ಸಣ್ಣ ಮತ್ತು ಅತಿ ಸಣ್ಣ ರೈತರಿಗೆ ಸಹಾಯವಾಗಲಿ ಎಂಬ ಉದ್ದೇಶದಿಂದ ಸುಮಾರು ಎರಡು ದಶಕಗಳ ಹಿಂದೆ ಪ್ರಾರಂಭಿಸಿದ ‘ನೀರಾವರಿ ಪಂಪ್ಸೆಟ್ಗಳ ವಿದ್ಯುತ್ ಸಹಾಯಧನ ಯೋಜನೆ’ ಇಂದು ರಾಜ್ಯ ಸರ್ಕಾರಕ್ಕೆ ದೊಡ್ಡ ಹೊರೆಯಾಗಿ ಪರಿಣಮಿಸಿದೆ. ಬಂಗಾರಪ್ಪನವರು ಮುಖ್ಯಮಂತ್ರಿಯಾಗಿದ್ದಾಗ, ಪಂಪ್ಸೆಟ್ ಹೊಂದಿದ್ದ ಸಣ್ಣ ರೈತರ ಸಂಖ್ಯೆ ಕಡಿಮೆ ಇದ್ದುದರಿಂದ ವರ್ಷಕ್ಕೆ ಸುಮಾರು 50 ಕೋಟಿ ರೂ. ಖರ್ಚಾಗಬಹುದು ಎಂಬ ಅಂದಾಜು ಮಾಡಿ, ಯೋಜನೆ ಜಾರಿಗೊಳಿಸಲಾಗಿತ್ತು. ಆದರೆ ಬರಬರುತ್ತ ನೀರಾವರಿ ಜಮೀನುಗಳಿಗೆ ಪಂಪ್ಸೆಟ್ ಅಳವಡಿಸಿಕೊಳ್ಳುವ ರೈತರ ಸಂಖ್ಯೆ ಜಾಸ್ತಿಯಾಯಿತಲ್ಲದೆ, ಈ ಯೋಜನೆಗೆ ಅರ್ಹರಲ್ಲದಿದ್ದರೂ ಕೆಲವು ಶ್ರೀಮಂತರು ಸಹಾಯಧನ ಪಡೆಯಲು ಆರಂಭಿಸಿದರು. ಧರ್ಮಸಿಂಗ್ ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ಈ ಸಹಾಯಧನದ ಮೊತ್ತ 700 ಕೋಟಿ ರೂ.ಗೆ ಏರಿತ್ತು. 2012ರಲ್ಲಿ 20 ಲಕ್ಷದಷ್ಟಿದ್ದ ಪಂಪ್ಸೆಟ್ಗಳು ಈಗ ಸುಮಾರು 34 ಲಕ್ಷ ಆಗಿವೆ. ಪ್ರತಿ ವರ್ಷ ಪಂಪ್ಸೆಟ್ಗಳ ಸಂಖ್ಯೆ ಸುಮಾರು 1.2 ಲಕ್ಷದಷ್ಟು ಏರಿಕೆಯಾಗುತ್ತಿದೆ. 2016ರಲ್ಲಿ 10,118 ಕೋಟಿ ರೂ.ನಷ್ಟಿದ್ದ ಸಬ್ಸಿಡಿ ಮೊತ್ತ 2023ರ ವೇಳೆಗೆ ಶೇ. 121ರಷ್ಟು ಏರಿಕೆಯಾಗಿ 22,387 ಕೋಟಿ ರೂ.ಗೆ ತಲುಪಿದೆ. 5 ಎಕರೆಗಿಂತ ಕಡಿಮೆ ಜಮೀನಿರುವ ರೈತರು ಮಾತ್ರ ಐಪಿ ಸೆಟ್ ಸಬ್ಸಿಡಿಗೆ ಅರ್ಹರಾಗಿದ್ದು, ಅಂಥವರ ಸಂಖ್ಯೆ 23.35 ಲಕ್ಷದಷ್ಟಿದೆ. ಉಳಿದ ಸುಮಾರು 10 ಲಕ್ಷಕ್ಕಿಂತ ಹೆಚ್ಚು ಜನರು ಈ ಸಬ್ಸಿಡಿಗೆ ಅರ್ಹರಲ್ಲ. ಇದರಿಂದಾಗಿ ಸುಮಾರು 5 ಸಾವಿರ ಕೋಟಿ ರೂ.ಗಳಷ್ಟು ಅನುದಾನ ಶ್ರೀಮಂತರ ಪಾಲಾಗುತ್ತಿದೆ ಎಂಬುದು ಸರ್ಕಾರದ ಆಂತರಿಕ ತನಿಖೆಯಲ್ಲಿ ದೃಢಪಟ್ಟಿದೆ.
