ಮುಂದ್ರಾ ಡಾಕ್​ಯಾರ್ಡ್​ನಲ್ಲಿದ್ದ ಐಎಸ್​ಐ ಏಜೆಂಟ್​ ಎನ್​ಐಎ ಬಲೆಗೆ ಬಿದ್ದ

ನವದೆಹಲಿ: ಗುಜರಾತ್​ನ ಮುಂದ್ರಾ ಡಾಕ್​ಯಾರ್ಡ್​ನಲ್ಲಿ ಸೂಪರ್​ವೈಸರ್ ಆಗಿದ್ದ ಐಎಸ್​ಐ ಏಜೆಂಟ್ ಒಬ್ಬ ನ್ಯಾಷನಲ್ ಇನ್​ವೆಸ್ಟಿಗೇಶನ್ ಏಜೆನ್ಸಿ(ಎನ್​ಐಎ) ಬಲೆಗೆ ಬಿದ್ದಿದ್ದಾನೆ. ಆತ ಪಾಕಿಸ್ತಾನದ ಐಎಸ್​ಐ ಪರವಾಗಿ ಭಾರತದಲ್ಲಿ ಕೆಲಸ ಮಾಡುತ್ತಿರುವ ಬಗ್ಗೆ ಸಾಕ್ಷ್ಯಾಧಾರಗಳು ದೊರಕಿದ ಕಾರಣ ಆತನನ್ನು ಎನ್​ಐಎ ಬಂಧಿಸಿದೆ.

ಬಂಧಿತ ಐಎಸ್​ಐ ಏಜೆಂಟ್​ನನ್ನು ರಜಾಕ್ ಭಾಯ್​ ಕುಂಭಾರ್ ಎಂದು ಗುರುತಿಸಲಾಗಿದೆ. ಈತ ಗುಜರಾತ್​ನ ಪಶ್ಚಿಮ ಕಛ್​ ನಿವಾಸಿ. ಭಾನುವಾರ ಈತನನ್ನು ಬಂಧಿಸಲಾಗಿದೆ. ಎನ್​ಐಎ ಉತ್ತರ ಪ್ರದೇಶದ ಡಿಫೆನ್ಸ್​/ಐಎಸ್​ಐ ಕೇಸ್​ ನ ತನಿಖೆ ನಡೆಸುತ್ತಿರುವಾಗ ಈತನ ಕುರಿತ ಮಾಹಿತಿ ಲಭ್ಯವಾಗಿತ್ತು. ಅಲ್ಲದೆ, ಸಾಕ್ಷ್ಯಾಧಾರಗಳೂ ಲಭಿಸಿದ್ದವು ಎಂದು ಮೂಲಗಳು ತಿಳಿಸಿವೆ.

ಇದನ್ನೂ ಓದಿ: ಕರೊನಾ ಹೆಚ್ಚಳಕ್ಕೆ ಗಂಟೆ ಬಾರಿಸಿ, ಚಪ್ಪಾಳೆ ತಟ್ಟಿದ್ದೇ ಕಾರಣ ಎಂದ ದಿನೇಶ್‌ ಗುಂಡೂರಾವ್‌: ಕಮೆಂಟಿಗರು ಕಿಡಿಕಿಡಿ…

ಉತ್ತರ ಪ್ರದೇಶದ ಕೇಸ್​ಗೆ ಸಂಬಂಧಿಸಿ ಜನವರಿ 19ರಂದು ಲಖನೌ ನ ಗೋಮತಿ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಅದು ಚಾಂದೋಲಿ ಜಿಲ್ಲೆಯ ಮೊಘಲ್​ ಸರಾಯ್​ ನ ಮೊಹಮ್ಮದ್ ರಶೀದ್ ಬಂಧನಕ್ಕೆ ಸಂಬಂಧಿಸಿದ್ದಾಗಿದೆ. ಇದಾಗಿ, ಎನ್​ಐಎ ಏಪ್ರಿಲ್ 6ರಂದು ಕೇಸನ್ನು ಮತ್ತೆ ರಿಜಿಸ್ಟರ್ ಮಾಡಿಕೊಂಡಿದ್ದು, ಐಪಿಸಿ ಮತ್ತು ಯುಎಪಿಎ ಕಾಯ್ದೆಯ ಹಲವು ಅಂಶಗಳನ್ನು ಸೇರಿಸಿತ್ತು.

ಇದನ್ನೂ ಓದಿ: ಈ ವಿಷಯ ಕೊನೆಗೂ ಅರ್ಥವಾಗಲಿಲ್ಲ … ಹೀಗಂತ ಜಗ್ಗೇಶ್​ ಹೇಳಿದ್ದ್ಯಾಕೆ?

ವಿಚಾರಣೆ ಸಂದರ್ಭದಲ್ಲಿ ರಶೀದ್​ ಪಾಕಿಸ್ತಾನದ ರಕ್ಷಣಾ ಇಲಾಖೆ ಅಥವಾ ಐಎಸ್​ಐ ಹ್ಯಾಂಡ್ಲರ್ಸ್ ಜತೆಗೆ ಸಂಪರ್ಕದಲ್ಲಿರುವುದು ಬಹಿರಂಗವಾಗಿದೆ. ಅಲ್ಲದೆ ರಶೀದ್ ಎರಡು ಬಾರಿ ಪಾಕಿಸ್ತಾನಕ್ಕೆ ಹೋಗಿ ಬಂದಿದ್ದ. ಆತ ಭಾರತದ ಸೂಕ್ಷ್ಮ ಚಿತ್ರಗಳನ್ನು ಪಾಕಿಸ್ತಾನಕ್ಕೆ ರವಾನಿಸಿದ್ದ. ರಕ್ಷಣಾ ಪಡೆಗಳ ನಡೆಯ ಕುರಿತ ಮಾಹಿತಿಯನ್ನೂ ಅಲ್ಲಿಗೆ ಕಳುಹಿಸಿದ್ದ ಎಂದು ಎನ್​ಐಎ ಮೂಲಗಳು ತಿಳಿಸಿವೆ.

ಇದನ್ನೂ ಓದಿ: ಸಿಡಿಪಿ ಬಿಡುಗಡೆ ಮಾಡಿದ ಶಿವಣ್ಣ; ಥ್ಯಾಂಕ್ಸ್​ ಹೇಳಿದ ಕಿಚ್ಚ …

ಇದೇ ವಿಚಾರಣೆ ವೇಳೆ, ಕುಂಭಾರ್ ಕುರಿತ ವಿವರವನ್ನೂ ರಶೀದ್ ಬಾಯ್ಬಿಟ್ಟಿದ್ದ. ಕುಂಭಾರ್ ಐಎಸ್​ಐ ಏಜೆಂಟ್ ಆಗಿದ್ದು ರಿಜ್ವಾನ್ ಎಂಬಾತನ ಖಾತೆಗೆ 5,000 ರೂಪಾಯಿ ಪೇಟಿಎಂ ಮೂಲಕ ರವಾನಿಸಿದ್ದ ಎಂಬುದನ್ನೂ ಹೇಳಿದ್ದ. ಮಾಹಿತಿ ನೀಡಿದ್ದಕ್ಕಾಗಿ ಐಎಸ್​ಐ ಹ್ಯಾಂಡ್ಲರ್ಸ್ ನಿರ್ದೇಶನದಂತೆ ಕುಂಭಾರ್​ ಈ ಹಣವನ್ನು ರಶೀದ್​ಗೆ ಪಾವತಿಸಿದ್ದ. ಈ ಸಂಬಂಧ ಎನ್​ಐಎ ಅಧಿಕಾರಿಗಳು ಕಳೆದ ಗುರುವಾರವೇ ಕುಂಭಾರ್ ಮನೆಯನ್ನು ತಮ್ಮ ವಶಕ್ಕೆ ತೆಗೆದುಕೊಂಡು ಸೂಕ್ಷ್ಮ ದಾಖಲಾತಿಗಳನ್ನು ವಶಪಡಿಸಿಕೊಂಡಿದ್ದರು. (ಏಜೆನ್ಸೀಸ್)

https://www.vijayavani.net/prashant-bhushan-fined-re-1-by-supreme-court-in-contempt-case/