ಒಂದು ಭೂಮಿ, ಒಂದು ಕುಟುಂಬ, ಒಂದು ಭವಿಷ್ಯ- ಇದು ನಮ್ಮ ಜಿ-20 ಥೀಮ್​: ಪ್ರಧಾನಿ ಮೋದಿ

ನವದೆಹಲಿ: ಜಿ-20 ಅಧ್ಯಕ್ಷತೆ ವಹಿಸಿರುವ ಭಾರತ ವಸುಧೈವ ಕುಟುಂಬಕಂ ಎಂಬಂತೆ ಕಾರ್ಯನಿರ್ವಹಿಸಲಿದೆ. ಅರ್ಥಾತ್, ಒಂದು ಭೂಮಿ, ಒಂದು ಕುಟುಂಬ, ಒಂದು ಭವಿಷ್ಯ ಎಂಬುದು ನಮ್ಮ ಜಿ-20 ಧ್ಯೇಯವಾಗಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಹೇಳಿದ್ದಾರೆ.

ಭಾರತ ಜಿ-20 ಅಧ್ಯಕ್ಷತೆ ವಹಿಸಿರುವ ಹಿನ್ನೆಲೆಯಲ್ಲಿ ಪಿಟಿಐಗೆ ನೀಡಿರುವ ಸಂದರ್ಶನದಲ್ಲಿ ಅವರು ಈ ವಿಷಯ ತಿಳಿಸಿದ್ದಾರೆ. ನಮ್ಮ ಈ ಧ್ಯೇಯ ಕೇವಲ ಘೋಷಣೆಯಲ್ಲ, ಆದರೆ ನಮ್ಮ ಸಾಂಸ್ಕೃತಿಕ ನೀತಿಗಳಿಂದ ಪಡೆದ ಸಮಗ್ರ ತತ್ವಶಾಸ್ತ್ರವಾಗಿದೆ. ತಮ್ಮ ಧ್ವನಿಯನ್ನು ಕೇಳಲಾಗುತ್ತಿಲ್ಲ ಎಂದು ಭಾವಿಸುವವರನ್ನು ಸೇರಿಸಲು ನಾವು ಕೆಲಸ ಮಾಡುತ್ತೇವೆ. ಇದು ಜಾಗತಿಕ ಮಟ್ಟದಲ್ಲಿಯೂ ನಮಗೆ ಮಾರ್ಗದರ್ಶನದ ಅವಕಾಶವಾಗಿದೆ ಎಂದು ಅವರು ಹೇಳಿದ್ದಾರೆ.

ಗಾತ್ರ, ಆರ್ಥಿಕತೆ ಅಥವಾ ಪ್ರದೇಶವನ್ನು ಲೆಕ್ಕಿಸದೆ ಪ್ರತಿ ದೇಶದ ಧ್ವನಿಯೂ ಇಲ್ಲಿ ಮುಖ್ಯ. ಮಹಾತ್ಮ ಗಾಂಧಿ, ಡಾ. ಮಾರ್ಟಿನ್ ಲೂಥರ್ ಕಿಂಗ್ ಜೂನಿಯರ್, ನೆಲ್ಸನ್ ಮಂಡೇಲಾ ಮತ್ತು ಕ್ವಾಮೆ ಎನ್ಕ್ರುಮಾ ಅವರ ಮಾನವೀಯ ದೃಷ್ಟಿಕೋನ ಮತ್ತು ಆದರ್ಶಗಳಿಂದ ನಾವು ಪ್ರೇರಿತರಾಗಿದ್ದೇವೆ. 2015ರಲ್ಲಿ ಭಾರತ-ಆಫ್ರಿಕ ವೇದಿಕೆ ಶೃಂಗಸಭೆ, ಆಫ್ರಿಕದ ಹೊರಗೆ ಭಾರತದಲ್ಲಿ ನಡೆಯುತ್ತಿರುವ ಆಫ್ರಿಕನ್ ಅಭಿವೃದ್ಧಿ ಬ್ಯಾಂಕಿನ ಮೊದಲ ಶೃಂಗಸಭೆ ಮುಂತಾದ ಭಾರತ ಮತ್ತು ಆಫ್ರಿಕ ಸಂಬಂಧವನ್ನು ಹೆಚ್ಚು ಬಲಪಡಿಸಲು ಅನೇಕ ಕ್ರಮಗಳನ್ನು ಕೈಗೊಂಡಿದ್ದೇವೆ ಎಂದೂ ಮೋದಿ ಹೇಳಿದರು.

ಇದನ್ನೂ ಓದಿ: ಆತಂಕ ಹುಟ್ಟಿಸುತ್ತಿರುವ ಹಾಸ್ಟೆಲ್​ಗಳು; ನಿಗೂಢವಾಗಿ ಸಾವಿಗೀಡಾದ ಏಮ್ಸ್​ ವೈದ್ಯ!

ಈ ಸಂದರ್ಭದಲ್ಲಿ 1 ಲಕ್ಷಕ್ಕೂ ಹೆಚ್ಚು ಪ್ರತಿನಿಧಿಗಳು ವಿವಿಧ ಪ್ರದೇಶಗಳಿಗೆ ಹೋಗಿ ನಮ್ಮ ಜನಸಂಖ್ಯಾಶಾಸ್ತ್ರ, ಪ್ರಜಾಪ್ರಭುತ್ವ ಮತ್ತು ವೈವಿಧ್ಯತೆಗೆ ಸಾಕ್ಷಿಯಾಗಲಿದ್ದಾರೆ. ಕಳೆದ ದಶಕದಲ್ಲಿ ಅಭಿವೃದ್ಧಿ ಜನರನ್ನು ಹೇಗೆ ಸಬಲೀಕರಣಗೊಳಿಸುತ್ತಿದೆ ಎಂಬುದನ್ನು ಅವರು ನೋಡುತ್ತಿದ್ದಾರೆ.

ಜಾಗತಿಕವಾಗಿ ಮಾನವ ಕೇಂದ್ರಿತ ಬದಲಾವಣೆ ಪ್ರಾರಂಭವಾಗಿದ್ದು, ನಾವು ವೇಗವರ್ಧಕದ ಪಾತ್ರ ವಹಿಸುತ್ತಿದ್ದೇವೆ. ಭಾರತದ ಜಿ 20 ಅಧ್ಯಕ್ಷತೆಯು 'ಮೂರನೇ ವಿಶ್ವ' ಎಂದು ಕರೆಯಲ್ಪಡುವ ದೇಶಗಳಲ್ಲಿ ವಿಶ್ವಾಸದ ಬೀಜಗಳನ್ನು ಬಿತ್ತಿದೆ ಎಂದು ಮೋದಿ ಅಭಿಪ್ರಾಯ ವ್ಯಕ್ತಪಡಿಸಿದರು.

ಇದನ್ನೂ ಓದಿ: ಈಕೆಯ ಕೈ ಸ್ಕ್ಯಾನ್ ಮಾಡಿದ್ರೆ ಸಾಕು ಹಣ ಕಳಿಸಿಕೊಡಬಹುದು; ಇದಕ್ಕಿಂತ ‘ಡೈರೆಕ್ಟ್ ಟ್ರಾನ್ಸ್​ಫರ್’​ ಅಸಾಧ್ಯ ಅನಿಸುತ್ತೆ! 

ಎರಡನೇ ಮಹಾಯುದ್ಧದ ನಂತರ ಹೊಸ ವಿಶ್ವ ಕ್ರಮವು ಕಂಡುಬಂದಂತೆ, ಕೋವಿಡ್ ನಂತರ ಕೂಡ ಹೊಸ ವಿಶ್ವ ಕ್ರಮ ರೂಪುಗೊಳ್ಳುತ್ತಿದೆ. ಪ್ರಭಾವ ಮತ್ತು ಪ್ರಭಾವದ ನಿಯತಾಂಕಗಳು ಬದಲಾಗುತ್ತಿದ್ದು, ಅದನ್ನು ಗುರುತಿಸಬೇಕಾಗಿದೆ. ಭಾರತದಲ್ಲಿ ದಾರಿ ತೋರಿಸಿರುವ 'ಸಬ್ ಕಾ ಸಾಥ್ ಸಬ್ ಕಾ ವಿಕಾಸ್' ಮಾದರಿಯು ವಿಶ್ವದ ಕಲ್ಯಾಣಕ್ಕೆ ಮಾರ್ಗದರ್ಶಿ ತತ್ವವೂ ಆಗಬಹುದು ಎಂದು ಅವರು ಆಶಿಸಿದ್ದಾರೆ.

ಜಿ-20 ಅಧ್ಯಕ್ಷತೆಯ ಅವಧಿಯಲ್ಲಿ ಏನು ಮಾಡಬೇಕು ಎಂಬುದರ ಕುರಿತು ಯಾವುದೇ ದೇಶಕ್ಕೆ ನಾನು ಯಾವುದೇ ಸಲಹೆ ನೀಡುವುದು ಸರಿಯಲ್ಲ. ನಾನು ನನ್ನ ಸ್ನೇಹಿತ ಅಧ್ಯಕ್ಷ ಲುಲಾ ಅವರ ಸಾಮರ್ಥ್ಯ ಮತ್ತು ದೃಷ್ಟಿಕೋನವನ್ನು ಗೌರವಿಸುತ್ತೇನೆ ಮತ್ತು ಅವರಿಗೆ ಮತ್ತು ಬ್ರೆಜಿಲ್ ಜನರಿಗೆ ಉತ್ತಮ ಯಶಸ್ಸನ್ನು ಬಯಸುತ್ತೇನೆ ಎಂದು ಮೋದಿ ಹೇಳಿದ್ದಾರೆ.

https://www.vijayavani.net/king-cobra-at-gods-room-cobra-in-school-bag

https://www.vijayavani.net/change-problem-in-bus-here-is-the-qr-code-as-a-solution