ಸರಕು ಮತ್ತು ಸೇವಾ ತೆರಿಗೆ ಜಾರಿಗೆ ಬಂದು ನಾಲ್ಕು ವರ್ಷವಾಗಿದ್ದು, ಒಟ್ಟು 66 ಕೋಟಿಗೂ ಅಧಿಕ ಜಿಎಸ್ಟಿ ರಿಟರ್ನ್ಸ್ ಸಲ್ಲಿಕೆಯಾಗಿದೆ. ತೆರಿಗೆ ದರಗಳ ಇಳಿಕೆಗೆ ಮತ್ತು ತೆರಿಗೆ ಅನುಸರಣೆ, ಸಂಗ್ರಹ ಹೆಚ್ಚಾಗುವುದಕ್ಕೂ ಇದು ಕಾರಣವಾಗಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಬುಧವಾರ ತಿಳಿಸಿದೆ. ದೇಶಾದ್ಯಂತ ಜಾರಿಗೆ ಬಂದ ಜಿಎಸ್ಟಿಯು ಅಬಕಾರಿ ಸುಂಕ, ಸೇವಾ ತೆರಿಗೆ, ವ್ಯಾಟ್, 13 ಸೆಸ್ಗಳು ಸೇರಿ 17 ಸ್ಥಳೀಯ ಸುಂಕಗಳನ್ನು ಒಳಗೊಂಡಿದೆ. ಜಿಎಸ್ಟಿ ಅಧೀನದಲ್ಲಿ 40 ಲಕ್ಷ ರೂಪಾಯಿ ತನಕದ ವ್ಯಾಪಾರ ವಹಿವಾಟು ವಿನಾಯಿತಿ ಪಡೆದುಕೊಂಡಿದೆ. ಇದಲ್ಲದೆ, 1.5 ಕೋಟಿ ತನಕದ ವಹಿವಾಟು ಉಳ್ಳ ವ್ಯಾಪಾರಸ್ಥರು ಕಂಪೋಸಿಷನ್ ಸ್ಕೀಮ್ ಅಳವಡಿಸಿಕೊಂಡು ಶೇಕಡ 1 ತೆರಿಗೆ ಮಾತ್ರ ಪಾವತಿಸುವುದಕ್ಕೂ ಅವಕಾಶವಿದೆ. ಸೇವೆಗಳಿಗೆ ಸಂಬಂಧಿಸಿ, ವಾರ್ಷಿಕ 20 ಲಕ್ಷ ರೂಪಾಯಿ ತನಕದ ವಹಿವಾಟು ಜಿಎಸ್ಟಿಯಿಂದ ಮುಕ್ತವಾಗಿದೆ. 50 ಲಕ್ಷ ರೂಪಾಯಿ ತನಕದ ವಾರ್ಷಿಕ ವಹಿವಾಟು ಹೊಂದಿದ ಸೇವಾ ಪೂರೈಕೆ ವ್ಯಾಪಾರಸ್ಥರು ಕಂಪೋಸಿಶನ್ ಸ್ಕೀಮ್ ಅಳವಡಿಸಿಕೊಂಡು ಶೇಕಡ 6 ತೆರಿಗೆ ಪಾವತಿಸಬಹುದು.
