ಹೊಸ ತಳಿ, ಹಳೇ ಸೂತ್ರ: ಒಮಿಕ್ರಾನ್ ತಡೆಗೆ 31ರವರೆಗೆ ನಿರ್ಬಂಧ, 2 ಡೋಸ್ ಲಸಿಕೆ ಕಡ್ಡಾಯ

ಬೆಂಗಳೂರು: ಕರೊನಾ ರೂಪಾಂತರಿ ಒಮಿಕ್ರಾನ್ ವೈರಾಣು ಭೀತಿಯಿದ್ದರೂ ದೈನಂದಿನ ಚಟುವಟಿಕೆ ಹಾಗೂ ನಿಯಂತ್ರಣ ಕ್ರಮಗಳ ನಡುವೆ ಸರ್ಕಾರ ಸಮತೋಲನದ ಹೆಜ್ಜೆಯಿಟ್ಟಿದೆ. ಹೊಸ ಪ್ರಭೇದವು ವೇಗವಾಗಿ ಹರಡುತ್ತದೆ, ರೋಗ ಲಕ್ಷಣಗಳು ಸೌಮ್ಯವಾಗಿವೆ, ಯಾವುದೇ ಸಾವು ಸಂಭವಿಸಿಲ್ಲ ಎಂಬ ಅನೌಪಚಾರಿಕ ಮಾಹಿತಿ ಲಭ್ಯತೆಯಿಂದ ಸದ್ಯಕ್ಕೆ ನೆಮ್ಮದಿ ನಿಟ್ಟುಸಿರುಬಿಟ್ಟಿದೆ. ಒಮಿಕ್ರಾನ್ ವರ್ತನೆ ಹಾಗೂ ತೀವ್ರತೆ ದೃಢಪಡುವ ತನಕ ಸಹಜ ಜನ-ಜೀವನಕ್ಕೆ ತೊಂದರೆಯಾಗದಂತಹ ಹೊಸ ಮಾರ್ಗಸೂಚಿ ಪ್ರಕಟಿಸಿದೆ.

ಶಾಲೆ-ಕಾಲೇಜುಗಳಲ್ಲಿ ನೇರ ತರಗತಿ ಯಥಾರೀತಿ ಮುಂದುವರಿಯಲಿದೆ. ಉದ್ಯಮ, ವ್ಯಾಪಾರ-ವಹಿವಾಟು, ಜನರ ಓಡಾಟ, ಬಾರ್, ಪಬ್, ರೆಸ್ಟೋರೆಂಟ್, ಹೋಟೆಲ್, ಈಜುಗೊಳ, ಜಿಮ್ ಮತ್ತಿತರ ದೈನಂದಿನ ಚಟುವಟಿಕೆ ಮುಕ್ತವಾಗಿವೆ. ದೇಶದಲ್ಲೇ ಮೊದಲಿಗೆ ರಾಜ್ಯದಲ್ಲಿ ಎರಡು ಒಮಿಕ್ರಾನ್ ಪ್ರಕರಣ ದೃಢಪಟ್ಟ ಹಿನ್ನೆಲೆಯಲ್ಲಿ ಸಿಎಂ ಗೃಹ ಕಚೇರಿ ಕೃಷ್ಣಾದಲ್ಲಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಸಚಿವರು, ತಜ್ಞರು ಮತ್ತು ಅಧಿಕಾರಿಗಳ ಜತೆ ಶುಕ್ರವಾರ ಸುದೀರ್ಘವಾಗಿ ರ್ಚಚಿಸಿದರು.

ದಂಡ ತಪ್ಪಿದ್ದಲ್ಲ: ವೈಜ್ಞಾನಿಕ ವಿಶ್ಲೇಷಣೆ, ಖಚಿತ ವರದಿ ತನಕ ಕಾಯದೆ ಅಗತ್ಯವಿರುವ ಮುನ್ನೆಚ್ಚರಿಕೆ ಕ್ರಮಗಳಿಗೆ ಒತ್ತು ನೀಡಿ, ಒಮಿಕ್ರಾನ್ ಕಟ್ಟಿಹಾಕುವ ನಿಟ್ಟಿನಲ್ಲೂ ಸರ್ಕಾರ ಹಳೆಯ ಸೂತ್ರ ಜಾರಿಗೊಳಿಸಿದೆ. ಕಾರ್ಯಕ್ರಮಗಳಲ್ಲಿ ಜನದಟ್ಟಣೆಗೆ ನಿರ್ಬಂಧ, ಮುನ್ನೆಚ್ಚರಿಕೆ ನಿಯಮಗಳ ಪಾಲನೆಗಾಗಿ ದಂಡದ ಮಾರ್ಗ ಕಂಡುಕೊಂಡಿದೆ.

ಹಾಸಿಗೆ, ಔಷಧ ಸನ್ನದ್ಧ: ಪರಿಸ್ಥಿತಿ ನಿರ್ವಹಣೆಗಾಗಿ ಆಸ್ಪತ್ರೆ ಹಾಸಿಗೆಗಳು, ಆಕ್ಸಿಜನ್ ಹಾಸಿಗೆಗಳು, ಔಷಧ ಇನ್ನಿತರ ಪರಿಕರಗಳು, ಆಕ್ಸಿಜನ್ ಉತ್ಪಾದನಾ ಸ್ಥಾವರಗಳು, ಸಂಗ್ರಹಣೆ ಮತ್ತು ಸಾಗಣೆ ಜಾಲ ಚುರುಕು, ವೈದ್ಯರು ಮತ್ತು ಸಿಬ್ಬಂದಿಯನ್ನು ಸನ್ನದ್ಧ ಸ್ಥಿತಿಯಲ್ಲಿರಿಸುವುದು ಸೇರಿದಂತೆ ಹಲವು ಕ್ರಮಗಳಿಗೆ ಸರ್ಕಾರ ಮುಂದಾಗಿದೆ.

ವೈರುಧ್ಯದ ವರದಿ ತನಿಖೆ: ದಕ್ಷಿಣ ಆಫ್ರಿಕಾದಿಂದ ಪ್ರಯಾಣಿಸಿದ ಒಮಿಕ್ರಾನ್ ವೈರಾಣು ಸೋಂಕಿತ ವ್ಯಕ್ತಿಯ ಪರೀಕ್ಷಾ ವರದಿಗಳಲ್ಲಿ ವೈರುಧ್ಯ ಕಂಡು ಬಂದಿರುವ ಕಾರಣ ಕೂಲಂಕಷ ತನಿಖೆ ನಡೆಸಲು ನಿರ್ಧರಿಸಲಾಗಿದೆ. ಪ್ರಯೋಗಾಲಯದಿಂದ ಲೋಪವಾಯಿತೇ? ಅಥವಾ ಬೇರೆ ಕಾರಣಗಳು ಇವೆಯೆ ಎಂಬ ಬಗ್ಗೆ ತನಿಖೆ ನಡೆಸಿ ವರದಿ ಸಲ್ಲಿಸುವ ಜವಾಬ್ದಾರಿಯನ್ನು ಹೈಗ್ರೌಂಡ್ಸ್ ಪೊಲೀಸರಿಗೆ ಒಪ್ಪಿಸಲಾಗಿದೆ ಎಂದು ಆರ್.ಅಶೋಕ್ ಹೇಳಿದರು.

ಬೆಂಗಳೂರಿನ ಖಾಸಗಿ ಹೋಟೆಲೊಂದರಲ್ಲಿ ನಡೆದ ಸಮ್ಮೇಳನದಲ್ಲಿ ಈ ವ್ಯಕ್ತಿ ಭಾಗವಹಿಸಿದ್ದು, ಪ್ರಾರಂಭಿಕ ಪರೀಕ್ಷೆಯಲ್ಲಿ ಒಮಿಕ್ರಾನ್ ವೈರಾಣು ಸೋಂಕು ಶಂಕೆ ವ್ಯಕ್ತವಾಗಿತ್ತು. ನಂತರ ನೆಗೆಟಿವ್ ವರದಿ ಪಡೆದುಕೊಂಡು ದುಬೈಗೆ ತೆರಳಿದ್ದಾರೆ ಎಂದು ಹೇಳಲಾಗುತ್ತಿದೆ.

ಮುಖ್ಯಾಂಶಗಳು

• ಒಮಿಕ್ರಾನ್ ರೂಪಾಂತರಿ ತಳಿಯ ವೈರಸ್​ನಿಂದ ರಾಜ್ಯದಲ್ಲಿ 2 ಪ್ರಕರಣಗಳು ಪತ್ತೆ, ಈವರೆಗೆ ವಿಶ್ವದಲ್ಲಿ 400 ಪ್ರಕರಣಗಳು ವರದಿಯಾಗಿವೆ.
• ರಾಜ್ಯದಲ್ಲಿ ವರದಿಯಾದ 2 ಪ್ರಕರಣಗಳ ಪರೀಕ್ಷಾ ವರದಿ ವಿಶ್ಲೇಷಿಸಿ ಸಲಹೆ ನೀಡುವಂತೆ ತಾಂತ್ರಿಕ ತಜ್ಞರ ಸಲಹಾ ಸಮಿತಿಗೆ ಸೂಚನೆ
• ಎನ್​ಸಿಬಿಎನ್ ಪ್ರಯೋಗಾಲಯದ ವಿವರವಾದ ವರದಿ ಒದಗಿಸುವಂತೆ ಕೇಂದ್ರ ಸರ್ಕಾರಕ್ಕೆ ಪತ್ರ
• ರಾಜ್ಯಾದ್ಯಂತ ಕರೊನಾ ನಿಯಂತ್ರಣ ಕೊಠಡಿಗಳು ಪುನರಾರಂಭ
• ಪರೀಕ್ಷಾ ಸಾಮರ್ಥ್ಯ ಹಾಗೂ ದೈನಂದಿನ ಪರೀಕ್ಷಾ ಪ್ರಮಾಣ 60 ಸಾವಿರದಿಂದ ಒಂದು ಲಕ್ಷಕ್ಕೆ ಹೆಚ್ಚಳದ ಗುರಿ
• ವಿಮಾನ ನಿಲ್ದಾಣಗಳಲ್ಲಿ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಪರೀಕ್ಷೆ ನಡೆಸಿ, ನೆಗೆಟಿವ್ ವರದಿ ಬಂದ ನಂತರವೇ ಹೊರಗೆ ಕಳುಹಿಸುವುದು
• ಅಂತಾರಾಷ್ಟ್ರೀಯ ಪ್ರಯಾಣಿಕರ ಅನುಕೂಲಕ್ಕಾಗಿ ಹೆಚ್ಚುವರಿಯಾಗಿ ಪರೀಕ್ಷಾ ಯಂತ್ರಗಳ ಅಳವಡಿಕೆ, ವಿಮಾನ ಯಾನ ಸಂಸ್ಥೆಗಳ ಜತೆಗೆ ಮಾತುಕತೆ ನಡೆಸಿ ಅರಿವು ಮೂಡಿಸುವುದು
• ವಿಮಾನ ನಿಲ್ದಾಣಗಳಲ್ಲಿ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಆರ್​ಟಿಪಿಸಿಆರ್ ಟೆಸ್ಟ್​ಗೆ 500 ರೂ., ತಪಾಸಣೆ ವರದಿ ನೀಡುವುದಕ್ಕೆ 3,000 ರೂ. ಶುಲ್ಕ ನಿಗದಿ
• ಅಂತಾರಾಜ್ಯ ವಿಮಾನ ಪ್ರಯಾಣಿಕರಿಗೆ ಯಾವುದೇ ನಿರ್ಬಂಧಗಳಿಲ್ಲ

ಚುನಾವಣಾ ಪ್ರಚಾರ, ಹಾರಿಕೆ ಉತ್ತರ: ಸೋಂಕು ಹರಡುವಿಕೆ ತಡೆಯಲು ಶಾಲೆ-ಕಾಲೇಜುಗಳಲ್ಲಿ ಸಮಾರಂಭ, ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ನಿರ್ಬಂಧ ವಿಧಿಸಲಾಗಿದೆ. ಆದರೆ ವಿಧಾನ ಪರಿಷತ್ ಚುನಾವಣಾ ಪ್ರಚಾರ ಸಭೆಗಳಿಗೆ ನಿರ್ಬಂಧವಿಲ್ಲವೇಕೆ ? ಎಂಬ ಪತ್ರಕರ್ತರ ಪ್ರಶ್ನೆಗೆ ಆರ್.ಅಶೋಕ್ ನೇರವಾಗಿ ಉತ್ತರಿಸದೇ ನುಣುಚಿಕೊಂಡರು. ಶಾಲೆ-ಕಾಲೇಜುಗಳಲ್ಲಿ ಇತ್ತೀಚೆಗೆ ಹೆಚ್ಚು ಸೋಂಕು ಪ್ರಕರಣಗಳು ವರದಿಯಾದ ಹಿನ್ನೆಲೆಯಲ್ಲಿ ನಿರ್ಬಂಧ ವಿಧಿಸಲಾಗಿದೆ ಎಂದು ಹಾರಿಕೆ ಉತ್ತರ ನೀಡಿದರು.

ಐದು ಅಂಶಗಳ ಸೂತ್ರ ಪಾಲನೆ: ಕೇಂದ್ರ ಸರ್ಕಾರದ ನಿರ್ದೇಶನ ಹಾಗೂ ಮುಖ್ಯಮಂತ್ರಿ ಬೊಮ್ಮಾಯಿ ನೇತೃತ್ವದ ಸಭೆಯಲ್ಲಿ ತೆಗೆದುಕೊಂಡ ತೀರ್ವನದಂತೆ ಹೊಸ ಮಾರ್ಗಸೂಚಿಯನ್ನು ಶುಕ್ರವಾರ ಪ್ರಕಟಿಸಲಾಗಿದೆ. ಪರೀಕ್ಷೆ, ಪತ್ತೆ, ಚಿಕಿತ್ಸೆ, ಲಸಿಕೆ ಸೇರಿದಂತೆ ಐದು ಅಂಶಗಳ ಸೂತ್ರಗಳು, ಹಲವು ನಿರ್ಬಂಧಗಳನ್ನು ಡಿ.31ರವರೆಗೆ ವಿಸ್ತರಿಸಲಾಗಿದ್ದು, ಪರಿಣಾಮಕಾರಿಯಾಗಿ ಅನುಷ್ಠಾನಕ್ಕೆ ತರಬೇಕು ಎಂದು ನಿರ್ದೇಶಿಸಿದೆ.

ಸಂಪರ್ಕವಿಲ್ಲದವರ ಶೋಧ ಚುರುಕು: ಕರೊನಾ ಒಮಿಕ್ರಾನ್ ವೈರಾಣು ಸೋಂಕುಪೀಡಿತರಾದ ಶಂಕೆಯುಳ್ಳ 10 ಜನರ ಸಂಪರ್ಕವಿಲ್ಲದಾಗಿದೆ. ಶೋಧ ಕಾರ್ಯ ಚುರುಕು ಗೊಳಿಸಲು ಬೆಂಗಳೂರು ಪೊಲೀಸ್ ಆಯುಕ್ತರಿಗೆ ಸೂಚಿಸಿದ್ದು, 24 ತಾಸಿನೊಳಗೆ ಪತ್ತೆಯಾಗುವ ವಿಶ್ವಾಸವಿದೆ ಎಂದು ಸಚಿವ ಆರ್.ಅಶೋಕ್ ತಿಳಿಸಿದರು.

ಮಾರ್ಗಸೂಚಿಯಲ್ಲೇನಿದೆ?

• ತಪಾಸಣೆ, ಪತ್ತೆ, ಚಿಕಿತ್ಸೆ, ಲಸಿಕೆ ಮತ್ತು ಮುನ್ನೆಚ್ಚರಿಕೆ ನಿಯಮಗಳೆಂಬ ಐದು ಅಂಶಗಳು ಕಟ್ಟುನಿಟ್ಟಾಗಿ ಅನುಷ್ಠಾನ
• ಶೈಕ್ಷಣಿಕ ಸಂಸ್ಥೆಗಳಲ್ಲಿ 2022ರ ಜ.15ರವರೆಗೆ ಸಮಾರಂಭ, ಸಾಂಸ್ಕೃತಿಕ ಕಾರ್ಯಕ್ರಮಗಳು ನಿಷಿದ್ಧ
• ಶಾಲೆ/ಕಾಲೇಜಿಗೆ ಹೋಗುವ 18 ವರ್ಷ ವಯೋಮಿತಿ ಒಳಗಿನ ಮಕ್ಕಳ ಪಾಲಕರು ಲಸಿಕೆ ಎರಡು ಡೋಸ್ ಪಡೆದಿರುವುದು ಕಡ್ಡಾಯ, ಮದುವೆ, ಇನ್ನಿತರ ಸಭೆ-ಸಮಾರಂಭಗಳಿಗೆ 500 ಜನರ ಮಿತಿ. ಮುನ್ನೆಚ್ಚರಿಕೆ ನಿಯಮ ಪಾಲನೆ ಕಡ್ಡಾಯ, ಸಂಘಟಕರಿಗೆ ಹೊಣೆಗಾರಿಕೆ
• ಸರ್ಕಾರಿ ನೌಕರರಿಗೆ 2 ಡೋಸ್ ಲಸಿಕೆ ಕಡ್ಡಾಯ
• ಲಸಿಕೆ ಎರಡು ಡೋಸ್ ಪಡೆದವರಿಗೆ ಮಾತ್ರ ಮಾಲ್, ಚಿತ್ರಮಂದಿರ ಪ್ರವೇಶಕ್ಕೆ ಅವಕಾಶ
• ಮಾಸ್ಕ್ ಧರಿಸದಿದ್ದರೆ ಪಾಲಿಕೆ ವ್ಯಾಪ್ತಿಯಲ್ಲಿ 250 ರೂ., ಇತರೆ ಪ್ರದೇಶಗಳಲ್ಲಿ 100 ರೂ. ದಂಡ
• ಹೆಚ್ಚು ಸೋಂಕು ಪ್ರಕರಣಗಳು ವರದಿಯಾದ ಸ್ಥಳಗಳನ್ನು ಸೂಕ್ಷ್ಮ ನಿಯಂತ್ರಿತ ವಲಯವೆಂದು ಗುರುತಿಸಿ, ಕಟ್ಟೆಚ್ಚರವಹಿಸುವುದು, ಆರೋಗ್ಯ ಸಿಬ್ಬಂದಿ, 65 ವರ್ಷ ವಯೋಮಿತಿ ಮೀರಿದವರು ಹಾಗೂ ಇತರ ಆರೋಗ್ಯ ಸಮಸ್ಯೆ ಉಳ್ಳವರಿಗೆ ಸರ್ಕಾರದಿಂದಲೇ ಶೇ.100 ಪರೀಕ್ಷೆ
• ಕೇರಳ, ಮಹಾರಾಷ್ಟ್ರದಿಂದ ಬರುವವರಿಗೆ ಗಡಿಗಳಲ್ಲಿ ತಪಾಸಣೆ, ಆರ್​ಟಿಪಿಸಿಆರ್ ಟೆಸ್ಟ್ ನೆಗೆಟಿವ್ ವರದಿ ಪರಿಶೀಲನೆ ಇನ್ನಿತರ ನಿಯಮ ಯಥಾರೀತಿ ಮುಂದುವರಿಕೆ

https://www.vijayavani.net/one-who-said-to-be-first-omicron-case-of-india-in-not-in-country-now-and-he-is-not-indian/

https://www.vijayavani.net/omicron-was-spread-in-international-doctors-conference/