ತೆಲಂಗಾಣ: ಸಾಮಾನ್ಯವಾಗಿ ಲಂಚ (Bribe) ಎಂಬ ಪದ ಕೇಳಿದ ತಕ್ಷಣ ಹಲವರ ಮುಖ ಕೆಂಪಗಾಗುತ್ತದೆ. ಇದಕ್ಕೆ ಕಾರಣ ನಮ್ಮ ಹಣ ಅಲ್ವಾ ಅನ್ನೋ ಮನಸ್ಥಿತಿ. ಸರ್ಕಾರಿ ಕೆಲಸ, ಖಾಸಗಿ ಸಂಸ್ಥೆ, ರಾಜಕೀಯ ವಲಯ ಹೀಗೆ ಹಲವಾರು ಕ್ಷೇತ್ರಗಳಲ್ಲಿ ಈ ಲಂಚಾವತಾರ ಸದಾ ತಾಂಡವವಾಡುತ್ತಿರುತ್ತದೆ. ದಿನದ ಅಂತ್ಯದಲ್ಲಿ ಒಂದಲ್ಲ ಒಂದು ಕಡೆ ಲಂಚದ ವಿಷಯ ಸುದ್ದಿ ಆಗುತ್ತದೆ. ಇಂತಹ ವಿಷಯಗಳು ಸುದ್ದಿಪತ್ರಿಕೆ, ಮಾಧ್ಯಮಗಳಲ್ಲಿ ವರದಿಯಾಗಿರುವುದನ್ನು ನಾವೆಲ್ಲ ನೋಡಿಯೇ ಇದ್ದೇವೆ. ದಿನ ಬೆಳಗಾದರೆ ಈ ಸುದ್ದಿಗಳೇ ಅಗ್ರಸ್ಥಾನದಲ್ಲಿದ್ದರೂ ಅಚ್ಚರಿ ಪಡುವಂತದ್ದೇನಿಲ್ಲ. ಏಕೆಂದರೆ, ಇದೆಲ್ಲವೂ ನಮ್ಮ ದೈನಂದಿನ ಬದುಕಿನಲ್ಲಿ ನೋಡುತ್ತಿರುವ ತೀರ ಸಾಮಾನ್ಯ ಸಂಗತಿ. ಭಗವಂತ ಒಂದೊಳ್ಳೆ ಹುದ್ದೆ, ಉತ್ತಮ ಸಂಬಳ ಕೊಟ್ಟು, ಸ್ಥಾನ-ಮಾನ ನೀಡಿದರೂ ಸಹ ಕೆಲವರ ಹಣದ ದಾಹ ಅಷ್ಟು ಸುಲಭವಾಗಿ ಈಡೇರುವುದಿಲ್ಲ. ಸಂಬಳದ ಜತೆ ಗಿಂಬಳದತ್ತ ಕಣ್ಣಾಯಿಸುವ ಕೆಲವು ಅಧಿಕಾರಿಗಳು, ಮನೆಗೆ ಹೋಗುವಾಗ ತಮ್ಮ ಖಜಾನೆ ತುಂಬಿಸಿಕೊಂಡೇ ಹೋಗ್ತಾರೆ ಎಂಬುದು ನಿಜಕ್ಕೂ ಶೋಚನೀಯ. ಈ ಪೈಕಿ ಅನೇಕರು ಲಂಚ ಸ್ವೀಕರಿಸುವ ವೇಳೆ ಪೊಲೀಸರು ಮತ್ತು ಸಾರ್ವಜನಿಕರ ಕೈಗೆ ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದಿದ್ದಾರೆ. ಇದಕ್ಕೆ ಹಲವಾರು ನಿದರ್ಶನಗಳಿವೆ. ಆದ್ರೆ, ಇಲ್ಲೊಬ್ಬ ವ್ಯಕ್ತಿ, ಅಧಿಕಾರಿಯಾದ ತನ್ನ ಪತ್ನಿ ಲಂಚ ಪಡೆಯುವುದನ್ನು ಸಹಿಸಲಾಗದೆ ಆಕೆಯ ಅಸಲಿ ಬಣ್ಣವನ್ನು ಮಾಧ್ಯಮಗಳ ಮುಂದೆ ಬಟಾಬಯಲು ಮಾಡಿದ ಘಟನೆ ಇದೀಗ ಬೆಳಕಿಗೆ ಬಂದಿದೆ.
