ಪ್ಯಾನ್ ಇಂಡಿಯಾ 'ಕಂಗುವ' ಚಿತ್ರದಲ್ಲಿ ಸಮಸ್ಯೆ ಎತ್ತಿಹಿಡಿದ ಪ್ರೇಕ್ಷಕರು! ಬಗೆಹರಿಸಿದ್ದೇವೆ ಎಂದ ನಿರ್ಮಾಪಕರು | Kanguva

ತಮಿಳುನಾಡು: ಕಾಲಿವುಡ್​ ಸೂಪರ್​ಸ್ಟಾರ್ ಸೂರ್ಯ ನಟನೆಯ ಪ್ಯಾನ್​ ಇಂಡಿಯಾ ಸಿನಿಮಾ ‘ಕಂಗುವಾ’ (Kanguva) ಇದೀಗ ದೇಶಾದ್ಯಂತ ತೆರೆಗೆ ಅಪ್ಪಳಿಸಿದೆ. ಶಿವ ನಿರ್ದೇಶನದ ಈ ಬೃಹತ್ ಆಕ್ಷನ್ ಚಿತ್ರದಲ್ಲಿ ದಿಶಾ ಪಟಾನಿ ಮತ್ತು ಬಾಬಿ ಡಿಯೋಲ್ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದು, ಸ್ಟುಡಿಯೋ ಗ್ರೀನ್ ಮತ್ತು ಯುವಿ ಕ್ರಿಯೇಷನ್ಸ್ ಬ್ಯಾನರ್‌ ಅಡಿಯಲ್ಲಿ ಕೆಇ ಜ್ಞಾನವೇಲ್ ರಾಜಾ, ವಂಶಿ ಮತ್ತು ಪ್ರಮೋದ್ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಸದ್ಯ ಚಿತ್ರಮಂದಿರಗಳಲ್ಲಿ ಭರ್ಜರಿ ಪ್ರದರ್ಶನ ಕಂಡಿದ್ದೇ ಆದರೂ ಒಂದು ಸಣ್ಣ ಸಮಸ್ಯೆಯನ್ನು ಚಿತ್ರತಂಡ ದೊಡ್ಡದಾಗಿ ಎದುರಿಸುತ್ತಿರುವುದು ಇದೀಗ ಮುನ್ನೆಲೆಗೆ ಬಂದಿದೆ.

ಇದನ್ನೂ ಓದಿ: ಅಂಗನವಾಡಿಗೆ ಮಲಯಾಳಿ ಶಿಕ್ಷಕಿ ನೇಮಕ: ಕೋರಿಕಂಡ ಗ್ರಾಮಸ್ಥರ ತೀವ್ರ ಆಕ್ರೋಶ ಹೈಕೋರ್ಟ್‌ನಲ್ಲಿ ದಾವೆ

ಹಲವಾರು ರಾಜ್ಯಗಳ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿರುವ 'ಕಂಗುವ' ಚಿತ್ರದ ಆಡಿಯೋ ಬಹಳ ಜೋರಿದ್ದು, ವೀಕ್ಷಕರ ಕಿವಿಗೆ ಹಾನಿಕಾರಕವಾಗಿದೆ. ಇದರಿಂದ ಚಿತ್ರವನ್ನು ಆನಂದಿಸಲು ಸಾಧ್ಯವಾಗುತ್ತಿಲ್ಲ. ಕನಿಷ್ಠ ಪ್ರಮಾಣವನ್ನು ಮೀರಿ ಧ್ವನಿ ಥಿಯೇಟರ್​ ಅನ್ನು ಆವರಿಸಿಕೊಂಡಿದೆ ಎಂದು ಅನೇಕರು ಚಿತ್ರತಂಡವನ್ನು ಜಾಲತಾಣಗಳಲ್ಲಿ ಟ್ಯಾಗ್​ ಮಾಡಿ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಇದನ್ನು ಗಂಭೀರವಾಗಿ ಸ್ವೀಕರಿಸಿದ ಚಿತ್ರದ ನಿರ್ಮಾಪಕರಾದ ಕೆ.ಇ. ಜ್ಞಾನವೇಲ್ ರಾಜಾ, ಚಿತ್ರಮಂದಿರಗಳಲ್ಲಿ ವಾಲ್ಯೂಮ್ ಅನ್ನು ಎರಡು ಹಂತಗಳಿಗೆ ಕಡಿಮೆ ಮಾಡಲು ವಿತರಕರಿಗೆ ಸೂಚನೆ ನೀಡಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ನವೆಂಬರ್ 15 ಅಥವಾ 16ರ ಸಂಜೆಯೊಳಗೆ ಈ ಸಮಸ್ಯೆಯನ್ನು ಸಂಪೂರ್ಣವಾಗಿ ಪರಿಹರಿಸುವ ಪ್ರಯತ್ನಗಳು ನಡೆಯುತ್ತಿವೆ. ನಾವು ಎಲ್ಲಾ ಚಿತ್ರಮಂದಿರ ಮತ್ತು ಮಲ್ಟಿಪ್ಲೆಕ್ಸ್​ ಪ್ರದರ್ಶಕರೊಂದಿಗೆ ಮಾತನಾಡಿದ್ದೇವೆ. ಚಿತ್ರದ ಧ್ವನಿ ವಿಚಾರದಲ್ಲಿ ಕೇಳಿ ಬಂದಿರುವ ವಿಪರೀತ ಹಾನಿಕಾರಕ ಜೋರು ಧ್ವನಿ ದೂರುಗಳನ್ನು ನಿಯಂತ್ರಿಸುವ ಸಲುವಾಗಿ ಇದೀಗ 'ವಾಲ್ಯೂಮ್' ಅನ್ನು ಎರಡು ಪಾಯಿಂಟ್​ ಕಡಿಮೆ ಮಾಡಲು ಎಲ್ಲರಲ್ಲೂ ವಿನಂತಿಸಿದ್ದೇವೆ ಎಂದು ನಿರ್ಮಾಪಕರು ತಿಳಿಸಿದ್ದಾರೆ. ಈ ಸಮಸ್ಯೆ ಚಿತ್ರದ ಗಳಿಕೆಗೆ ಯಾವ ರೀತಿಯಲ್ಲಿಯೂ ತೊಂದರೆ ಮಾಡದೆ ಹೋದರೂ ನೆಗೆಟಿವ್ ಆಗಿ ಕಂಡುಬಂದಿರುವುದು ಸದ್ಯ ಸೂರ್ಯ ಅವರ ಅಭಿಮಾನಿಗಳಲ್ಲಿ ತೀವ್ರ ಬೇಸರ ಮೂಡಿಸಿದೆ,(ಏಜೆನ್ಸೀಸ್).

https://www.vijayavani.net/this-buffalo-maintains-healthy-diet