ಅಮೆರಿಕದ ಟೆಕ್ಸಾಸ್ನ ಸ್ಯಾನ್ ಆಂಟೋನಿಯೋದಿಂದ 104 ಭಾರತೀಯ ವಲಸಿಗರನ್ನು ಹೊತ್ತ ಅಮೆರಿಕ ವಾಯುಪಡೆಯ ಸಿ-17 ವಿಮಾನ ಪಂಜಾಬ್ನ ಅಮೃತಸರದ ಶ್ರೀ ಗುರು ರಾಮದಾಸ್ಜಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬುಧವಾರ ಮ. 1.55 ಕ್ಕೆ ಬಂದಿಳಿದಿದೆ. ಈ ಮೊದಲು 205 ಭಾರತೀಯರನ್ನು ಗಡಿಪಾರು ಮಾಡಿ ಕರೆತರಲಾಗುತ್ತಿದೆ ಎಂದು ವರದಿಯಾಗಿತ್ತು. ಆದರೆ, ಅಮೆರಿಕದಿಂದ ಗಡಿಪಾರಾದವರ ಮೊದಲ ಬ್ಯಾಚ್ ಅನ್ನು ಕರೆತಂದ ವಿಮಾನದಲ್ಲಿ ಪಂಜಾಬ್ನ 30, ಹರಿಯಾಣದ 33, ಗುಜರಾತ್ನ 33, ಮಹಾರಾಷ್ಟ್ರ ಮತ್ತು ಉತ್ತರ ಪ್ರದೇಶದ ತಲಾ 3 ಹಾಗೂ ಚಂಡೀಗಢದ ಇಬ್ಬರು ಸೇರಿ ಒಟ್ಟು 104 ಭಾರತೀಯರು ವಾಪಸ್ ಬಂದಿದ್ದಾರೆ. ಇವರಲ್ಲಿ ಬಹುತೇಕರು ಡಾಂಕಿ ಮಾರ್ಗ ದಿಂದ ಅಕ್ರಮವಾಗಿ ಅಮೆರಿಕಕ್ಕೆ ತೆರಳಿದ್ದರೆ, ಕೆಲವರು ವೀಸಾ ಅವಧಿ ಮುಗಿದ ಬಳಿಕ ಅಕ್ರಮವಾಗಿ ನೆಲೆಸಿದ್ದರು. ಅಮೆರಿಕದಿಂದ ಗಡಿಪಾರಾಗಿ ಬಂದಿರುವ ಪಂಜಾಬಿನ ವಲಸಿಗರಲ್ಲಿ ಹೆಚ್ಚಿನವರು ಗುರುದಾಸ್ಪುರ, ಅಮೃತಸರ, ತರನ್ ತರನ್, ಜಲಂಧರ್, ನವನ್ಶಹರ್, ಪಟಿಯಾಲಾ, ಮೊಹಾಲಿ ಮತ್ತು ಸಂಗರೂರ್ ಪ್ರದೇಶಕ್ಕೆ ಸೇರಿದವರು.
