ಕನ್ನಡವೇ ನನ್ನ ಮೊದಲ ಆದ್ಯತೆ
ರಾಜಸ್ಥಾನ ಮೂಲದ ಮಾರ್ವಾಡಿ ಕುಟುಂಬದ ಹುಡುಗಿ ಸೋನಿ ಮುಲೇವ. ಸದ್ಯ ಕುಟುಂಬ ಸಮೇತ ಮೈಸೂರಿನಲ್ಲಿ ನೆಲೆಸಿರುವ ಅವರು, ಕನ್ನಡ ಕಲಿತು ಚಿತ್ರರಂಗಕ್ಕೆ ಬಂದವರು. ‘ಒಂದಂಕೆ ಕಾಡು’, ‘ಜೆರ್ಸಿ ನಂಬರ್ 10’, ‘ಬೆಂಗಳೂರು ಬಾಯ್ಸ’ ಚಿತ್ರಗಳಲ್ಲಿ ನಟಿಸಿರುವ ಸೋನಿ, ‘ಅಪ್ಪನಿಗೆ ಕನ್ನಡವೆಂದರೆ ಅತ್ಯಂತ ಪ್ರೀತಿ. ನನ್ನಲ್ಲಿ ಕನ್ನಡ ಪ್ರೀತಿ ಮೂಡಲು ಅವರೇ ಕಾರಣ. ಎಂಟನೇ ತರಗತಿಯಿಂದ 12ನೇ ತರಗತಿವರೆಗೆ ನಾನು ಕನ್ನಡವನ್ನೇ ಮೊದಲ ಭಾಷೆಯನ್ನಾಗಿ ಆಯ್ಕೆ ಮಾಡಿಕೊಂಡಿದ್ದೆ. ಆಗಿನಿಂದಲೂ ಕನ್ನಡವೆಂದರೆ ನನಗೆ ಎಲ್ಲಿಲ್ಲದ ಪ್ರೀತಿ’ ಎಂದು ಖುಷಿಯಿಂದ ಹೇಳಿಕೊಳ್ಳುತ್ತಾರೆ. ಬೇರೆ ಭಾಷೆಗಳಲ್ಲಿ ಅವಕಾಶ ಸಿಕ್ಕರೂ ಸೋನಿಗೆ ಕನ್ನಡವೇ ಮೊದಲ ಆದ್ಯತೆಯಂತೆ. ‘ಬೇರೆ ಕಡೆಯಿಂದ ಬಂದು ಕನ್ನಡ ಕಲಿತ ನನ್ನನ್ನು ಕನ್ನಡ ಚಿತ್ರರಂಗದಲ್ಲಿ ಗುರುತಿಸಿದ್ದಾರೆ. ಧಾರಾವಾಹಿ, ಸಿನಿಮಾಗಳನ್ನು ನೋಡಿ ಮೆಚ್ಚಿಕೊಂಡಿದ್ದಾರೆ. ನಾನು ಕನ್ನಡದಲ್ಲಿಯೇ ಮೊದಲು ಡೆಬ್ಯೂ ಮಾಡಬೇಕು ಅನ್ನೋದು ಅಪ್ಪನ ಆಸೆಯೂ ಆಗಿತ್ತು. ಅದು ನೆರವೇರಿದೆ. ಬೇರೆ ಭಾಷೆಗಳಲ್ಲಿ ಅವಕಾಶ ಸಿಕ್ಕರೂ ನನಗೆ ಕನ್ನಡವೇ ಮೊದಲು. ಇದು ನನ್ನ ಭಾಷೆ, ನನ್ನ ಮನೆ ಎಂಬ ಭಾವ’ ಎಂದು ಹೇಳಿಕೊಳ್ಳುತ್ತಾರೆ ಸೋನಿ.
