ಮಿನ್ನಲ್​ ಮುರಳಿ ಚಿತ್ರ ಪ್ರೇರಣೆ: ಸೂಪರ್​​ ಹೀರೋ ಬಟ್ಟೆ ಧರಿಸಿ ವಿವಾಹ, ವಧುವನ್ನು ಓಡಾಡಿಸಿದ ವರ!

ತಿರುವನಂತಪುರಂ: ಸೂಪರ್​ ಹೀರೋ ಕಲ್ಪನಾ ಆಧಾರಿತ ಮಲಯಾಳಂನ ಯಶಸ್ವಿ ಚಿತ್ರ "ಮಿನ್ನಲ್​ ಮುರಳಿ"ಯಿಂದ ಪ್ರಭಾವಿತಗೊಂಡಿರುವ ಯುವಕನೊಬ್ಬ ಚಿತ್ರದಲ್ಲಿ ನಾಯಕ ಟೋವಿನೋ ಥಾಮಸ್​ ಧರಿಸಿದ್ದ ಸೂಪರ್​ ಹೀರೋ ಉಡುಗೆಯನ್ನೇ ಧರಿಸಿ, ವಿಭಿನ್ನವಾಗಿ ಮದುವೆ ಆಗಿರುವ ಪ್ರಸಂಗ ಬೆಳಕಿಗೆ ಬಂದಿದೆ.

ವರನನ್ನು ಅಮಲ್​ ರವೀಂದ್ರನ್​ ಎಂದು ಗುರುತಿಸಲಾಗಿದೆ. ಇನ್​ಸ್ಟಾಗ್ರಾಂನಲ್ಲಿ ವಿಡಿಯೋ ಅಪ್​ಲೋಡ್​ ಮಾಡಿಕೊಂಡಿರುವ ರವೀಂದ್ರನ್​, ಕೊನೆಗೂ ಮಿನ್ನಲ್​ ಮುರಳಿ ಮತ್ತು ಸೂಪರ್​ ವುಮೆನ್​ ಮದುವೆ ಮಾಡಿಕೊಂಡರು ಎಂದು ಬರೆದುಕೊಂಡಿದ್ದಾರೆ.

ವಧು ಸಾಂಪ್ರದಾಯಿಕ ಉಡುಗೆಯಲ್ಲಿದ್ದರೆ, ವರ ರವೀಂದ್ರನ್​ ಸೂಪರ್​ ಹೀರೋ ಧರಿಸು ಧರಿಸಿ ಕ್ಯಾಮೆರಾಗೆ ಪೋಸ್​ ನೀಡಿದ್ದು, ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ತೆರೆದ ಮೈದಾನದಲ್ಲಿ ವಧು-ವರ ಹಾರ ಬದಲಾವಣೆ ಮಾಡಿಕೊಂಡಿರುವುದನ್ನು ವಿಡಿಯೋದಲ್ಲಿ ಕಾಣಬಹುದಾಗಿದೆ. ಕೇರಳದ ಕೊಟ್ಟಾಯಂ ಜಿಲ್ಲೆಯಲ್ಲಿ ವಿಡಿಯೋ ಸೆರೆಹಿಡಿಯಲಾಗಿದೆ. ನವಜೋಡಿ ಮೈದಾನದಲ್ಲಿ ಓಡಾಡಿರುವ ದಶ್ಯವೂ ವೈರಲ್​ ವಿಡಿಯೋದಲ್ಲಿದೆ.

ಈ ಬಗ್ಗೆ ಮಾಧ್ಯಮದ ಜತೆ ಮಾತನಾಡಿರುವ ವರ ರವೀಂದ್ರನ್​, ಶೂಟ್​ ಮಾಡಿದ ಬಳಿಕ ನಮ್ಮ ಸಂಬಂಧಿಕರು ಈ ಉಡುಗೆಯಲ್ಲಿ ನನ್ನನ್ನು ನೋಡಲು ತುಂಬಾ ಉತ್ಸುಕರಾಗಿದ್ದಾರೆ. ಈ ಸೂಪರ್ ಹೀರೋ ಉಡುಗೆಯನ್ನು ನನ್ನ ಸೋದರ ಸಂಬಂಧಿಯೊಬ್ಬರು ಮದುವೆ ಸಂದರ್ಭದಲ್ಲಿ ಧರಿಸಲು ಪ್ಲಾನ್​ ಮಾಡಿದ್ದರು. ಆದರೆ, ಕೋವಿಡ್​ ಕಾರಣದಿಂದಾಗಿ ಅವರು ಮದುವೆಗೆ ಬರಲು ಆಗಲಿಲ್ಲ. 'ಸೇವ್ ದಿ ಡೇಟ್' ವೀಡಿಯೋ ನೋಡಿದ ನಂತರ ಅನೇಕರು ಮದುವೆಯ ಬಗ್ಗೆ ಕುತೂಹಲ ಹೊಂದಿದ್ದರು ಎಂದು ತಿಳಿಸಿದ್ದಾರೆ. ಅಂದಹಾಗೆ ಇಬ್ಬರು ಜನವರಿ 23ರಂದು ಸಪ್ತಪದಿ ತುಳಿದಿದ್ದಾರೆ.

ಇದೀಗ ಈ ವಿಡಿಯೋವನ್ನು ಅನೇಕರು ನಟ ಟೋವಿನೋ ಥಾಮಸ್​ಗೆ ಟ್ಯಾಗ್​ ಮಾಡುತ್ತಿದ್ದಾರೆ. ಅಲ್ಲದೆ, ಈ ವಿಭಿನ್ನ ವೆಡ್ಡಿಂಗ್​ ಫೋಟೋಶೂಟ್​ ಪರಿಕಲ್ಪನೆಗೆ ಫಿದಾ ಆಗಿದ್ದಾರೆ. (ಏಜೆನ್ಸೀಸ್​)

https://www.vijayavani.net/r-after-falling-in-love-from-missed-call-this-woman-went-on-to-prove-that-love-is-blind/

https://www.vijayavani.net/r-upasana-konidelas-social-media-post-goes-wrong-lands-in-controversy/

https://www.vijayavani.net/r-3300-year-old-lead-amulet-discovered-in-northern-west-bank/