ಬೆಸ್ಕಾಂಗೆ 1,238 ಕೋಟಿ ರೂ. ಖೋತಾ; ಲಾಕ್​ಡೌನ್​ನಿಂದಾಗಿ ವಿದ್ಯುತ್ ಬಳಕೆ ಇಳಿಕೆ

ಬೆಂಗಳೂರು: ಲಾಕ್​ಡೌನ್​ನಿಂದಾಗಿ ಬೆಸ್ಕಾಂಗೆ 1,238 ಕೋಟಿ ರೂ. ಆದಾಯ ಖೋತಾ ಆಗಿದೆ. ಮಾ.23ರಿಂದ ಮಾಡಲಾದ ಲಾಕ್​ಡೌನ್​ನಿಂದಾಗಿ ಬಹುತೇಕ ಎಲ್ಲ ಸರ್ಕಾರಿ ಸಂಸ್ಥೆಗಳ ಆದಾಯಕ್ಕೆ ಹೊಡೆತ ಬಿದ್ದಿದೆ. ಲಾಕ್​ಡೌನ್ ಅವಧಿಯಲ್ಲಿ ಬೆಸ್ಕಾಂ ನಿರಂತರ ಸೇವೆ ನೀಡಿದ್ದರೂ ವಿದ್ಯುತ್ ಬಿಲ್​ನಲ್ಲಾದ ಗೊಂದಲದಿಂದಾಗಿ ಶೇ. 50 ಗ್ರಾಹಕರು ಬಿಲ್ ಪಾವತಿಸಿಲ್ಲ. ಅದಕ್ಕಿಂತ ಮುಖ್ಯವಾಗಿ ಕೈಗಾರಿಕೆ ಮತ್ತು ವಾಣಿಜ್ಯ ಕಟ್ಟಡಗಳಿಂದ ಬರಬೇಕಿದ್ದ ಆದಾಯ ಕಡಿಮೆಯಾಗಿದ್ದು, ಸಂಸ್ಥೆಗೆ ನಷ್ಟವಾಗುವಂತಾಗಿದೆ.

ಮಾರ್ಚ್, ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ ಹೆಚ್ಚು ನಷ್ಟವುಂಟಾಗಿದೆ. 2019ರಲ್ಲಿ 3 ತಿಂಗಳಲ್ಲಿ 4,726.28 ಕೋಟಿ ರೂ. ಆದಾಯ ಬಂದಿತ್ತು. 2020ರ ಆ ಮೂರು ತಿಂಗಳಲ್ಲಿ 3487.66 ಕೋಟಿ ರೂ. ಆದಾಯ ಸಂಗ್ರಹವಾಗಿದೆ. ಇದನ್ನು ಗಮನಿಸಿದರೆ 1,238.62 ಕೋಟಿ ರೂ. ಆದಾಯ ಕಡಿಮೆಯಾಗಿದೆ.

ಇದನ್ನೂ ಓದಿ; ಲಸಿಕೆ ಇಲ್ಲದೆಯೂ ಕೊನೆಗಾಣಲಿದೆ ಕರೊನಾ ಸಂಕಷ್ಟ; ಇಟಲಿ ವೈದ್ಯರಿಂದ ಅಧ್ಯಯನ 

ವಿದ್ಯುತ್ ಬಳಕೆ ಇಳಿಕೆ: ಮಾರ್ಚ್ ಮತ್ತು ಏಪ್ರಿಲ್​ನಲ್ಲಿ ಶಕ್ತಿಯುತ ವಿದ್ಯುತ್ ಬಳಕೆ ಕಡಿಮೆಯಾಗಿದೆ. ಈ ಎರಡು ತಿಂಗಳಲ್ಲಿ ಮಾಮೂಲಿಗಿಂತ ಶೇ. 38.81 ವಿದ್ಯುತ್ ಕಡಿಮೆ ಮಾರಾಟವಾಗಿದೆ. ಅದೇ ರೀತಿ ಕಡಿಮೆ ವೋಲ್ಟೇಜ್ ವಿದ್ಯುತ್ ಬಳಕೆಯಲ್ಲಿ ಶೇ. 46.51 ಮತ್ತು ವಾಣಿಜ್ಯ ಕಟ್ಟಡಗಳಲ್ಲಿ ಶೇ. 38.2 ಬೇಡಿಕೆ ಕಡಿಮೆಯಾಗಿದೆ.

https://www.vijayavani.net/indias-trade-deficit-with-china-at-5-year-low/