ಎಲ್ಲ ದಾಖಲೆಗಳಿದ್ರೂ 50 ಸಾವಿರ ರೂ. ಲಂಚ ಕೇಳಿದ ಸರ್ಕಾರಿ ಅಧಿಕಾರಿಗೆ ನೋಟಿನ ಹಾರದ ಸನ್ಮಾನ!

ಹೈದರಾಬಾದ್​: ಇಂದು ಯಾವುದೇ ಸರ್ಕಾರಿ ಕೆಲಸ ಆಗಬೇಕೆಂದರೂ ಅಲ್ಲಿ ಲಂಚವೇ ಪ್ರಧಾನ. ಲಂಚ ಕೊಡದಿದ್ದರೆ ಯಾವುದೇ ಕೆಲಸ ಆಗುವುದಿಲ್ಲ. ಸರ್ಕಾರಿ ಸೇವೆ ಜನ ಸಾಮಾನ್ಯನ ಹಕ್ಕು ಆಗಿದ್ದರೂ ಅದನ್ನು ಪಡೆಯಲು ತಾನು ಬೆವರು ಸುರಿಸಿ ದುಡಿದ ಹಣವನ್ನು ಲಂಚವಾಗಿ ಕೊಡಬೇಕಿದೆ. ಸರ್ಕಾರಿ ನೌಕರಿಯಲ್ಲಿರುವ ಕೆಲ ಹೈಟೆಕ್​ ಭಿಕ್ಷುಕರು ಜನ ಸಾಮಾನ್ಯರನ್ನು ಸುಲಿಗೆ ಮಾಡುವದನ್ನೇ ತಮ್ಮ ಗುರಿಯನ್ನಾಗಿ ಮಾಡಿಕೊಂಡಿದ್ದಾರೆ. ಲಂಚಕ್ಕೆ ಕಡಿವಾಣ ಹಾಕಲು ಎಷ್ಟೇ ಕಾನೂನು ತಂದರೂ ಅದು ಪರಿಣಾಮಕಾರಿಯಾಗುತ್ತಿಲ್ಲ. ಲಂಚ ಒಂದು ರೀತಿಯಲ್ಲಿ ಸಾಂಕ್ರಮಿಕ ರೋಗದಂತೆ ಎಲ್ಲಡೆ ಪಸರಿಸಿದೆ. ಆದರೆ, ಲಂಚ ಕೇಳವವರನ್ನು ಪ್ರಶ್ನಿಸಿದರೆ ಅವರ ಎದೆಯಲ್ಲಿ ನಡುಕ ಹುಟ್ಟುವುದಂತೂ ಗ್ಯಾರೆಂಟಿ. ತೆಲಂಗಾಣದಲ್ಲಿ ಮೀನುಗಾರನೊಬ್ಬ ಲಂಚ ಕೇಳಿದ ಮೀನುಗಾರಿಕೆ ಇಲಾಖೆ ಅಧಿಕಾರಿಗೆ ಬಿಸಿ ಮುಟ್ಟಿಸಿದ ರೀತಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.

ಜಗಿತ್ಯಾಲ ಜಿಲ್ಲೆಯ ಕತಲಾಪುರ ಮಂಡಲದ ರಂಗಾಪುರ ಮೀನುಗಾರಿಕಾ ಸಹಕಾರಿ ಸಂಘದ ವ್ಯಾಪ್ತಿಗೆ ಕಲ್ವಕೋಟ, ಭೀಮಾರಂ ಮತ್ತು ಬೊಮ್ಮೇನ ಗ್ರಾಮಗಳು ಬರುತ್ತವೆ. ಇದರಿಂದ ಭೀಮಾರಂ ಗ್ರಾಮವನ್ನು ಬೇರ್ಪಡಿಸಿ ಹೊಸ ಸಮಾಜ ರೂಪಿಸಲು ಮೀನುಗಾರರು ಚಿಂತನೆ ನಡೆಸಿದ್ದಾರೆ. ಇದಕ್ಕಾಗಿ ಜಗ್ಗಸಾಗರದ ಮೆಟ್ಪಲ್ಲಿ ಮಂಡಲದ ಮತ್ಸ್ಯ ಕೈಗಾರಿಕಾ ಸಹಕಾರಿ ಸಂಘಗಳ ಜಿಲ್ಲಾಧ್ಯಕ್ಷ ಪಳ್ಳಿಕೊಂಡ ಪ್ರವೀಣ್ ಅವರನ್ನು ಭೇಟಿ ಮಾಡಿದರು. ಬಳಿಕ ಪ್ರವೀಣ್, ಮೀನುಗಾರರೊಂದಿಗೆ ಜಿಲ್ಲಾ ಮೀನುಗಾರಿಕಾ ಅಧಿಕಾರಿ ದಾಮೋದರ್ ಅವರನ್ನು ಭೇಟಿ ಮಾಡಿದರು. ಆದರೆ, ಕೋರ್ಟಿಗೆ ಹೋಗಿ ಸಮುದಾಯದ ಪ್ರತ್ಯೇಕತೆಗೆ ಆದೇಶ ಪಡೆಯುವಂತೆ ಸೂಚಿಸಿದರು. ಅದರಂತೆ ಮೀನುಗಾರರು ನ್ಯಾಯಾಲಯದ ಮೊರೆ ಹೋಗಿ ಆದೇಶವನ್ನು ಪಡೆದರು. ನಂತರ ನ್ಯಾಯಾಲಯದ ಆದೇಶದ ಪ್ರತಿಯನ್ನು ಅಧಿಕಾರಿಗೆ ಹಸ್ತಾಂತರಿಸಲಾಯಿತು. ಅದಾದ ಬಳಿಕ ಹಳ್ಳಿಯ ಮೀನುಗಾರರಿಗೆ ಸ್ಕಿಲ್ ಟೆಸ್ಟ್ ಮಾಡಿಸಿ, ಸೊಸೈಟಿ ಅಥವಾ ಸಂಘವನ್ನು ರಚಿಸುವ ಮುನ್ನ 50 ಸಾವಿರ ರೂಪಾಯಿ ಲಂಚ ನೀಡುವಂತೆ ಮಧ್ಯವರ್ತಿಗಳ ಮೂಲಕ ಮೀನುಗಾರರಿಗೆ ತಿಳಿಸಿದರು. ಮೀನುಗಾರರು, ಜಿಲ್ಲಾಧ್ಯಕ್ಷ ಪ್ರವೀಣ್ ಅವರಿಗೆ ತಿಳಿಯದಂತೆ ಅಧಿಕಾರಿಗೆ 50 ಸಾವಿರ ರೂ. ಲಂಚ ನೀಡಿದರು. ಸಂಘ ರಚನೆಗೂ ಮುನ್ನ ಚುನಾವಣಾ ನೀತಿ ಸಂಹಿತೆ ಬಂದಿದ್ದರಿಂದ ಸಂಘ ರಚಿಸುವ ಪ್ರಕ್ರಿಯೆ ನಿಂತು ಹೋಯಿತು.

ಹೀಗಿರುವಾಗ ಅಧಿಕಾರಿ ದಾಮೋದರ್, ಮೀನುಗಾರರಿಂದ 50 ಸಾವಿರ ರೂಪಾಯಿ ಲಂಚ ಪಡೆದಿರುವುದು ಇತ್ತೀಚೆಗಷ್ಟೇ ಜಿಲ್ಲಾಧ್ಯಕ್ಷ ಪ್ರವೀಣ್ ಅವರ ಗಮನಕ್ಕೆ ಬಂದಿತು. ಬಳಿಕ ಈ ವಿಚಾರವನ್ನು ಎಸಿಬಿ ಗಮನಕ್ಕೆ ತರಲು ಮುಂದಾಗಿದ್ದರು. ಈ ವಿಷಯ ತಿಳಿದ ದಾಮೋದರ್​, ಪ್ರವೀಣ್‌ಗೆ ಕರೆ ಮಾಡಿ ಬೆದರಿಕೆ ಹಾಕಿದ್ದಾರೆ. ಇದರಿಂದ ಪ್ರವೀಣ್‌ಗೆ ಕೋಪ ತಡೆಯಲಾಗಲಿಲ್ಲ. ಮೀನುಗಾರರ ಜತೆ ಕಲೆಕ್ಟರೇಟ್​ನ ಮೀನುಗಾರಿಕಾ ಅಧಿಕಾರಿ ದಾಮೋದರ ಕಚೇರಿಗೆ ತೆರಳಿದರು. ಸಂಘ ಯಾವಾಗ ರಚನೆಯಾಗುತ್ತದೆ ಎಂದು ಕೇಳಿದರು. ಇದರಿಂದ ಕೋಪಗೊಂಡ ದಾಮೋದರ್, ಮೀನುಗಾರರನ್ನು ಅವಮಾನಿಸಿದ್ದಾರೆ. ಅಧಿಕಾರಿ ದಾಮೋದರ ವರ್ತನೆಯಿಂದ ಬೇಸತ್ತು ಮತ್ಸ್ಯ ಕೈಗಾರಿಕಾ ಸಹಕಾರಿ ಸಂಘದ ಪ್ರವೀಣ್, ತಕ್ಷಣ ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿ ಅಧಿಕಾರಿ ದಾಮೋದರ್ ವಿರುದ್ಧ ದೂರು ನೀಡಿದ್ದಾರೆ. ದಾಮೋದರ್ ಲಂಚಕ್ಕೆ ಬೇಡಿಕೆ ಇಟ್ಟಿದ್ದು, ಎಸಿಬಿಗೆ ದೂರು ನೀಡಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದು ಜಿಲ್ಲಾಧಿಕಾರಿಗೆ ದೂರು ನೀಡಿದ್ದಾರೆ. ಇದರಿಂದಾಗಿ ಕೋಲಾಹಲವೇ ಉಂಟಾಯಿತು.

ಮೀನುಗಾರರ ಸಂಘದ ಜಿಲ್ಲಾಧ್ಯಕ್ಷ ಪ್ರವೀಣ್, ಸಾರ್ವಜನಿಕ ರೇಡಿಯೊದಲ್ಲಿ ದೂರು ನೀಡಲು ಹೋದಾಗ ಅಧಿಕಾರಿ ದಾಮೋದರ್ ಕೂಡ ಅಲ್ಲಿಗೆ ಬಂದರು. ಈ ವೇಳೆ ಪ್ರವೀಣ್, ಅಧಿಕಾರಿ ದಾಮೋದರ್​ ಕೊರಳಿಗೆ ನೋಟುಗಳ ಹಾರ ಹಾಕಿ ಪ್ರತಿಭಟನೆ ನಡೆಸಿದರು. ಮತ್ತೊಂದೆಡೆ ಮತ್ಸ್ಯ ಕೈಗಾರಿಕಾ ಸಹಕಾರ ಸಂಘ ನೀಡಿರುವ ದೂರನ್ನು ಪರಿಶೀಲಿಸಿ ಸೂಕ್ತ ಕ್ರಮ ಕೈಗೊಳ್ಳುವುದಾಗಿ ಜಿಲ್ಲಾಧಿಕಾರಿ ಶೇಖ್ ಯಾಸ್ಮಿನ್ ಭಾಷಾ ತಿಳಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/hindu-youth-brutally-thrashed-allegedly-for-misbehaving-with-muslim-girl-in-davanagere

https://www.vijayavani.net/ahmedabad-to-mumbai-in-just-2-07-hours-with-indias-first-bullet-train