ರಾಜ್ಯದ ವಿವಿಧೆಡೆಯ ಉಪವಿಭಾಗಾಧಿಕಾರಿಗಳ ಎದುರು ಇಂಥ ನೂರಾರು ಪ್ರಕರಣಗಳಿದ್ದು, ಜಿಲ್ಲಾಧಿಕಾರಿಗೆ ಮೇಲ್ಮನವಿ ಸಲ್ಲಿಸಲು ಅವಕಾಶವಿದೆ. ಪಾಲಕರ ಆಸ್ತಿ ಪಡೆದುಕೊಂಡು, ನಂತರ ಅವರನ್ನು ಸರಿಯಾಗಿ ಆರೈಕೆ ಮಾಡದೆ ನಿಷ್ಕಾಳಜಿ ತೋರಿದರೆ, ಕಾಯ್ದೆಯ ಸೆಕ್ಷನ್ 23ರ ಅನ್ವಯ ವಯೋವೃದ್ಧ ಪಾಲಕರು ಹಾಗೂ ಹಿರಿಯ ನಾಗರಿಕರು ತಮ್ಮ ಮಕ್ಕಳು ಅಥವಾ ಸಂಬಂಧಿಕರ ಹೆಸರಿಗೆ ಬರೆದಿರುವ ಆಸ್ತಿಯ ಉಯಿಲನ್ನು ರದ್ದುಪಡಿಸಬಹುದು. ಜತೆಗೆ, ಆಸ್ತಿಯ ಹಕ್ಕನ್ನು ಪಾಲಕರ ಹೆಸರಿಗೆ ಮರುಸ್ಥಾಪಿಸಲು ಸಹ ಕಾಯ್ದೆಯಲ್ಲಿ ಅವಕಾಶವಿದೆ. ಆದರೆ ಜನರಲ್ಲಿ ಈ ಕಾಯ್ದೆಯ ಬಗ್ಗೆ ಅಷ್ಟಾಗಿ ಮಾಹಿತಿ ಇಲ್ಲ. ಪಾಲಕರನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದುಕೊಂಡು ಬಂದು, ಚಿಕಿತ್ಸೆ ಮುಗಿದ ನಂತರವೂ ಅವರನ್ನು ಮನೆಗೆ ಕರೆದುಕೊಂಡು ಹೋಗದ ಪ್ರಕರಣಗಳು ಈಚೆಗೆ ಬೆಳಗಾವಿ ಜಿಲ್ಲಾಸ್ಪತ್ರೆಯಲ್ಲಿ ವರದಿಯಾಗಿತ್ತು.ಇವನ್ನೆಲ್ಲ ನೋಡುತ್ತಿದ್ದಾಗ, ಪಾಲಕರು ಅಥವಾ ಹಿರಿಯರ ಬಗ್ಗೆ ಮಕ್ಕಳು ಸಂವೇದನಾರಹಿತರಾಗುತ್ತಿದ್ದಾರೆಯೇ ಎಂಬ ಅನುಮಾನ ಮೂಡುತ್ತದೆ. ಬದಲಾದ ಜೀವನಶೈಲಿ, ಮನೋಭಾವ ಇದಕ್ಕೆ ಕಾರಣವಾಗಿರಬಹುದಾದರೂ, ಇದು ಆರೋಗ್ಯಕರ ಬೆಳವಣಿಗೆಯಲ್ಲ. ಎಲ್ಲರೂ ಹೀಗಲ್ಲ ಎಂಬುದು ಹೌದಾದರೂ, ಈ ಪ್ರವೃತ್ತಿ ಹೆಚ್ಚುತ್ತಿರುವುದನ್ನು ಗಂಭೀರವಾಗಿ ಪರಿಗಣಿಸಲೇಬೇಕಿದೆ. ಹಾಗೇ, ತಮಗೂ ಮುಂದೊಂದು ದಿನ ವಯಸ್ಸಾಗುತ್ತದೆ ಎಂಬ ವಾಸ್ತವ ಅರಿತು ವರ್ತನೆ ರೂಢಿಸಿಕೊಳ್ಳುವುದು ಅಪೇಕ್ಷಣೀಯ.
