ತಮಿಳುನಾಡಿನ 2025-26ನೇ ಸಾಲಿನ ಬಜೆಟ್ ಶುಕ್ರವಾರ ಮಂಡನೆ ಆಗಲಿದ್ದು, ಆ ಕುರಿತ ಜಾಹೀರಾತು ತುಣುಕಿನಲ್ಲಿ ಸಾಮಾನ್ಯವಾಗಿ ಬಳಸುವ ಅಧಿಕೃತ ರೂಪಾಯಿ ಚಿಹ್ನೆಯ ಬದಲು ತಮಿಳು ‘ರು’ ಅಕ್ಷರ ಬಳಸಲಾಗಿದೆ. ಇದನ್ನು ಸಿಎಂ ಸ್ಟಾಲಿನ್ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡ ಹಿನ್ನೆಲೆಯಲ್ಲಿ ಈ ಬದಲಾವಣೆ ದೊಡ್ಡಮಟ್ಟದಲ್ಲಿ ಗಮನ ಸೆಳೆದಿದೆ. ಕಳೆದ ವರ್ಷದ ಇಂಥದ್ದೇ ಪೋಸ್ಟರ್ನಲ್ಲಿ ಎಲ್ಲೆಡೆ ಬಳಸುವಂಥ ರೂಪಾಯಿ ಚಿಹ್ನೆ ಇದ್ದಿತ್ತು. ಈ ವರ್ಷ ಅದರ ಬದಲಾವಣೆ ಆಗಿರುವುದರಿಂದ ಎರಡೂ ವರ್ಷಗಳ ಪೋಸ್ಟರ್ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡಲಾರಂಭಿಸಿ, ಈ ವಿಚಾರ ವಿವಾದಕ್ಕೀಡಾಗಿದೆ. ಹೊಸ ರಾಷ್ಟ್ರೀಯ ಶಿಕ್ಷಣ ನೀತಿಯಲ್ಲಿ ತ್ರಿಭಾಷಾ ಸೂತ್ರದ ಪ್ರಸ್ತಾಪ ಹಿನ್ನೆಲೆಯಲ್ಲಿ ಹಿಂದಿ ಹೇರಿಕೆ ವಿಚಾರವಾಗಿ ಕೇಂದ್ರ ಸರ್ಕಾರದ ವಿರುದ್ಧ ಸಿಡಿದೆದ್ದಿರುವ ಡಿಎಂಕೆ ನೇತೃತ್ವದ ತಮಿಳುನಾಡು ಸರ್ಕಾರ ಈಗ ರೂಪಾಯಿಗೆ ತಮಿಳಿನ ಅಕ್ಷರವನ್ನೇ ಬಳಸುವಂಥ ಬದಲಾವಣೆ ಮಾಡಿರುವುದು ಅದು ಹೋರಾಟವನ್ನು ಇನ್ನಷ್ಟು ತೀವ್ರಗೊಳಿಸುವ ಸುಳಿವು ನೀಡಿದೆ.
