ಆರಂಭಿಕ ದಿನಗಳಲ್ಲಿ ದೊಡ್ಡ ಹರಸಾಹಸವೇ ಪಟ್ಟು, ಅವರಿವರ ಬೈಗುಳಕ್ಕೆ ಗುರಿಯಾಗಿ, ಹಂತ ಹಂತವಾಗಿ ಯಶಸ್ಸಿನ ಹಾದಿ ತಲುಪಿ, ಅಪಾರ ಜನಮನ್ನಣೆ ಸ್ವೀಕರಿಸುವವರು ಅದೆಷ್ಟೋ. ಈ ಸಾಲಿನಲ್ಲಿ ನಮಗೆ ಮೊದಲು ನೆನಪಾಗೋದೇ ಸೆಲೆಬ್ರಿಟಿಗಳು. ಮೊದ ಮೊದಲು ಕೆಟ್ಟ ಅನುಭವ, ವಿಪರೀತ ಶ್ರಮ ವಹಿಸಿ ಬೆಳೆದು ಬಂದ ಅನೇಕ ಕಲಾವಿದರು ಇಂದು ದೊಡ್ಡ ಸ್ಟಾರ್ಗಳಾಗಿ ಮಿಂಚಿ, ಅಭಿಮಾನಿಗಳ ಮನದಲ್ಲಿ ಶಾಶ್ವತವಾಗಿ ನೆಲೆಯೂರಿದ್ದಾರೆ. ತಮ್ಮ ಆರಂಭದ ದಿನಗಳಲ್ಲಿ ಒಂದೇ ಒಂದು ಅವಕಾಶ ಗಿಟ್ಟಿಸಿಕೊಳ್ಳಲು ಕಷ್ಟಪಡುವ ನಟ-ನಟಿಯರು, ಒಂದೆರೆಡು ಚಿತ್ರಗಳು ಸೂಪರ್ ಹಿಟ್ ಅಥವಾ ಬ್ಲಾಕ್ಬಸ್ಟರ್ ಸಾಲಿಗೆ ಸೇರಿಕೊಂಡರೆ ಸಾಕು ತಮಗೆ ಸ್ಟಾರ್ ಪಟ್ಟಕ್ಕೆ ಫಿಕ್ಸ್ ಆಗ್ತಾರೆ. ಆದ್ರೆ, ಸಾಮಾನ್ಯ ಅದರಲ್ಲೂ ಸಿನಿರಂಗ ಹೊರತುಪಡಿಸಿ ಉಳಿದ ಕ್ಷೇತ್ರಗಳಲ್ಲಿ ಸಾಧಿಸುವ ಛಲವಾದಿಗಳು ಆರಂಭಿಕ ಹಂತದಲ್ಲಿ ಕಠಿಣ ಪರಿಸ್ಥಿತಿಯನ್ನು ಭೇದಿಸಿ, ತದನಂತರ ಅದ್ಭುತ ಸಾಧನೆಗೈದರು ಸಹ ಅವರ ಹೆಸರು ಮಾತ್ರ ಸೆಲೆಬ್ರಿಟಿಗಳಂತೆ ಹೊರಹೊಮ್ಮುವುದಿಲ್ಲ. ಇದೊಂದು ರೀತಿ ಬೇಸರದ ಸಂಗತಿ.
