ಚಂದ್ರಘಂಟಾದೇವಿಯ ಪೂಜಾವಿಧಾನವು ಬಹಳ ವಿಶೇಷವಾಗಿದೆ. ಆರಾಧಕರು ಅಂದು ದೇವಿಗೆ ಬೂದುಬಣ್ಣದ ಸೀರೆ ಹಾಗೂ ಕುಪ್ಪಸ ತೊಡಿಸಿ ಅಲಂಕರಿಸುತ್ತಾರೆ. ಬೂದು ಅಥವಾ ಕೇಸರಿಬಣ್ಣದ ಹೂಗಳಿಂದ ಅರ್ಚಿಸುತ್ತಾರೆ. ಅಕ್ಷತೆ, ಗೆಜ್ಜೆವಸ್ತ್ರಗಳಿಂದ ಅಲಂಕರಿಸುತ್ತಾರೆ. ಲಲಿತಾಸಹಸ್ರನಾಮವನ್ನು ಹೇಳುತ್ತಾ ಭಕ್ತಿಭಾವಗಳಿಂದ ಆರಾಧನೆ ಮಾಡುತ್ತಾರೆ. ಅಕ್ಕಿ ಮತ್ತು ಕಡಲೆ ಬೇಳೆಯಿಂದ ಮಾಡಿದ ಪಾಯಸಾನ್ನವನ್ನು ನೇವೇದ್ಯ ಮಾಡುತ್ತಾರೆ. ತೃತೀಯಾದಂದು ದೇವಿಗೆ ಕೌಮಾರಿ ಅಲಂಕಾರ ಮಾಡುವುದು ರೂಢಿಯಲ್ಲಿದೆ. ಚಂದ್ರಘಂಟಾ ದೇವಿಯ ಕೃಪೆಯಿಂದ ಅಲೌಕಿಕ ವಸ್ತುಗಳ ದರ್ಶನವಾಗುತ್ತದೆ ಮತ್ತು ವಿವಿಧ ಪ್ರಕಾರದ ದಿವ್ಯಧ್ವನಿಗಳು ಕೇಳಿಸುತ್ತವೆ ಎಂಬ ನಂಬಿಕೆಯಿದೆ. ದೇವಿಯ ಉಪಾಸನೆಯಿಂದ ಸಮಸ್ತ ಪಾಪಗಳು ಹಾಗೂ ಬಂಧನಗಳು ನಾಶವಾಗುತ್ತವೆ. ಜನ್ಮಾಂತರಗಳಿಂದ ಕಾಡುತ್ತಿರುವ ಪ್ರೇತಬಾಧೆಗಳಿದ್ದರೆ ಪರಿಹಾರವಾಗುತ್ತದೆ. ಸಂಸಾರವು ಕಷ್ಟಗಳಿಂದ ಮುಕ್ತವಾಗುತ್ತದೆ. ದೇವಿಯ ಧ್ಯಾನವು ಇಹ ಮತ್ತು ಪರದಲ್ಲಿ ಶ್ರೇಯಸ್ಕರವಾದುದು. ಇವಳ ಅರ್ಚನೆಯಿಂದ ಶಾಂತಿ, ಧೈರ್ಯ, ಸಮಾಧಾನಗಳು ಪ್ರಾಪ್ತವಾಗುವುದಲ್ಲದೇ ಧನಲಾಭ, ಗೃಹಲಾಭ, ಬಂಧುಲಾಭಗಳಾಗುತ್ತವೆ. ಅಂದು ಯೋಗಿಗಳು ಚಂದ್ರಘಂಟಾ ದೇವಿಯನ್ನು ಆರಾಧಿಸುವಾಗ ಮನಸ್ಸನ್ನು ಮಣಿಪೂರಚಕ್ರದಲ್ಲಿ ನೆಲೆಗೊಳಿಸಿಕೊಳ್ಳುತ್ತಾರೆ.
