ಐ ಲವ್​ ಯೂ ಅಪ್ಪ... ಹುತಾತ್ಮ ಯೋಧನ ಫೋಟೋಗೆ ಮುತ್ತಿಕ್ಕಿದ ಮಗ, ವೀರಪುತ್ರನಿಗೆ ಕಣ್ಣೀರ ವಿದಾಯ

ವಿಜಯವಾಡ: ತಮಿಳುನಾಡಿನ ನೀಲಿಗಿರಿಯ ಕುನೂರಿನಲ್ಲಿ ನಡೆದ ಸೇನಾ ಹೆಲಿಕಾಪ್ಟರ್ ಪತನದಲ್ಲಿ ಮೃತಪಟ್ಟ 13 ಮಂದಿ ಯೋಧರ ಪೈಕಿ ಆಂಧ್ರಪ್ರದೇಶದ ಲ್ಯಾನ್ಸ್​ ನಾಯ್ಕ​ ಸಾಯಿತೇಜ್ ಕೂಡ ಒಬ್ಬರು. ಇಂದು ಸಾಯಿತೇಜ್​ ಅವರ ಅಂತ್ಯಕ್ರಿಯೆ ಸಕಲ ಸೇನಾ ಗೌರವಗಳೊಂದಿಗೆ ನೆರವೇರಿತು.

ಅಂತ್ಯಕ್ರಿಯೆಗೂ ಮುನ್ನ ಸಾಯಿತೇಜ್​ ಪಾರ್ಥೀವ ಶರೀರ ಸೇನಾ ಹೆಲಿಕಾಪ್ಟರ್​ ಮೂಲಕ ಬೆಂಗಳೂರಿನಿಂದ ಆಂಧ್ರದ ಚಿತ್ತೂರಿಗೆ ಆಗಮಿಸಿತು. ಬಳಿಕ ಪಾರ್ಥೀವ ಶರೀರವನ್ನು ಪುಂಗನೂರು ರಸ್ತೆ ಮಾರ್ಗವಾಗಿ ಸಾಯಿತೇಜ್​ ಅವರ ಸ್ವಗ್ರಾಮ ಎಗುವರೆಗಡಕ್ಕೆ ರಸ್ತೆ ಮಾರ್ಗವಾಗಿ ಮೆರವಣಿಗೆಯಲ್ಲಿ ತರಲಾಯಿತು. ಈ ವೇಳೆ ಗ್ರಾಮಸ್ಥರು ಹಾಗೂ ಅಭಿಮಾನಿಗಳು ಬಹುಸಂಖ್ಯೆಯಲ್ಲಿ ಮೆರವಣಿಗೆಯಲ್ಲಿ ಪಾಲ್ಗೊಂಡರು. ವೀರಪುತ್ರನಿಗೆ ಅಂತಿಮ ನಮನವನ್ನು ಸಲ್ಲಿಸಿ, ಕಣ್ಣೀರಿನ ವಿದಾಯ ಹೇಳಿದರು.

ಘಟನೆ ನಡೆದ ಐದು ದಿನಗಳ ನಂತರ ಸಾಯಿತೇಜ್​ ಅವರ ಪಾರ್ಥೀವ ಶರೀರ ಸ್ವಗ್ರಾಮಕ್ಕೆ ತರಲಾಗಿದ್ದು, ಕುಟುಂಬಸ್ಥರ ಸಮ್ಮುಖದಲ್ಲಿ ಸೇನಾ ಗೌರವಗಳೊಂದಿಗೆ ಹಿಂದು ಸಂಪ್ರದಾಯದಂತೆ ಅಂತ್ಯಕ್ರಿಯೆಯನ್ನು ನೆರವೇರಿಸಲಾಗಿದೆ.

ಇದಕ್ಕೂ ಮುನ್ನ ಮೆರವಣಿಗೆಯ ವೇಳೆ ಮನಕಲಕುವ ದೃಶ್ಯವೊಂದು ಕ್ಯಾಮೆರಾ ಕಣ್ಣಿಗೆ ಸೆರೆಯಾಯಿತು. ಹುತಾತ್ಮ ಸಾಯಿತೇಜ್ ಅವರ​ 5 ವರ್ಷದ ಪುತ್ರ ಮೋಕ್ಷಜ್ಞ ತಂದೆಯ ಫೋಟೋಗೆ ಮುತ್ತಿಕ್ಕಿದ್ದು ಮನಕರಗುವಂತಿತ್ತು. ಇಡೀ ಗ್ರಾಮವೇ ಸಾಯಿತೇಜ್​​ಗಾಗಿ ಕಣ್ಣೀರು ಸುರಿಸಿದರು. ಮೆರವಣಿಗೆಯ ವಾಹನಕ್ಕೆ ಹೂವಿನ ಮಳೆಗೆರೆದು, ಕಂಬನಿ ಮಿಡಿದರು.

ಡಿ. 8ರ ಬುಧವಾರದಂದು ತಮಿಳುನಾಡಿನ ನೀಲಗಿರಿ ಜಿಲ್ಲೆಯ ಕುನೂರಿನ ವೆಲ್ಲಿಂಗ್ಟನ್‌ನ ಮಿಲಿಟರಿ ಶಾಲೆಯಲ್ಲಿ ನಿಗದಿಯಾಗಿದ್ದ ಸೆಮಿನಾರ್​ಗೆಂದು ಸಿಡಿಎಸ್​ ಬಿಪಿನ್​ ರಾವತ್ ಜತೆ ತೆರಳುವಾಗ ಹೆಲಿಕಾಪ್ಟರ್​ ಪತನವಾಗಿ ಮೃತಪಟ್ಟ 13 ಮಂದಿಯಲ್ಲಿ ಲ್ಯಾನ್ಸ್ ನಾಯಕ್​ ಬಿ ಸಾಯ್​ತೇಜ್​ ಕೂಡ ಒಬ್ಬರು. ಡಿಎನ್​ಎ ಪರೀಕ್ಷೆ ಮೂಲಕ ಶನಿವಾರ ಬೆಳಗ್ಗೆ ಸಾಯಿತೇಜ್​ ಅವರ ಮೃತದೇಹವನ್ನು ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ. (ಏಜೆನ್ಸೀಸ್​)

https://www.vijayavani.net/r-saitejas-death-is-a-great-loss-to-the-army-he-is-no-ordinary-commando-former-major-bharat-reddy/

https://www.vijayavani.net/s-young-soldier-death-in-air-crash/

https://www.vijayavani.net/r-ap-govt-announces-50-lakh-ex-gratia-to-kin-of-saiteja-killed-in-ooty-chopper-crash/