ಭಾರತದ ಅತಿದೊಡ್ಡ ಉತ್ಸವದಲ್ಲಿ ಪ್ರಧಾನಿ ಕೈಯಿಂದ ಹಾರಿತು ಬೆಂಗಳೂರಿನ ಡ್ರೋನ್‌

ನವದೆಹಲಿ: ದೆಹಲಿಯಲ್ಲಿ ಎರಡು ದಿನಗಳ ಡ್ರೋನ್‌ ಉತ್ಸವ ನಡೆಯಲಿದ್ದು, ಇಂದು ಅದಕ್ಕೆ ಪ್ರಧಾನಿ ಮೋದಿ ಚಾಲನೆ ನೀಡಿದರು. ಈ ಸಂದರ್ಭದಲ್ಲಿ ಅವರ ಕೈಯಿಂದ ಚಾಲನೆಯ ಅದೃಷ್ಟ ಒದಗಿ ಬಂದದ್ದು ಬೆಂಗಳೂರಿನ ಡ್ರೋನ್‌ಗೆ. ಬೆಂಗಳೂರಿನ ಫುಲ್​ಸ್ಟಾಕ್​ ಡ್ರೋನ್​ ಟೆಕ್ನಾಲಜಿ ಕಂಪನಿ ಆಸ್ಟೆರಿಯಾ ಏರೋಸ್ಪೇಸ್​ ಲಿಮಿಟೆಡ್​ ಅಭಿವೃದ್ಧಿ ಪಡಿಸಿದ ಡ್ರೋನ್‌ ಪ್ರಧಾನಿ ಹಾರಿಸಿದರು.

ಭಾರತದ ಅತಿದೊಡ್ಡ ಡ್ರೋನ್​ ಉತ್ಸವ ಇದಾಗಿದೆ. ಬೆಂಗಳೂರಿನ ಡ್ರೋನ್​ ಅನ್ನು ಹಾರಿಸಿದ ಬಳಿಕ, ಪ್ರದರ್ಶನ ಸ್ಥಳದಲ್ಲಿದ್ದ ಆಸ್ಟೆರಿಯಾ ಬೂತ್​ಗೆ ಭೇಟಿ ನೀಡಿ, ಕಂಪನಿಯ ಡ್ರೋನ್​ಗಳ ಬಗ್ಗೆ ತಿಳಿದುಕೊಂಡರು.

ಇದೇ ಸಂದರ್ಭದಲ್ಲಿ ಮಾತನಾಡಿದ ಅವರು, ದೇಶದ ಎಲ್ಲ ಕ್ಷೇತ್ರಗಳ ಅಭಿವೃದ್ಧಿಯಲ್ಲಿ ಡ್ರೋನ್​ಗಳು ಮಹತ್ವದ ಪಾತ್ರವನ್ನು ನಿರ್ವಹಿಸುತ್ತಿವೆ. ಅಭಿವೃದ್ಧಿ ಕಾರ್ಯಗಳ ವೀಕ್ಷಣೆಗೆ ಡ್ರೋನ್​ ಕ್ಯಾಮೆರಾಗಳ ನೆರವನ್ನು ಪಡೆಯುತ್ತಿದ್ದೇನೆ. ಈ ಮೂಲಕ ಖುದ್ದು ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸುವುದನ್ನು ತಪ್ಪಿಸಬಹುದು. ಸಮಯದ ಉಳಿತಾಯವೂ ಆಗುತ್ತದೆ. ವಿಪತ್ತು ನಿರ್ವಹಣೆ, ಕೃಷಿ, ಸರ್ವೇಕ್ಷಣೆ, ಮಾಧ್ಯಮ ಅಥವಾ ಪ್ರವಾಸೋದ್ಯಮ ಹೀಗೆ ಯಾವುದೇ ಕ್ಷೇತ್ರವಾದರೂ ಸಾರ್ವಜನಿಕ ಸೇವೆಯಲ್ಲಿ ಡ್ರೋನ್​ಗಳು ಕ್ರಾಂತಿಕಾರಿ ಬದಲಾವಣೆಗಳನ್ನು ತರಬಲ್ಲವು. ಅದೇ ರೀತಿ, ಸರ್ಕಾರಿ ಸೇವೆ ಒದಗಿಸುತ್ತ ಬದುಕನ್ನು ಹಸನುಗೊಳಿಸಬಲ್ಲವು. ಡಿಜಿಟಲ್​ ಮ್ಯಾಪಿಂಗ್​ನಲ್ಲಿ ಡ್ರೋನ್​ಗಳ ನೆರವು ಪಡೆದ ಬಳಿಕ, 65 ಲಕ್ಷ ಆಸ್ತಿ ಕಾರ್ಡ್​ಗಳನ್ನು ವಿತರಿಸಲಾಗಿದೆ ಎಂದರು.

ಡ್ರೋನ್‌ ಉತ್ಸವಕ್ಕೆ ನಾಳೆ (ಶನಿವಾರ) ತೆರೆ ಬೀಳಲಿದೆ. ಸರ್ಕಾರಿ ಅಧಿಕಾರಿಗಳು, ವಿದೇಶಿ ರಾಜತಾಂತ್ರಿಕರು, ಸಶಸ್ತ್ರಪಡೆ, ಕೇಂದ್ರೀಯ ಸಶಸ್ತ್ರ ಪೊಲೀಸ್​ ಪಡೆ, ಸಾರ್ವಜನಿಕ ವಲಯದ ಸಂಸ್ಥೆಗಳ ಪ್ರತಿನಿಧಿಗಳು, ಖಾಸಗಿ ಕಂಪನಿಗಳ ಪ್ರತಿನಿಧಿಗಳು, ಡ್ರೋನ್​ ನವೋದ್ಯಮಗಳ ಪ್ರತಿನಿಧಿಗಳು ಸೇರಿ 1,600ಕ್ಕೂ ಹೆಚ್ಚು ಜನ ಈ ಉತ್ಸವದಲ್ಲಿ ಭಾಗಿಯಾಗುತ್ತಿದ್ದಾರೆ. ಉತ್ಸವದಲ್ಲಿ 70ಕ್ಕೂ ಹೆಚ್ಚು ಸ್ಟಾಲ್​ಗಳಿವೆ. ವಿವಿಧ ರೀತಿಯ ಡ್ರೋನ್​ಗಳನ್ನು ಪ್ರದರ್ಶನಕ್ಕೆ ಇರಿಸಲಾಗಿದೆ.

https://www.vijayavani.net/s-death-of-daughter-due-to-another-religion-marraige/

https://www.vijayavani.net/s-viral-video-about-religion-preacher-angry/