಲ್​ನ ಘಾಟಿಗೇ ಮತ್ತೇರುವವರೂ ಇರಬಹುದು. ಆದರೆ ಈ ಮನುಷ್ಯ ಅವರಿಗಿಂತಲೂ ಒಂದು ಹೆಜ್ಜೆ ಮುಂದಿದ್ದಾನೆ. ಈತ ಕುಡಿಯದೇ ಇದ್ದರೂ ಟೈಟಾಗಿ ಬಿಡುತ್ತಾನೆ.

ಇದನ್ನು ಕೇಳುತ್ತಿದ್ದಂತೆ ಕೆಲ ಮದ್ಯಪ್ರಿಯರು ನಮಗಾದರೂ ಹಾಗಾಗಿದ್ದರೆ ಎಷ್ಟು ಚೆನ್ನಾಗಿರುತ್ತಿತ್ತು ಎಂದು ಖುಷಿ ಪಡಬಹುದೇನೋ?! ಇದು ಒಂಥರ ವರವೋ ಶಾಪವೋ ಎಂದು ನಿರ್ಧರಿಸಲಾಗದ ಪರಿಸ್ಥಿತಿ. ಆದರೆ ಇದು ಈತನಿಗೆ ಕಾಯಿಲೆ ಎಂಬುದಂತೂ ಸತ್ಯ. ಆಟೋ ಬ್ರಿವರಿ ಸಿಂಡ್ರೋಮ್​ (ಎಬಿಎಸ್​) ಎಂಬ ಈ ಅತ್ಯಪರೂಪದ ಕಾಯಿಲೆಯೇ ಇದಕ್ಕೆ ಕಾರಣ. ಸಫೋಕ್​ನ ಲೋವೆಸ್ಟಾಫ್ಟ್​ನಲ್ಲಿನ ನಿಕ್ ಕಾರ್ಸನ್​ ಎಂಬ 62 ವರ್ಷದ ಈ ವ್ಯಕ್ತಿ​ಗೆ 2003ರಲ್ಲೇ ಈ ಕಾಯಿಲೆ ಕಾಣಿಸಿಕೊಂಡಿತ್ತು.

ಇದನ್ನೂ ಓದಿ: ಮಧ್ಯರಾತ್ರಿಯಲ್ಲಿ ನೀರು ಕುಡಿಯಲೆದ್ದಿದ್ದ ಅಮ್ಮನಿಗಾಯ್ತು ದಿಗಿಲು​; ರಾತ್ರಿ ಮಲಗಿದ್ದ ಮಗ-ಸೊಸೆ ಅಲ್ಲಿರಲಿಲ್ಲ..!

ಅದರಲ್ಲೂ ಈತ ಕೇಕ್​ ಸೇವಿಸಿದ ಕೆಲವೇ ಕ್ಷಣಗಳಲ್ಲಿ ಮದ್ಯಪಾನ ಮಾಡಿದವರಷ್ಟೇ ಮತ್ತೇರಿದ ವ್ಯಕ್ತಿಯಾಗಿ ಬಿಡುತ್ತಾನೆ. ಇದಕ್ಕೆಲ್ಲ ಈತನ ದೇಹದಲ್ಲಿರುವ ಕಾರ್ಬೋಹೈಡ್ರೇಟ್ಸ್​​ ಹುದುಗಿ ಆಲ್ಕೋಹಾಲ್​ ಆಗಿ ಪರಿವರ್ತನೆ ಆಗುತ್ತಿರುವುದೇ ಕಾರಣ. ಈತ ಸುಮಾರು 20 ವರ್ಷಗಳ ಕಾಲ ರಾಸಾಯನಿಕಗಳಿಗೆ ತನ್ನನ್ನು ತೆರೆದುಕೊಂಡು ಕೆಲಸ ಮಾಡಿದ್ದೇ ಇಂಥದ್ದೊಂದು ಕಾಯಿಲೆ ಕಾಣಿಸಿಕೊಳ್ಳಲು ಕಾರಣ ಎಂದು ಅಂದಾಜಿಸಲಾಗಿದೆ.

ಇದನ್ನೂ ಓದಿ: ಕರೊನಾ ಲಸಿಕೆ ಪಡೆದ ಹತ್ತೇ ದಿನಗಳಲ್ಲಿ ಸತ್ತ!; ಸಾವಿಗೆ ಕಾರಣ ವಿಷ ಎಂದಿತ್ತು ಮರಣೋತ್ತರ ಪರೀಕ್ಷೆಯಲ್ಲಿ…

ಇದು ನನಗೆ ಬೇಡದಿದ್ದರೂ ನನ್ನನ್ನು ಪಾನಮತ್ತನಂತಾಗಿಸಿ ಬಿಡುತ್ತಿದೆ. ಸ್ವಲ್ಪೇ ಸ್ವಲ್ಪ ಸಕ್ಕರೆ ಅಥವಾ ಕಾರ್ಬೋಹೈಡ್ರೇಟ್ಸ್​ ದೇಹದೊಳಗೆ ಹೋದರೂ ನನಗೆ ಮತ್ತೇರಿ, ಮದ್ಯಪಾನಿಯಂತಾಗಿ ಬಿಡುತ್ತೇನೆ. ಈ ಸಂದರ್ಭದಲ್ಲಿ ನಾನೇನು ಮಾಡಿದ್ದೆ ಎಂಬುದು ಕೂಡ ನನಗೆ ಎಷ್ಟೋ ಬಾರಿ ನೆನಪಿನಲ್ಲಿ ಉಳಿಯುವುದಿಲ್ಲ. ನನ್ನ ಪತ್ನಿ ನಾನು ಇಂಥ ಪರಿಸ್ಥಿತಿಯಲ್ಲಿದ್ದಾಗ ವಿಡಿಯೋ ಮಾಡಿಕೊಂಡು ಬಳಿಕ ನನಗೆ ತೋರಿಸಿದ್ದಾಳೆ. ಈ ಥರ ಆಗದಂತೆ ನೋಡಿಕೊಳ್ಳಲು ನಾನು ತುಂಬ ಪಥ್ಯ ಅನುಸರಿಸಬೇಕಾಗಿದೆ. ಇತ್ತೀಚೆಗೆ ಈ ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸುವುದು ಎಂಬುದನ್ನು ನಾನು ತಿಳಿದುಕೊಂಡು ತೀರಾ ಸಮಸ್ಯೆ ಆಗುವುದನ್ನು ತಪ್ಪಿಸಿಕೊಳ್ಳುತ್ತಿದ್ದೇನೆ ಎಂದು ನಿಕ್ ತಮ್ಮ ಸಂಕಷ್ಟ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/hyderabad-mans-body-found-stuffed-in-a-briefcase/

https://www.vijayavani.net/a-man-in-tripura-allegedly-his-wife-and-mother-in-law-and-then-chopped-their-body/