BBK11: ಆಟದ ಲೆಕ್ಕಾಚಾರ ತಪ್ಪಿಸಿದವರಿಗೆ ಕಿಚ್ಚನ ಕ್ಲಾಸ್​! ಈ ಐವರಲ್ಲಿ ಒಬ್ಬರಿಗೆ 'ಬಿಗ್' ಫಿನಾಲೆಯಿಂದ ಗೇಟ್​ಪಾಸ್​

BBK11:ಕನ್ನಡದ ಅತಿ ದೊಡ್ಡ ರಿಯಾಲಿಟಿ ಶೋ ಬಿಗ್ ಬಾಸ್​ 11ರ ಆಟದ ತೆರೆಗೆ ಇನ್ನೂ ಉಳಿದಿರುವುದು ಕೇವಲ ಎರಡೇ ವಾರಗಳು ಮಾತ್ರ. ಈ ವಾರದ ಮಧ್ಯೆ 100 ದಿನಗಳನ್ನು ಪೂರೈಸಿದ ಬಿಗ್ ಮಂದಿ, ವಾರಾಂತ್ಯದೊಳಗೆ ಆಡಿದ ಅಷ್ಟು ಮಾರಿಹಬ್ಬದ ಟಾಸ್ಕ್​ಗಳಲ್ಲಿ ಬಿರುಸಿನ ಪೈಪೋಟಿ ನೀಡಿರುವುದು ಸದ್ಯ ವೀಕ್ಷಕರ ಕಣ್ಣಿನಲ್ಲಿ ಕಟ್ಟಿದಂತಿದೆ. ವೀಕ್ಷಕರ ನೋಟ ಒಂದಾದರೆ, ಸ್ಪರ್ಧಿಗಳ ಭಾವನೆ, ಆಟದ ದಾಟಿ, ಗುರಿ, ಉದ್ದೇಶಗಳನ್ನು ಸೂಕ್ಷ್ಮವಾಗಿ ಗಮನಿಸುವ ಕಿಚ್ಚ ಸುದೀಪ್​, ಫಿನಾಲೆ ವಾರದಲ್ಲಿ ಕೆಲವರು ಆಡುವ ಭರದಲ್ಲಿ ತೋರಿದ ವರ್ತನೆ ಮತ್ತು ಮಾಡಿದ ತಪ್ಪುಗಳನ್ನು ಈ ವಾರದ ಕಿಚ್ಚನ ಪಂಚಾಯತಿಯಲ್ಲಿ ಎತ್ತಿಹಿಡಿದಿದ್ದಾರೆ.

ಇದನ್ನೂ ಓದಿ: ಮೈಸೂರು-ನಂಜನಗೂಡು ಹೆದ್ದಾರಿಯಲ್ಲಿ ಆ್ಯಕ್ಸಿಡೆಂಟ್ ಪ್ರಮಾಣ ತಗ್ಗಿಸಲು ಅಂಡರ್‌ಪಾಸ್, ಓವರ್‌ಪಾಸ್ ನಿರ್ಮಾಣ 

ಫಿನಾಲೆ ಟಿಕೆಟ್​ಗಾಗಿ ವಾರದಲ್ಲಿ ತ್ರಿವಿಕ್ರಮ್​, ರಜತ್​, ಭವ್ಯ ಆಡಿದ ಆಟಕ್ಕಿಂತ ಒಂದು ಹೆಜ್ಜೆ ಮುಂದೋದ ಹನುಮಂತು, ಅದ್ಭುತ ಪ್ರದರ್ಶನ ತೋರುವಲ್ಲಿ ಮೇಲುಗೈ ಸಾಧಿಸಿದರು. ನಿರ್ಣಯದ ಟಾಸ್ಕ್​ನಲ್ಲಿ ತ್ರಿವಿಕ್ರಮ್​ ಜತೆ ಸಮಯದಲ್ಲಿ ಸೆಣಸಾಡಿದ ಹನುಮಂತು, ಫಿನಾಲೆ ಟಿಕೆಟ್​ ಗೆದ್ದು, ಗ್ರ್ಯಾಂಡ್​ ಫಿನಾಲೆ ತಲುಪಿದ ಮೊದಲ ಸ್ಪರ್ಧಿಯಾಗಿ ಮಿಂಚಿದರು. ಹನುಮಂತು ನಂತರದಲ್ಲಿ ಬಂದ ತ್ರಿವಿಕ್ರಮ್, ಭವ್ಯ ಮತ್ತು ರಜತ್​ ಫಿನಾಲೆ ಟಿಕೆಟ್​ನಿಂದ ಸದ್ಯ ದೂರ ಉಳಿದಿದ್ದಾರೆ. ಆಟದ ಕಾವು ಹೆಚ್ಚಿರುವ ನಡುವೆಯೇ ಕಿಚ್ಚನ ವಾರದ ಪಂಚಾಯತಿ ಬಂದಿರುವುದು ವೀಕ್ಷಕರ ಕುತೂಹಲ ಹೆಚ್ಚಿಸಿದೆ.

ಮೋಕ್ಷಿತಾ, ಚೈತ್ರಾ, ಭವ್ಯ, ತ್ರಿವಿಕ್ರಮ್ ಮತ್ತು ಧನರಾಜ್ ನಡುವೆ ಯಾರು ಈ ವಾರ ಮನೆಯಿಂದ ಹೊರ ಹೋಗಲಿದ್ದಾರೆ? ಯಾರ ಮುಡಿಗೆ ಸೀಸನ್ 11ರ​ ಪಟ್ಟ ಸಿಗಲಿದೆ ಎಂಬುದು ಸದ್ಯ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ಚರ್ಚೆಗೆ ಗ್ರಾಸವಾಗಿದೆ. ಈ ಮಧ್ಯೆ ವಾರದಲ್ಲಿ ವೇಗದ ಮಿತಿ ಮೀರಿ ಆಡಿದವರಾರು, ಆಟದ ಗತಿ ತಪ್ಪಿಸಿದವರು ಯಾರಾರು? ಅನ್ನೋದು ಇಂದಿನ 'ವಾರದ ಕಥೆ ಕಿಚ್ಚನ ಜತೆ' ಸಂಚಿಕೆಯಲ್ಲಿ ತಿಳಿಯಲಿದೆ. ಅಂತಿಮವಾಗಿ ಫಿನಾಲೆ ವಾರದ ಓಟದಿಂದ ಹೊರಗುಳಿಯುವ ಆ ಸ್ಪರ್ಧಿ ಯಾರೆಂಬುದು ಇದೀಗ ವೀಕ್ಷಕರನ್ನು ಕೆರಳಿಸಿರುವ ಕೌತುಕದ ಪ್ರಶ್ನೆ.

https://www.vijayavani.net/if-you-are-genius-solve-this-brain-teaser-puzzle