'ಯಾರೂ ಏನೂ ಹೇಳಿಕೆ ಕೊಡಬೇಡಿ' ಸಚಿವರಿಗೆ ಸಿಎಂ ತಾಕೀತು!

ಬೆಂಗಳೂರು: ರಾಜ್ಯ ಜಲ ಸಂಪನ್ಮೂಲ ಸಚಿವ ರಮೇಶ್​ ಜಾರಕಿಹೊಳಿ ಅವರದ್ದು ಎನ್ನಲಾದ ಸಿಡಿ ಬಿಡುಗಡೆಯಾಗುತ್ತಿದ್ದಂತೆಯೇ ಮುಖ್ಯಮಂತ್ರಿ ಯಡಿಯೂರಪ್ಪ ನಿವಾಸದಲ್ಲಿ ಮಹತ್ವದ ಸಭೆ ನಡೆದಿದೆ. ಸದ್ಯದ ಮಟ್ಟಿಗೆ ಈ ಪ್ರಕರಣದ ಬಗ್ಗೆ ಯಾರೊಬ್ಬರೂ ಯಾವುದೇ ಹೇಳಿಕೆಯನ್ನು ಕೊಡಬೇಡಿ ಎಂದು ಮುಖ್ಯಮಂತ್ರಿಗಳು ಸೂಚನೆ ಕೊಟ್ಟಿದ್ದಾರೆ ಎನ್ನಲಾಗಿದೆ.

ರಮೇಶ್​ ಜಾರಕಿಹೊಳಿ ಪ್ರಕರಣದ ಮಾಹಿತಿಯನ್ನು ಹೈ ಕಮಾಂಡ್​ಗೆ ನೀಡಲಾಗಿದೆ. ಅಲ್ಲಿಂದ ಸೂಚನೆ ಬಂದ ನಂತರವೇ ಮುಖ್ಯಮಂತ್ರಿಗಳು ಕ್ರಮ ತೆಗೆದುಕೊಳ್ಳಲಿದ್ದಾರೆ. ಅಲ್ಲಿಯವರೆಗೂ ಹೇಳಿಕೆ ಕೊಡದಿರುವಂತೆ ಪಕ್ಷದೆ ನಾಯಕರಿಗೆ ಯಡಿಯೂರಪ್ಪ ಅವರು ಸೂಚನೆ ನೀಡಿದ್ದಾರೆ ಎನ್ನಲಾಗಿದೆ. ಇಂದು ಸಂಜೆ ಅವರ ಅಧಿಕೃತ ನಿವಾಸದಲ್ಲಿ ಬೊಮ್ಮಯಿ ಹಾಗೂ ಅಡ್ವೊಕೇಟ್ ಜನರಲ್ ಪ್ರಭುಲಿಂಗ ನಾವಡಗಿ ಸಭೆ ನಡೆಸಿದ್ದು ಈ ಕುರಿತಾಗಿ ಚರ್ಚೆ ನಡೆಸಿರುವುದಾಗಿ ಹೇಳಲಾಗಿದೆ.

ಸರ್ಕಾರಕ್ಕೆ ಈ ಆರೋಪದಿಂದಾಗಿ ಭಾರೀ ಮುಜುಗರವಾಗಿದ್ದು, ಅದರಿಂದ ತಪ್ಪಿಸಿಕೊಳ್ಳಲು ಹಲವು ರೀತಿಯ ಪ್ಲಾನ್​ ಮಾಡುತ್ತಿದೆ ಎನ್ನಲಾಗಿದೆ. ವೀಡಿಯೋ ಯಾವ ವರ್ಷದ್ದು ಅನ್ನುವ ವರದಿ ಪಡೆಯುವ ಸಾಧ್ಯತೆಯಿದೆ. ಮೇಲ್ನೋಟಕ್ಕೆ ಇದು ಹನಿಟ್ರ್ಯಾಪ್​ನಂತೆ ಕಂಡುಬಂದಿದೆ. ಮಹಿಳೆ ಜತೆ ಸಚಿವರು ಅನೇಕ ವರ್ಷಗಳಿಂದ ಒಡನಾಟದಲ್ಲಿರುವ ಸಾಧ್ಯತೆಯಿದೆ. ವಿಡಿಯೋ ಬಗ್ಗೆ ತನಿಖೆ ನಡೆಸುವುದಾಗಿ ಹೇಳುವ ಸಾಧ್ಯತೆಯೂ ಇದೆ. ಅದಾದ ಮೇಲೆ ತನಿಖೆ ಬರುವವರೆಗೂ ಈ ಕುರಿತು ಚರ್ಚೆ ಮುಂದೂಡಲಾಗುವುದು. ಒಂದು ವೇಳೆ ವಿರೋಧ ಪಕ್ಷಗಳ ಒತ್ತಡ ಹೆಚ್ಚಾದರೆ ಅಂತಿಮವಾಗಿ ಸಚಿವರ ರಾಜೀನೇಮೆ ಪಡೆಯುವ ಸಾಧ್ಯತೆ ಇದೆ ಎನ್ನಲಾಗಿದೆ.

ನಾಳೆ ಸಚಿವ ಸಂಪುಟವಿದ್ದು, ಅದರಲ್ಲಿ ಈ ಕುರಿತಾಗಿ ಚರ್ಚೆ ಆಗುವ ಸಾಧ್ಯತೆಯಿದೆ. ಆ ಸಮಯದಲ್ಲಿ ಯಾವ ರೀತಿಯಲ್ಲಿ ಪರಿಸ್ಥಿತಿ ನಿಯಂತ್ರಿಸಬೇಕು ಎನ್ನುವುದರ ಕುರಿತು ನಾಯಕರು ಚರ್ಚೆ ಮಾಡಿರುವುದಾಗಿ ಹೇಳಲಾಗಿದೆ.

https://www.vijayavani.net/two-more-ministers-cd-will-be-relased/

https://www.vijayavani.net/is-karnataka-bhavan-is-your-bedroom-congress-question-for-bjp-leaders/