ಜಗತ್ತಿಗೇ ತಂತ್ರಜ್ಞಾನ ಕೊಡಲಿದೆ ಭಾರತ!; ಕೋವಿನ್​ ಗ್ಲೋಬಲ್ ಕಾನ್​ಕ್ಲೇವ್​ನಲ್ಲಿ ಮೋದಿ

ನವದೆಹಲಿ: ಕೋವಿಡ್​ ವಿರುದ್ಧ ಲಸಿಕೀಕರಣವೊಂದೇ ಪರಿಣಾಮಕಾರಿ ಅಸ್ತ್ರ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಅಭಿಪ್ರಾಯಪಟ್ಟಿದ್ದಾರೆ. ಸೋಮವಾರ ನಡೆದ ಕೋವಿನ್​ ಗ್ಲೋಬಲ್ ಕಾನ್​ಕ್ಲೇವ್​ನಲ್ಲಿ ಮಾತನಾಡಿದ ಅವರು ಈ ವಿಷಯ ತಿಳಿಸಿದರು.

ಈ ಸಾಂಕ್ರಾಮಿಕ ಪಿಡುಗಿನಿಂದ ಹೊರಗೆ ಬರಲು ಲಸಿಕೆ ಅತ್ಯುತ್ತಮ ಆಶಾಕಿರಣ. ಅದಕ್ಕಾಗಿ ಭಾರತ ಆರಂಭದಿಂದಲೂ ಲಸಿಕೀಕರಣ ಕಾರ್ಯತಂತ್ರಕ್ಕಾಗಿ ಡಿಜಿಟಲ್​ನತ್ತ ಹೆಚ್ಚಿನ ಒಲವು ತೋರಲಾಗಿದೆ. ಕೋವಿಡ್-19 ವಿರುದ್ಧದ ಹೋರಾಟದಲ್ಲಿ ತಂತ್ರಜ್ಞಾನ ಅವಿಭಾಜ್ಯ ಅಂಗವಾಗಿದೆ. ಅದಕ್ಕಾಗಿ ನಾವು ಕಂಡುಕೊಂಡ ತಂತ್ರಾಂಶಕ್ಕೆ ಕೋವಿನ್​ ಎಂದು ಹೆಸರಿಟ್ಟು ಅದನ್ನು ಓಪನ್ ಸೋರ್ಸ್ ಮಾಡಲಾಗಿದೆ. ಈ ಮೂಲಕ ಭಾರತ ಇಡೀ ಜಗತ್ತೇ ಒಂದು ಎಂಬಂತೆ ನಡೆದುಕೊಂಡಿದೆ ಎಂದು ಮೋದಿ ಹೇಳಿದರು.

ಇದನ್ನೂ ಓದಿ: ಆತ್ಮಹತ್ಯೆ ಮಾಡಿಕೊಳ್ಳುವವರಲ್ಲಿ ಪುರುಷರೇ ಹೆಚ್ಚು, ಏಕೆ?; ಗೃಹಿಣಿಯರಿಗೆ ಖುಷಿ ಕೊಟ್ಟೀತು ಈ ಅಧ್ಯಯನ ವರದಿ!

ಈ ವರ್ಚುವಲ್ ಮೀಟ್​ನಲ್ಲಿ ವಿವಿಧ ದೇಶಗಳ ವೈದ್ಯಕೀಯ ಹಾಗೂ ತಾಂತ್ರಿಕ ಪರಿಣತರು ಭಾಗಿಯಾಗಿದ್ದರು. ಭಾರತದ ವಿಶಿಷ್ಟ ಲಸಿಕೀಕರಣ ಕಾರ್ಯತಂತ್ರದ ವಿಶೇಷಗಳನ್ನು ಇತರ ರಾಷ್ಟ್ರಗಳೊಂದಿಗೆ ಹಂಚಿಕೊಳ್ಳುವುದು ಈ ಕಾನ್​ಕ್ಲೇವ್​ ಉದ್ದೇಶವಾಗಿದೆ ಎಂದು ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರ ತಿಳಿಸಿದೆ.

ಕೆನಡ, ಮೆಕ್ಸಿಕೊ, ನೈಜೀರಿಯಾ, ಪನಾಮಾ, ಉಗಾಂಡಾ ಸೇರಿ ಸುಮಾರು ಐವತ್ತು ರಾಷ್ಟ್ರಗಳು ಅವರಲ್ಲಿನ ಲಸಿಕೆ ಅಭಿಯಾನದಲ್ಲಿ ಕೋವಿನ್​ ತಂತ್ರಾಂಶವನ್ನು ಬಳಸಿಕೊಳ್ಳುವ ಇಂಗಿತ ವ್ಯಕ್ತಪಡಿಸಿದ್ದಾರೆ ಎಂದು ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರದ ಸಿಎಒ ಡಾ.ಆರ್​.ಎಸ್. ಶರ್ಮಾ ಪ್ರಧಾನಿಯವರ ಗಮನಕ್ಕೆ ತಂದರು. ಇದಕ್ಕೆ ಪ್ರತಿಕ್ರಿಯಿಸಿದ ಮೋದಿ, ಜಗತ್ತಿನ ಇತರ ರಾಷ್ಟ್ರಗಳಿಗೂ ಕೋವಿನ್ ಲಭ್ಯ ಇರುವಂತೆ ಮಾಡಲಾಗುವುದು ಎಂಬ ಭರವಸೆಯನ್ನು ನೀಡಿದರು.

https://www.vijayavani.net/what-percentage-of-protection-you-get-after-taking-two-doses-of-vaccine/

https://www.vijayavani.net/does-covid-19-vaccine-affect-fertility/

https://www.vijayavani.net/these-people-can-face-delta-plus-variant-more-effectively/