ಸಂಘನಿಷ್ಠರಿಗೆ ಖಾತೆ ಮನ್ನಣೆ: ಪ್ರಮುಖ ಇಲಾಖೆ ಹೊಸಬರ ಪಾಲು, ಹಳಬರಿಗೆ ಬದಲಾವಣೆ ಇಲ್ಲ..

ಬೆಂಗಳೂರು: ಬಸವರಾಜ ಬೊಮ್ಮಾಯಿ ಸಂಪುಟ ಸೇರಿದ ನೂತನ 29 ಮಂತ್ರಿಗಳಿಗೆ ಕೊನೆಗೂ ಖಾತೆಗಳ ಹಂಚಿಕೆಯಾಗಿದೆ. ಹಳಬರು ಮತ್ತು ವಲಸಿಗರನ್ನು ಮತ್ತದೇ ಖಾತೆಗಳಲ್ಲಿ ಮುಂದುವರಿಸಲಾಗಿದ್ದರೆ, ಹೊಸಬರ ಪೈಕಿ ಸಂಘ ನಿಷ್ಠರಿಗೆ ಪ್ರಮುಖ ಖಾತೆ ಬಳುವಳಿಯಾಗಿ ಸಿಕ್ಕಿದೆ. ಇನ್ನು ಮಾಜಿ ಸಿಎಂ ಬಿ. ಎಸ್. ಯಡಿಯೂರಪ್ಪ ನಿಷ್ಠರಿಗೂ ಮಹತ್ವದ ಖಾತೆ ನೀಡಿ ಸಮತೋಲನ ಕಾಯ್ದುಕೊಳ್ಳಲು ಪ್ರಯತ್ನಿಸಲಾಗಿದೆ. ಒಟ್ಟಾರೆ ಖಾತೆ ಹಂಚಿಕೆ ಕಸರತ್ತಿನ ಬಳಿಕವಾದರೂ, ಆಡಳಿತಯಂತ್ರ ಚುರುಕಾಗಿ ಕೆಲಸಗಳು ವೇಗ ಪಡೆಯಬಹುದೆಂಬ ನಿರೀಕ್ಷೆ ಜನ-ಸಾಮಾನ್ಯರಲ್ಲಿ ಗರಿಗೆದರಿದೆ.

ವಿಳಂಬಕ್ಕೆ ಕಾರಣ: ಹಿರಿಯರು, ಹೊರಗಿನಿಂದ ಬಂದವರು ಮಹತ್ವದ ಖಾತೆಗಳಿಗೆ ಪಟ್ಟು ಹಿಡಿದಿದ್ದರೆ, ಸಂಘ ನಿಷ್ಠರಿಗೆ ಪ್ರಮುಖ ಖಾತೆಗಳನ್ನು ನೀಡಬೇಕೆಂದು ಸಂಘ-ಪರಿವಾರದ ಸೂಚನೆಯಿತ್ತು. ಇದು ಸಿಎಂ ಬೊಮ್ಮಾಯಿಗೆ ತಲೆನೋವಾಗಿ ಪರಿಣಮಿಸಿತ್ತು. ಈ ಬೆಳವಣಿಗೆ ಸೂಕ್ಷ್ಮವಾಗಿ ಗಮನಿಸಿದ ವರಿಷ್ಠರು ಮಧ್ಯ ಪ್ರವೇಶಿಸುವ ಮೂಲಕ ಪ್ರಕ್ರಿಯೆ ಪೂರ್ಣಗೊಳಿಸಿದ್ದಾರೆ. ಖಾತೆಗಳ ಹಂಚಿಕೆ ಪಟ್ಟಿ ಶುಕ್ರವಾರ ರಾತ್ರಿಯೇ ಸಿದ್ಧವಾಗಿತ್ತು. ದೆಹಲಿ ನಾಯಕರ ಗ್ರೀನ್ ಸಿಗ್ನಲ್ ಬಳಿಕ ಶನಿವಾರ ಬೆಳಗ್ಗೆ ರಾಜ್ಯಪಾಲ ಥಾವರ್ ಚಂದ್ ಗೆಹಲೋತ್ ಅಂಕಿತದೊಂದಿಗೆ ಬೊಮ್ಮಾಯಿ ಈ ಕಸರತ್ತು ಮುಗಿಸಿದ್ದು, ಸಂಭಾವ್ಯ ಅಪಸ್ವರ ನಿವಾರಿಸುವ ವಿಶ್ವಾಸ ಹೆಚ್ಚಿಸಿಕೊಂಡಿದ್ದಾರೆ.

ಜೊಲ್ಲೆಗೆ ಹಿಂಬಡ್ತಿ: ಬಿಎಸ್​ವೈ ಆಡಳಿತಾವಧಿಯ ಕೊನೇ ದಿನಗಳಲ್ಲಿ ಶಶಿಕಲಾ ಜೊಲ್ಲೆಗೆ ಮೊಟ್ಟೆ ಖರೀದಿ ಅವ್ಯವಹಾರದ ಕಳಂಕ ತಟ್ಟಿತ್ತು. ಆದರೂ ದೆಹಲಿ ನಾಯಕರ ಕೃಪಾಕಟಾಕ್ಷದಿಂದ ಬೊಮ್ಮಾಯಿ ಸಂಪುಟದಲ್ಲಿ ಜೊಲ್ಲೆ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಭ್ರಷ್ಟಾಚಾರ ವಿರೋಧಿಸುವ ಬಿಜೆಪಿ ತದ್ವಿರುದ್ಧ ನಿಲುವು ತಳೆದಿದೆ ಎಂಬ ಅಪವಾದ, ಆಕ್ರೋಶ ತಣಿಸಲೆಂದು ಜೊಲ್ಲೆ ಖಾತೆ ಬದಲಿಸಲಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಹಲವರಿಗೆ ಡಬಲ್ ಖಾತೆ: ಸಂಘ ನಿಷ್ಠರಾದ ವಿ. ಸುನೀಲ್ ಕುಮಾರ್, ಅರಗ ಜ್ಞಾನೇಂದ್ರ, ಕೋಟ ಶ್ರೀನಿವಾಸ ಪೂಜಾರಿ, ಬಿ.ಸಿ.ನಾಗೇಶ್, ಮೂಲ ಬಿಜೆಪಿಯವರಾದ ಹಾಲಪ್ಪ ಆಚಾರ್​ಗೆ ಮಣೆ ಹಾಕಿ ಪ್ರಮುಖ ಖಾತೆಗಳನ್ನು ನೀಡಲಾಗಿದೆ. ಜೆ.ಸಿ. ಮಾಧುಸ್ವಾಮಿ, ಬಿ.ಶ್ರೀರಾಮುಲು, ವಿ.ಸುನೀಲ್ ಕುಮಾರ್, ಕೋಟ ಶ್ರೀನಿವಾಸ ಪೂಜಾರಿ, ಉಮೇಶ್ ಕತ್ತಿ, ಹಾಲಪ್ಪ ಆಚಾರ್, ಡಾ.ಸಿ.ಎನ್. ಅಶ್ವತ್ಥ ನಾರಾಯಣ, ಡಾ.ಕೆ.ಸುಧಾಕರ್, ಕೆ.ಸಿ.ನಾರಾಯಣಗೌಡ ಡಬಲ್ ಖಾತೆಗಳ ಭಾಗ್ಯಶಾಲಿಗಳಾಗಿದ್ದರೆ, ಮುರುಗೇಶ್ ನಿರಾಣಿ ಬಯಸಿದ ಖಾತೆಯನ್ನೇ ಗಿಟ್ಟಿಸಿಕೊಂಡಿದ್ದಾರೆ.

ಮಹತ್ವದ ಖಾತೆ

ಬಸವರಾಜ ಬೊಮ್ಮಾಯಿ: ಮುಖ್ಯಮಂತ್ರಿ, ಹಣಕಾಸು, ಸಂಪುಟ ವ್ಯವಹಾರ, ಡಿಪಿಎಆರ್, ಗುಪ್ತದಳ, ಬೆಂಗಳೂರು ನಗರಾಭಿವೃದ್ಧಿ ಹಾಗೂ ಹಂಚಿಕೆಯಾಗದೇ ಉಳಿದ ಖಾತೆಗಳು

ಆಡಳಿತದಲ್ಲಿ ಬದಲಾವಣೆ ತರಬೇಕು ಎನ್ನುವ ಉದ್ದೇಶದಿಂದ ಖಾತೆಗಳು ಹಂಚಿಕೆಯಾಗಿವೆ. ಹಳಬ ಹಾಗೂ ಹೊಸಬರೆಂಬ ವ್ಯತ್ಯಾಸವಿಲ್ಲದೆ ಮಹತ್ವದ ಜವಾಬ್ದಾರಿ ನೀಡಲಾಗಿದೆ. ಎಲ್ಲರೂ ಉತ್ತಮವಾಗಿ ಜವಾಬ್ದಾರಿ ನಿಭಾಯಿಸಲಿದ್ದಾರೆ.

| ಬಸವರಾಜ ಬೊಮ್ಮಾಯಿ ಮುಖ್ಯಮಂತ್ರಿ

ಖಾತೆ ಹಂಚಿಕೆ ಮುಖ್ಯಾಂಶಗಳು

• ಅಧಿಕಾರ ಸ್ವೀಕರಿಸಿದ ಒಂದು ವಾರದ ನಂತರ ಬಸವರಾಜ ಬೊಮ್ಮಾಯಿ ಸಂಪುಟಕ್ಕೆ ಬಲ, ನೂತನ ಸಚಿವರಿಗೆ ನಾಲ್ಕು ದಿನಗಳ ನಂತರ ಖಾತೆಗಳ ಭಾಗ್ಯ
• ಹಣಕಾಸು ಹಾಗೂ ಬೆಂಗಳೂರು ನಗರಾಭಿವೃದ್ಧಿ ತಮ್ಮಲ್ಲಿಯೇ ಇಟ್ಟುಕೊಳ್ಳುವ ಪರಂಪರೆ ಮುಂದುವರಿಸಿದ ಮುಖ್ಯಮಂತ್ರಿ
• ಇಷ್ಟದ ಜಲ ಸಂಪನ್ಮೂಲ ಜತೆಗೆ ಇಂಧನ ಉಳಿಸಿಕೊಳ್ಳಬೇಕೆಂಬ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅಪೇಕ್ಷೆ ಫಲಿಸಿಲ್ಲ
• ಸಚಿವರ ಸೇರ್ಪಡೆಯಲ್ಲಿ ಸಾಮಾಜಿಕ ನ್ಯಾಯ, ಸಮಾನತೆ ಗೌಣವೆಂಬ ಅಪಸ್ವರವನ್ನು ಖಾತೆಗಳ ಹಂಚಿಕೆ ಮೂಲಕ ಸರಿದೂಗಿಸುವ ಪ್ರಯತ್ನ
• ಬೆಂಗಳೂರು ನಗರಾಭಿವೃದ್ಧಿ ಮೇಲೆ ಕಣ್ಣಿಟ್ಟಿದ್ದ ವಿ.ಸೋಮಣ್ಣ, ಆರ್.ಅಶೋಕ್, ಡಾ.ಸಿ.ಎನ್.ಅಶ್ವತ್ಥ ನಾರಾಯಣ, ಎಸ್.ಟಿ. ಸೋಮಶೇಖರ್​ಗೆ ನಿರಾಸೆ
• ಸಂಪುಟಕ್ಕೆ ಆರು ಹೊಸ ಮುಖಗಳ ಪೈಕಿ ಅರಗ ಜ್ಞಾನೇಂದ್ರ, ವಿ.ಸುನೀಲ್​ಕುಮಾರ್, ಹಾಲಪ್ಪ ಆಚಾರ್, ಬಿ.ಸಿ.ನಾಗೇಶ್​ಗೆ ಮಹತ್ವದ ಖಾತೆಗಳ ಹಂಚಿಕೆ
• ಸಮಾಜ ಕಲ್ಯಾಣ ಖಾತೆಯಿಂದಲೂ ಬಿ.ಶ್ರೀರಾಮುಲು ಎತ್ತಂಗಡಿ, ವಸತಿ ಬಯಸಿದ್ದ ಎಂ.ಟಿ.ಬಿ.ನಾಗರಾಜ್​ಗೆ ಮತ್ತೆ ನಿರಾಸೆ
• ಹೆಚ್ಚುವರಿ ಹಾಗೂ ನಾಯಕತ್ವದ ವರ್ಚಸ್ಸು ಹೆಚ್ಚಿಸಬಲ್ಲ ಖಾತೆಗಳಿಗೆ ಪ್ರಭಾವಿ, ಹಿರಿಯ ಸಚಿವರನೇಕರು ಮಂಡಿಸಿದ್ದ ಬೇಡಿಕೆ ಈಡೇರಿಲ್ಲ.
• ಮಹತ್ವದ ಖಾತೆಯಿಂದ ಗಮನಸೆಳೆದ ಗೋವಿಂದ ಕಾರಜೋಳ, ಸಿ.ಸಿ.ಪಾಟೀಲ್.

https://www.vijayavani.net/dr-cn-manjunath-in-vijayavani-clubhouse-conversation/

https://www.vijayavani.net/pregnant-died-at-hospital-parents-demands-arrest-of-doctor/